是的,工作自然就是枯燥的同義詞。 

尤其是當這份工作的意義就只剩下錢時...... 

一所辦公室最重要的並不是好的老闆、好的指揮、更不會是正版或盜版軟件。 
最重要的,其實是一個時鐘。 
基本上,全世界的上班族中,不論階級及職位, 
上班時最常做的,就是看鐘, 
靜待時針碰到六時半的那刻。 
然而,公司加班多了,久而久之,公司同事們都已經沒有看鐘的習慣, 




因為那可貴下午六時半已失去了它原有的意義。 
然後,公司便再沒有人看鐘。 
最後,連鐘也被拆走了。 

沒有鐘的房間,不禁令我想一個實驗...... 

「Hey Fellas!」老闆清脆地拍了醒目的白板幾下。 
雖然聲音不算響亮,更說不上悅耳,但亦足夠引來公司上下的關注。 

那個實驗把一個囚犯關在空洞的密室內,蒙住雙眼, 




要他坐在裡面,然後讓他一直聽水滴聲。 

「我知道大家呢幾日都好辛苦架啦!但係公司的確要趕上同行業績, 
所以呢段其間始終需要大家幫幫手,做好未來幾份大生意。」 

很快,官方人員表示那囚犯已死於恐懼。 

「大家記住:Devotion is the key!希望大家畀啲idea公司, 
畀到公司更多既contribution,未來公司一定會好好報答番大家......」 





然而,現實生活中,人人卻總是習以為常的加班, 
似是活生生的,要自薦參與的實驗,相當諷刺。

「即係今日又冇得走啦......」比較大膽的同事苦訴...... 


但說話回來,眼見其他同事都好端端的,加班帶來的疲憊是否僅源於自己的孱弱? 

「唉我都唔想架,事實上我今晚都要係到陪大家啦......」話語間隱約聽到幾聲很不屑的嘆氣。 
「總之大家畀心機好好做埋啲野。 
快啲做完,大家走得時,公司又好啦! 
公司好時大家都一定有好處!」 

又或者,他們是真正厲害,是值得表揚的吧。 

接著,我感覺到有人正走過來。 





「Hey!」從老闆在影印機上按了幾個按鈕之後, 
我就意識到他會前來找我。但老闆前來之前,能不應的當然就不會應。 

我轉個身,在他面前戴上笑臉。

「點呀?做成點嗎?」他裝作親切的笑容更凸顯了他的老土。 


「哦......仲有一批文件未打好呀......」不過,他也可能已看穿我的假面。 
「不過有幾份打好咗架啦,一係我呢家畀左你睇先?」 

「哦,ok。」說罷,他便隨手拿過我印出來的文件。 
「點呀?呢幾日OT左咁多個鐘,頂唔頂得順呀?」 

「哦......我ok呀冇問題。」我循例答道。 





「真係頂唔順可以出聲呀。雖然公司的確好缺人手, 
但係都驚你做到頂唔順,做到癲左就唔好啦,哈哈! 
你真係唔得既話可以番屋企先架。」 

「唔使啦!」我急忙搖頭。「真係唔使啦。」 

何況家中正有人等我去養。 

「Ok!咁好啦!有咩問題呀疑難雜症呀身體不適呀痾嘔肚痛呀,記得搵我啦喎。」 
之後,他便打算抽身離去。 

真的,家中有人在等我...... 

「呀......Sorry!」一股衝動驅使我站了起來。 





「係?」不禁令他直打個愣怔。 

「請問呢家幾點?」 

「呢家......」然後,他掀起左手的衣袖,亮出悅目的勞力士。 
「就快十點半啦。」 

我不禁嘆了口悶氣。

「唉我明既我明既,大家都想走架啦,我都想返去湊女呀。 

總之我地快快手搞埋呢幾份野佢,跟住......」他忽然錯愕的愣著。 

「唔......係咪打錯左啲咩?」 





「間公司係叫『連倫』,唔係「連聯」喎。」他驚訝的望著我。 

「......吓?」 

他沒有理會我,馬上再翻閱其他文件。「全部都打錯哂。」 

「但係我收番來既內部email係叫『連聯』架喎。」我一臉不解。 

「唉點都好啦,份文件聽朝同佢地開會要用到架。呢家無論如何都要改番好佢架啦。」 

「哦......」 

「點都好啦。」他迅速步往白板,快得要把他的說話都吃回去似的, 
「喂喂喂,大家係咪都係打左『連聯』......」 

漫漫長夜不好熬...... 

「吓咪『連聯』囉唔係咩?」 

又是一個沒有Stella的晚上。 

「『連倫』呀大哥!『連聯』係邊個講架?」 

究竟還要維持多久? 

「Sorry呀......我冇預有人用『連倫』咁難聽既名,所以下意識打左做『連聯』......」 

究竟還要多久才能離去......? 

「唉,真係好野。你今晚等住畀人連輪啦!」 

我瞪著眼前的螢光幕,不其然感到暈眩。 

「對唔住呀......一係我請大家食宵夜......」 

視力也有點模糊...... 

「呢家仲邊得閒食宵夜呀!」 

或許睡一覺會比較好。