儲物室的餘溫: 第六章　返學

第六章　返學

第二日，Miss Yung一朝早起身，照鏡嗰陣見到左邊面有少少瘀傷，唔想畀其他人見到問東問西，所以今日戴口罩返學。

「媽mi。」小欣喺車上面一直拖住佢隻手，小小年紀，其實已經知道爸爸經常會打媽mi，但係佢冇講過出嚟，怕會畀爸爸鬧。

「做咩呀？」Miss Yung若無其事咁回應。

小欣尋晚聽到Miss Yung嘅喊聲，知道發生咗咩事，見到佢戴住口罩，有啲擔心，但係臉上掛住笑容，希望嗲吓媽媽，會令佢開心啲：「冇嘢呀，想叫你之嘛。」





「小欣！你大個女喇，唔好成日拖住。」Chan Sir黑口黑面咁喺揸車：「唔可以畀同學見到你咁唔成熟。」

「小欣只係二年級。」Miss Yung冇放開手，為小欣辯護：「況且而家喺車度⋯⋯」

「媽mi，我想飲水。」小欣即刻放開手，喺書包度拎咗水樽出嚟，以免再激嬲爸爸。

返到學校，小欣落車，趁Chan Sir見唔到，要抱抱Miss Yung先至走。呢個擁抱，Miss Yung都唔知女女係因為擔心先抱，仲以為係小朋友嘅普通Goodbye Hug。

然後小欣自己行去小學部，佢一邊行，一邊轉頭望住父母。佢同自己講，要再乖啲、再成熟啲，咁媽mi就唔會畀爸爸打。





而Chan Sir同Miss Yung就一齊行去中學部。行到去轉角之處，Chan Sir突然停低，目露兇光咁瞪住Miss Yung：「你唔好再縱容我個女。」

Miss Yung好想講：『個女我都有份㗎。』但係佢唔敢，唔敢點頭回應一聲：「嗯。」

「今晚你唔使當值，幾點返？」Chan Sir嘅命令式語氣，好似迫佢答一放工就返屋企咁。

「放學輔導組要開會，開完會我就會返去。」Miss Yung加一句：「我會接埋小欣，時間應該match到。」

「好。」





咁啱有兩個中學部嘅學生經過，大笑住咁叫：「哇哇！你哋睇吓！Chan Sir同Miss Yung真係好恩愛呀，出入都成雙成對。」

Chan Sir繼續黑臉面對學生，行埋去訓示佢兩個：「多事。你兩個件衫快啲攝返好，知唔知咩叫整齊校服？」

Miss Yung見佢行開咗，趁機轉個彎返教員室，坐低，長歎一口氣。好似喺呢度，見唔到Chan Sir本人，佢先可以抖到啖氣。

佢望住個鐘，默默數住：「仲有九個鐘就要返去⋯⋯」


//