儲物室的餘溫: 第十章　糖水

第十章　糖水

分享會完咗，接住就係營火會。阿凱冇離開營地，因為有物資要搬運，所以留喺度開OT。

個個老師都讚佢變咗好多，由以前下下都駁嘴嘅頂心杉，而家變咗做成熟穩重嘅大人。

阿凱聽到「大人」呢個term，真係好開心，覺得自己同Miss Yung嘅距離又近咗。佢唔鍾意Miss Yung成日講自己係佢嘅學生，就係因為呢個身份，令到Miss Yung卻步。佢深信，如果自己唔係學生，Miss Yung一定係更投入喺呢段感情入面，唔使就住就住。

自從中六last day之後，阿凱擺明車馬追Miss Yung，比起以前淨係識得送吓小禮物，變得主動咗好多，有承擔咗好多。佢應承Miss Yung返學校考Mock、去義工團幫手，仲會溫書去考DSE，唔係裸考。





阿凱都幾肯定Miss Yung對自己都有意思，因為Miss Yung見到佢，會有個怕醜樣出咗嚟，仲會面紅。而且仲feel到Miss Yung對佢嘅態度、語氣都唔同咗，放鬆咗好多，冇之前咁拒人於千里之外。

營火會之後，時間都唔太夜，因為小學生唔可以太夜瞓。阿凱同老師告別咗先，話自己要返屋企，但同時同Miss Yung打眼色。不過Miss Yung扮睇唔到，繼續同其他同事傾偈，傾吓聽日出營嘅安排。

Miss Yung返到房，閂埋房門，挨住門邊諗：阿凱係唔係真係會嚟？如果佢嚟咗，我開門畀佢，但係畀人發現咁點算？

佢開一開門，偷偷睇睇出面嘅環境。佢個心好亂，都唔知而家係唔係期待阿凱嘅出現。

望住一個人都冇嘅走廊，Miss Yung竟然覺得有少少失望，亦對自己有呢個諗法，感到有啲失望。為人師表，竟然鍾意學生，仲想⋯⋯同佢發生關係。呢一件事，喺邊個角度睇都好唔應該。





Miss Yung閂返度門，搖搖頭，清空一下思緒，然後入廁所沖涼。

深夜，Miss Yung收到阿凱嘅訊息，佢話：「我而家喺門口，如果想見我，你就開門。十分鐘後，你唔開門我就走。」

佢睇完之後，即刻delete咗條訊息。熄咗個mon，手捉緊電話放喺心口。佢個心真係好亂，佢知道呢一個門開咗之後，就永遠都唔閂唔返。

考慮咗好耐，見住時間一分一秒咁過。佢愈嚟愈心急，開門，佢會失守；唔開門，佢又忍心。出面嗰個人，身份係學生，但感覺又唔似係學生。

佢打咗個訊息「你都係返去啦。」畀阿凱，喺send出去之前，收到阿凱send嚟嘅一幅相，係佢同糖水外賣嘅自拍照，加咗一句：「呢兩日camp辛苦喇，買咗嘢畀你食。」





Miss Yung見到相入面嘅阿凱，心裡面嘅衝動突然又湧上嚟，佢同自己講「食糖水啫」嚟麻醉自己，將件事合理化。

佢望咗一陣張相，個心仍然好混亂。狠心咁delete張相同訊息之後，開咗門。外面嘅涼風，同阿凱一齊入咗去間房度。

阿凱閂咗門，輕輕嘅聲音，怕畀隔離聽到：「Miss Yung，帶camp係咪好攰？」佢望到Miss Yung好疲憊嘅眼神，有啲心痛。

Miss Yung搖搖頭，佢仲未接受到，自己喺深夜開咗門畀一個學生。

阿凱放低糖水喺枱上面，打開碗蓋，拎咗匙羹放入碗中，遞畀Miss Yung：「芒果西米露，凍嘅。」

喺自己咁攰嘅狀態下，竟然有一碗愛心糖水喺面前出現，Miss Yung知道阿凱應該行咗好遠去買返嚟。

佢望住呢一碗糖水，百感交集，忍唔住軟弱，喊起上嚟。佢諗起呢幾年，從來冇人take care佢嘅感受，只係日日都要做個好老婆、做個好媽媽、做個好老師，仲要畀Chan Sir打罵。

佢太攰喇。





阿凱嚇一跳，即刻放低糖水，行去Miss Yung面前，拖住佢隻手，又輕輕摸頭：「做咩事呀？係咪有人蝦你？」

Miss Yung聽到呢句說話，更加喊得利害，眼紅紅咁望住阿凱哭訴：「你可唔可以⋯⋯唔好對我咁好⋯⋯？」

阿凱將Miss Yung擁入懷裡，細心呵護住佢：「點解唔好？」

Miss Yung崩潰大哭：「我⋯⋯我唔要⋯⋯鍾意你呀⋯⋯」


//