追求演藝的Mikaela: 02.

就讀中三的文文， 一直擔心自己不能通過即將來臨的中三評核試，知道有導演來到學校，心裡自然也想到找導演面試當演員、明星，若然成功便不愁出路，她也是校內眾多名神婆之中占卜最靈驗的一位， 同學們有大小疑難都會向她請教，指點迷津。
細文和文文來自同一所小學， 現在和這位姐姐重遇，感覺份外親切：「文文姐姐，好耐無見！」文文：「細佬，又會喺度見返你，不過話時話，你做乜唔報間好啲學校，係咪掛住我呀？」細文不好意思回答：「唔係，只係前幾個志願派唔到先會過來。」文文：「同是天涯淪落人，我其實都係咁，依家我中三，就來無書讀啦！」細文：「中三升中四係咪好難架，姐姐？」文文實在不不想思考這個問題，轉個話題說：「喂，頭先入來搏懵個女仔係點架？」細文：「好似係個有錢女，學校報警，差人要佢走，佢請律師來應付。」文文：「等我去樓下收下風先。」便離開中一戉班的課室，未幾折返，並帶著剛才上在操場落淚的排球隊員回來，安慰說：「個有錢女大石壓死蟹，係都我地搵導演先啦！」排球隊員名叫Cindy，此刻聽到文文這樣說，即時放心不少，捉著文文的手：「文文， 不如我地一齊去見導演啦！」凡事都問運程的文文：「不如問左我姑媽，睇下今日好唔好運先啦！」順便向細文說：「喂，俾埋你八字我，我打電話去問姑媽運程。」文文的姑媽在九龍城寨開設佛堂，文文幫同學問卜時有不解之處便會向她求教。文文跑去五分鐘路程外的公共電話亭打電話， 一番對話後便折返校園。在課室外的走廊，文文向Cindy說：「姑媽話妳條命係路邊花，好襯青春搵舊錢旁下身。」之後又向細文說：「細路，姑媽話你係楊過， 我哋一齊去見導演，睇下有咩角色可以做，不如Cindy妳做小龍女，我做李莫愁。」此時，在校園內強行參觀了一會，全程有大律師陪伴的Mikaela 正要離去，在樓梯轉角處聽到對話，一邊大喊一邊走近：「邊個咁大想頭，要同我搶角色！」原來小龍女是Mikaela 一直想扮演的角色，她在校內舞台劇就扮演過幾次， 因為就讀女校，楊過的角色就要找初中班的女生反串扮演。她早就把自己當作小龍女。
但在文文等人眼中，她只是個外來者，籍著家庭背景恃強凌弱，奪走所有好處的富家女。文文向Mikaela 說：「小姐，我地傾下閒計又關妳事，妳來學校參觀，參觀完就走啦。」Mikaela:「你地講緊我，我就要過來問清楚。」文文沒好氣地指著細文：「嗱成個楊過企喺度，妳問佢邊個最似佢姑姑啦！」Mikaela望了望細文， 心裡認定他也是女扮男裝的反串角色：「你又學人做楊過，我學校個楊過好你好多，你跟我過去同佢見下面。」文文插嘴說：「呢個珍珠都無咁真，我姑媽算得好準架。」細文回答：「我覺得文文姐姐最似小龍女。」文文笑著回應：「哈哈，我邊似呢，不如搵Cindy 姐姐扮你姑姑啦。」眾人就這樣嬉鬧著，言談中都不重視Mikaela 的存在。
這時牛導演步近問：「邊個係楊過呀？」文文和Cindy見到導演，就像螞蟻見到蜜糖一樣，急忙向導演打招呼：「導演！」牛導演見慣這些場不忘風趣，摸摸自己的面：「乜我好靚仔咩？」文文和Cindy都同樣以嬉笑聲回應：「導演你好幽默啊！」又是一陣笑聲。但是Mikaela 這時卻一臉認真，手指著細文：「導演，就係呢個人反串扮我拍檔。」文文在旁大叫：「邊個扮妳拍檔，係妳拍檔扮緊佢。」牛導演笑了笑向細文說：「細路，問清楚你先，到底你你係男定女？」文文聽罷轉身走入課室探問細文的班中同學，未等細文回答，已有兩個同學走出課室，一個名叫阿Ken, 另一個是男班長，叫何文田。
二人未等細文自己回應，已搶先說：「導演，我地一齊入男廁小便， 佢係男架。」牛導演聽後略帶失望，搖搖頭向細文說：「細路，可惜你真係男仔，如果你好似呢位小姐所講係女仔反串著男裝，我就即刻用你做特約！」校內各人聽罷，一齊起哄。
正在做課室壁報的阿Ken大叫：「剪左佢啦！」眾人又是一陣大笑，文文跟細文說：「細佬，不如我帶你入九龍城寨，搵個醫生...」話未說完，眾人又是一陣哄笑。細文也只能苦笑著低頭不語，不懂回應。
這時Mikaela 一手拖住細文，向牛導演說：「導演，我要做小龍女，我要同呢個男仔拍拖！」牛導演：「小姐，我好似未決定用妳，妳好似心急左啲。」細文不知所措，只想扭開這位校外小姐的手，可是Mikaela 捉緊說：「細路，你同我返去學校，見一見我學校個楊過。」說著便想拖著楊過離開，文文見狀，語帶諷刺地說：「細佬，唔好跟佢去呀，佢學校喺九龍塘！」在旁的Cindy也意會到文文的說法，和文文低聲講，高聲說笑，跟而全程陪伴Mikaela 在旁的大律師，亦急步走向文文和Cindy 二人，狀似警告。
這時女班長Zoe從課室衝出，衝向細文並不斷拍打：「細文，你做乜同女仔拖手，快啲同我返入去。」Mikaela問細文：「妳地拍緊拖？」細文否認。文文亦向阿Ken探問：「佢地拍拖架？」阿Ken回答：「唔係啊，呢個係女班長，佢同男班長好似啱key啲。」文文笑了笑，高聲向Zoe說：「細路女，妳係咪想一腳踏兩船？」Zoe滿臉通紅，大聲回應：「唔係呀！」Mikaela亦失笑說：「細路女，妳好似花心左啲。」Zoe為之氣結，轉為用力拍打Mikaela。
Mikaela 先是叫痛，然後大喊：「律師，佢打痛我，應該點做？」大律師即時回應：「報警，呢個女仔傷人。」Mikaela續說：「告埋佢民事，我要佢破產！」Zoe只覺平日拍打同學不是什麼嚴重事情， 低聲道歉就退後了幾步。
這時細文見Mikaela 鬆開了手，連忙從樓層前梯逃走到地面，再從地面樓層的後樓梯繞道回自己課室，同學們忍不住笑，但文文等人還是下意識地站在課室門口，不讓Mikaela 帶走細文。




訓導主任見到細文在地面狂奔，自然跟著上來中一樓層責罰，但見到導演等校外人士，還是先行了解，而大律師亦到附近借電話報警，Zoe開始察覺到事態嚴重，開始大哭起來。訓導主任向在場各人了解事情原委後，亦主動致電附近警署說明事情經過。
訓導主任向牛導演說：「導演，希望你的拍攝工作不會影響到學生的校園生活。」牛導演回答：「其實我都好無辜的， 你知啦，個個女仔都想搵我拍戲，連入面自稱楊過的男仔都想加入埋。」訓導主任望向細文，細文否認。 文文等幫忙解釋：「訓導sir，我地無騷擾導演拍攝，係呢個女仔響外面走入來搏...唔知搏乜。」訓導主任跟Mikaela 說：「小姐，妳要跟我到校務處。」Mikaela先是不願，但訓導主任說要聯絡她學校，她也只得跟從。而大律師則留在中一樓層，等待警察來到。
過不多久，Mikaela匆忙從校務處上來，跟大律師說：「妳代我等警察到來，我學校的Miss要過來接我走。」轉身前不忘指著Zoe：「記住唔好放過呢個。」文文看不過眼：「小姐，係妳想帶人走先刺激到個𡃁妹。妳校內Miss都要知道呢件事。」Cindy聞言便立即走往地面樓層，將事情傳開。
文文繼而發揮神婆本色：「小姐，拍戲做情侶都要好似現實咁要有緣分，夠唔夠膽跟我入九龍城寨見我姑媽，等佢幫妳算下同我細佬夾唔夾。」Mikaela指了指細文：「佢會唔會一齊入去？」文文：「佢年紀太細，妳入去先啦，接著要細文拿出學生手冊，輕力撕出他的學生照，說：「佢用張學生相算住先。」Mikaela 見本校的老師快要到來：「一言為定，妳出門口同我工人聯絡，到時見。」說罷便快步往校務處走去。
到band 5學校接走Mikaela 的校內老師是她中六的班主任，Mikaela 見到班主任，不說別的，只說：「班主任，我俾呢度一個女生襲擊，依家等緊警察來，班主任聽後大為緊張:「有記者在外面，小心說話。」接著警員到場，連同校內的訓導主任，一行人等又回到中一樓層了解事件。沿路的本校學生見到Mikaela，都投以異樣目光，看來事情已經傳開。
到了中一樓層，在場各人都向訓導主任及警員講出事情經過，包括Mikaela 要強行拖走細文，細文的女班長Zoe用力拍打Mikaela 等，這時在校外的記者已趕上來向警員說：「阿sir,呢位小姐其實有拐帶嫌疑。」文文和Cindy在旁大叫：「九龍塘呀！」即時被訓導主任禁言。警員見細文在課室中，先放下這件事，便繼續處理關於襲擊的舉報。
警員見Mikaela 並沒受傷，便建議校方自行處理，訓導主任責令Zoe向Mikaela 道歉，Mikaela 在自己班主任的壓力下勉強接受，事件勉強平息。警員和記者便先行離去。
Mikaela 帶著班主任見記者，並表示導演已正式錄用她，班主任本身也是導演的影迷，連忙到牛導演面前道謝。牛導演回答：「miss, 我未正錄用妳學生，只係叫佢過兩日再來面試，我想睇下妳學生打排球的表現。」轉身向著排球隊員Cindy說：「女仔呀，妳地準備同呢位小姐打一場排球，妳地排球隊員已經係我公司嘅特約演員啦！」Cindy即時破涕為笑，滿心歡喜，文文趕緊把消息傳開，留在校園內的學生傳來一片歡呼聲。
這時校園下午四時五十分的清場鐘聲響起，Mikaela的班主任向導演表示道謝後便先行離開，隨行的大律師向Zoe說：「細路女，好戲在後頭。」Mikaela低聲說：「俾律師信佢。」三人便快步離開校園。文文還是不放心， 親自帶細文去巴士站直到他上車。自己和Cindy 再離開。
就在這時，剛才被架走的小電影導演躲在雜草旁，看著Cindy青春的身影，心裡另有一番盤算。