香港電影，每逢拍攝飛車同警匪槍戰場面，就一定「冇得輸」！從《英雄本色》周潤發手持雙槍掃射黑幫，一舉成名威到荷里活，到之後《頭文字D》在秋名山馳騁飄移……這種融入我哋成長記憶的電影基因，注定是香港的驕傲。而呢套《衝鋒．火拼》，亦同樣冇叫人失望。 套戲接近兩小時，由頭緊張到落尾。就算當中加插一些反派角色兒時的溫馨場面，都唔覺拖戲或沉悶，反而俾我心臟一個緩衝空間，回過神來才發現背脊唔知幾時已滲出冷汗。 片中有好幾幕，是向經典港產片致敬的安排：包括張繼聰企上車頂揸住AK掃射、飛車入窄巷、要拖到高轉數先夠力飄移入後巷……呢啲場面，港產片迷從不覺得陌生之餘，反而每一次「重溫」，都會再次讚嘆港產片的厲害。這次尤其見到「錢家樂」三個字，就知「玩車」場口必定出神入化！ 另一個要點讚的，是主角方中信。講真，我入場前曾經有啲猶豫——方Sir入行多年，外形當然冇得輸，但一向表情「都係嗰個」，今次擔正演警匪片，你點夠跑呀，方生？但睇完我要先道歉：今次，我真係睇錯你！尤其係佢要表露一個男人受委屈後，獨力「頂住半邊天」的辛酸，到被人講中心事、心靈終於得以「釋懷」而忍淚流出的那一刻，眼神同微表情都充滿層次感。今次，我真係要俾兩個讚佢！ 張繼聰同樣有驚喜。由第一幕出場，佢用懷疑眼神望住身邊人，已經將大賊角色的壓迫感演繹得淋漓盡致，我好驚佢一開場就剎到滿地鮮血…成套戲幾乎被佢嘅「磁場」牽住走，呢種進步，絕對值得肯定。 若果要講不足之處，我會認為警匪追車場面剪接得比較密。如果能夠有啲長鏡頭持續拍攝，成個鬥法場面一定會更震撼。不過我都明，落場親自揸嗰班唔係錢家樂嗰代嘅老手級特技人，要剪幾次確保效果，亦係可以理解嘅，唔應該太挑剔。 最後俾啲忠告各位觀眾，兩點一定要留意： 1. 揀間有杜比7.1環迴立體聲嘅戲院，你就會不其然感受到子彈「穿越」你身心嘅威力。我今次第一次去圍方睇，音響真係值一個讚！ 2. 有血壓高嘅朋友，記得事前食藥，否則腎上腺素長期高企，引致唔舒服就大件事！ 總括而言，《衝鋒．火拼》，今次我沒有盲撐，拍得好而各演員同幕後團隊又一次搏晒命，我由衷致敬！