【校園青春】為咗報復初戀，我搵咗個MK仔做水泡，最後仲懲治咗全校最受歡迎嘅男神: 第四十六章：九十九個未接來電

食飽飯，沖埋個熱水涼，我終於捨得返入房面對現實。
我抹乾頭髮，深呼吸一口氣，長按電源掣開機。
屏幕著起嘅一瞬間，部電話震到好似按摩棒咁，完全停唔到。
震動持續咗足足兩分鐘。
通知欄好似瀑布咁瀉落嚟。

未接來電：傑 (99+)
WhatsApp：傑 (156 條新訊息)

我由得佢震完，先慢慢解鎖入去睇。




對話框入面，阿傑嘅情緒經歷咗幾個階段嘅崩潰。
由最初嘅震驚：「分手？講笑咋嘛？」
到憤怒：「你玩嘢呀？無啦啦講分手？」
到恐慌：「BB 我做錯咩呀？你出聲啦！」
到最後嘅哀求：「求下你，唔好唔理我，起碼都比個死因我，死都死得眼閉。」

我坐喺床邊，冷眼睇住呢堆文字。
其實欲加之罪，何患無辭？
但我唔想做醜人。我唔想背負住「變心」、「貪新忘舊」嘅罪名。
我要贏，就要贏得漂亮。我要做受害者，要做那個「被逼離開」嘅人。





我個腦飛快咁轉，搜尋住可以用嘅藉口。
突然，一個名喺我腦海閃過——子欣。
嗰個成日喺阿傑 IG 出現嘅女仔。
據我所知，子欣係一個典型嘅街童 MK 妹，聽講才 13 歲就輟學唔讀書，成日夜不歸宿，食煙飲酒，流離浪蕩。
阿傑成日話當佢係細妹，但我見過子欣覆佢 Story 嘅語氣，又 send 心心又盛，阿傑出 post 佢次次都秒 like 秒回。
雖然我一直冇放喺心上（因為根本唔在乎），但而家，佢就係我最好嘅擋箭牌。

我手指喺鍵盤上敲打，打出咗一段充滿「委屈」同「失望」嘅文字：
「你問我點解？你自己心知肚明啦。」




「你同嗰個子欣係咩關係？你以為我真係盲㗎？」
「我一直忍你，係因為我信你。但你太過分啦。」

發送。
將個波踢返比佢。
呢招叫「反客為主」。