追求演藝的Mikaela: 08

牛導演嚴肅起來：「老實講，妳扮緊嗰個㗎妹係一名歌星，佢半年前已經死咗，香港都有新聞報導。」在旁的細文拿起一本介紹日本社會文化的圖書，揭開那一則新聞給導演和Zoe看，導演對細文笑說：「俾啲心機讀書，你大個仔可以去做資料搜集。」細文點了點頭，然後回到自己座位
Zoe 向導演說：「既然全世界都知，咁仲點樣去呃人？」導演輕輕啪了一下響指：「妹妹仔，妳問得好，有聽過一樣嘢叫 White Lie 嗎？」Zoe 搖頭表示不明白，望向細文求助，細文也是不明白，就從書包拿出字典分開兩個字來查閱，但細文所用的是字典而非辭典，查閱的結果是：「白色謊言」，並不明白當中意思。
導演笑說：「一知半解。」問細文：「你覺得事實重唔重要？」細文答：「重要。」導演搖搖頭，示意細文安靜，然後繼續向Zoe解釋：「其實人係唔鐘意現實，佢地只會去睇自己想睇到嘅事，聽自己想聽到嘅事，所以先至有小說同電影。」
牛導演雙手各拿出一張頭像硬照向著Zoe：「只要我將妳的相片交俾嗰位傷心嘅有錢人睇，然後同佢講個㗎妹未死，而係來咗香港跟我拍片，我敢肯定，佢一定會相信我嘅說話，而唔係相信新聞報導。」Zoe 問：「如果呃到嗰個有錢人，咁會咩好處？」導演望著Zoe,眼神帶點輕蔑說：「老實講，我係想佢投資拍我部電影，所以先要𠱁佢開心。妹妹仔，妳唔好咁快諗有咩著數好唔好？」
Zoe似乎察覺不到導演的不高興，而且還向導演開出條件：「咁我而家俾人告緊民事官師，如果我幫你去呃人，你會唔會幫返我？」
牛導演這時臉色一沉，用力拍著學生桌面，凶惡地說：「細路女，妳屋企人做咩工作？」Zoe大吃一驚，但還是細聲地回答：「阿媽做侍應。」導演：「喺邊間茶樓做侍應？」Zoe 回答：「夜總會。」然後說出了尖東某間夜總會的名字。
導演生氣的的點了點頭：「原來係咁，妳阿媽算係半個舞女，難怪妳咁識問人攞著數。」
Zoe 一直只跟班內的同學說自己的母親是做侍應，同學們都只會想到她母親是茶樓侍應，直到現在被牛導演追問下才說出真相，細文、阿Ken、何文田等都在議論紛紛，說難怪她最近生活條件好轉，搬入屯門新建成的居屋居住。阿Ken更悄悄向細文說：「話就話侍應，其實要做舞女的替工㗎，好多女人做替工耐咗都做埋舞女。」
牛導演繼續用嚴厲的語氣向Zoe說：「妳依家係要幫我做事，係要聽我命令，而唔係同我講條件。」在旁的何文田也附和說：「同老闆講條件會即炒㗎。」導演笑著跟Zoe說：「嗱，妳聽到個太子爺點講啦。」然後擺手示意叫何文田坐下。Zoe極不放心地問導演：「呃人始終唔係咁好。」在旁的細文說：「呃人會穿煲㗎。」導演笑了笑：「等佢出左錢投資我部電影再穿煲就無所謂啦。」細文聽後滿腹疑團。而稍有江湖閱歷的阿Ken則悄悄跟細文說：「呢啲好似叫老千局呃人上當俾錢。」導演聽到後並不發怒，反而向阿Ken說：「你咁講其實係知啲唔知啲，做生意係要𠱁個客開心㗎。」阿Ken和細文聽到導演解釋後還是不放心，而何文田察覺到導演要Zoe參與騙局，直言要去校務處報警。
這時走廊上傳來Mikaela的聲音：「邊個激到導演咁嬲呀？」語氣帶著笑意，似是明知故問。Mikaela到了課室門口就問：「導演做咩咁嬲呀？」何文田座位最近課室門口，直指著導演向Mikaela 說：「佢呃人呀。」然後將導演的計劃向Mikaela 說了一遍。




Mikaela 聽後假意回應：「唔得，呃人點得㗎！」然後拿出沉重的白色手提電話，向何文田說：「我問一問律師先。」離開課室前還是問了導演一句：「導演，有無我份先？」怒氣未消的導演起身步向課室門口，然後用力把課室門關上。
Mikaela 沒趣之餘只好步向走廊盡頭和律師通電話，因為手提電話的 接收實在極不穩定。
牛導演返回座位跟Zoe繼續說：「細路女，妳唔使咁多疑問，妳依家係我下屬，照我說話做就得，我唔會叫妳去做啲犯法嘅事。」Zoe指了指何文田：「佢地覺得我犯法，仲話要報警。」導演苦笑：「睇來我都要請個法律顧問，問下佢意見，妳同其他同學都唔使擔心犯法。」這時Zoe和其他同學聽到導演的說法，才稍為安心。
Mikaela 與律師通話完畢，推門進課室向Zoe說：「喂，細路女，妳都係認命去廟街算啦，律師話妳咁做一定犯法，要坐監㗎。」Zoe 發怒：「邊個係細路女？」Mikaela大叫：「妳未成年㗎！」牛導演意Zoe不要回應，並向Mikaela 說：「小姐，我都會請個律師來問下意見。」Mikaela 聞言，立刻離開課室，然後又拿起手提電話與律師通話。
數分鐘後，Mikaela回到課室對導演說：「導演，我律師話𠵱家過嚟同你傾下。」又指著何文田、細文和阿Ken等人：「你哋唔好放學住，律師有嘢要問你哋。」三人聽罷，心中都是一驚。