儲物室的餘溫: 第八章　教員室

第八章　教員室

放學，阿凱抱住一個iPad入教員室。

除咗Miss Yung之外，教員室仲有另外一個老師喺度，佢見到阿凱：「哇！全校最難攪嗰個，竟然返嚟教書！」

「黃Sir，我返嚟做電腦嘢咋。」佢一邊行去Miss Yung度，一邊寸寸貢：「你係咪教書教得耐，慒咗呀？連教職員同technian都唔識分。」

「差唔多啦，咪又係要對住啲學生。」黃sir係阿凱嘅中六班主任，已經習慣咗佢咁嘅態度：「係時候體驗吓做老師有幾辛苦，尤其遇著你呢啲壞學生。」





「我不知幾乖，你問吓Miss Yung。」阿凱企起Miss Yung隔離，笑笑口咁對住佢。

Miss Yung即時諗起阿凱嘅另一面，即刻怯一怯：「吓？咩話？」

「係得你先攪得掂阿凱，佢淨係聽你話。」黃sir拎起公事包，準備離開：「唔係你叫佢，佢點會返嚟同師弟妹補習吖！最神奇係，佢竟然返嚟考Mock，Miss Mak都話跌晒眼鏡！」

「哈哈⋯⋯係咩⋯⋯？」Miss Yung好尷尬，避開全部人嘅視線，低頭改簿。

「係呀，我最聽Miss Yung話，因為Miss Yung係全校最好嘅老師。」阿凱同黃sir揮手：「Bye Bye黃sir。」然後，細細聲同Miss Yung講：「我真係最聽你話，係咪？」





「唔係囉⋯⋯」Miss Yung面都紅埋，心諗，佢係聽話嘅，就唔會發生緊儲物室同補習室嘅事。

「部iPad整好咗喇。」阿凱放低個iPad，順手放多咗兩粒朱古力：「有時，都要輪到你聽吓我話嘅。」

「咩呀⋯⋯你講咩呀？」Miss Yung完全不知所措，揸住枝紅筆，寫又唔係，唔寫又唔係。雖然啲人走晒，但係佢真係好驚會有人發現佢同阿凱嘅關係。

「我叫你食朱古力呀，食咗會開心啲。」阿凱喺Miss Yung耳邊講：「你諗咗去邊？係咪諗咗去儲物室嗰度？」

「邊有。」Miss Yung四圍望咗一眼，好彩啲人已經走晒。





阿凱捉住Miss Yung隻手，情深款款咁講：「今日辛苦喇，食粒朱古力獎勵吓自己。一粒你嘅，一粒係小欣嘅。」

Miss Yung估唔到，阿凱竟然唔介意小欣嘅存在，喺愛佢嘅同時，愛埋佢身邊嘅人。

「嗯。」佢想抽返隻手出嚟，但係指尖唔捨得離開呢個熾熱嘅掌心。

「乖喇。」阿凱用另一隻手，拉低Miss Yung嘅口罩，再摸摸Miss Yung塊面，近距離觀察佢面上嘅傷痕。佢睇得好清楚，係指痕。

佢忍住怒火，握緊拳頭，但同時好溫柔咁對Miss Yung講：「我唔會放過佢。」

Miss Yung望住阿凱，佢嘅眼神，係史無前例咁認真。佢好怕，嘴唇輕微抖動。畀阿凱發現咗呢個一直守住嘅秘密，佢唔知要點做。真係好驚，驚到一合埋眼，就流咗滴眼淚出嚟。

阿凱手指輕輕抺走眼淚，慢慢哄埋啲，佢哋嘅呼吸近在咫尺。佢憐惜地錫Miss Yung嘅額頭，再慢慢到嘴角，再印到唇上。今次只係輕輕地吸啜一下，唔似得之前咁猖狂。

教員室，一個公眾地方，隨時會有人走入嚟。呢個溫柔嘅吻，呢個心動嘅感覺，甜蜜又刺激。





Miss Yung心跳已經快到控制唔住，呼吸都跟住一齊加速。

突然，外面傳嚟老師們閒談嘅聲音：「頭先又畀Chan Sir話我喇，佢真係好煩呀。」

Miss Yung嚇得即時縮開，戴返好口罩，低頭改簿。

阿凱放低咗張字條就走咗。

「愛你。」

Miss Yung偷偷望住阿凱嘅背影，諗唔明，點解呢個人可以令到自己咁意亂情迷。同樣地，佢都唔明，點解呢個人會對自己咁迷戀。

佢望住紙條，忍住眼淚，百般不捨咁將紙條撕碎，掉咗入垃圾桶。





絕對唔可以畀人發現佢同阿凱嘅關係⋯⋯

//