萬金油與孺子牛（第二季）見山無底（第三季連載中）: 36
隔了一夜，TY情況穩定了，可以去探TY，我也通知了Flora。
我和Kerry最早到，她一直坐在TY床邊的位置。閒聊一番之後Donald、Ken少、Rachel陸續到來，最搞笑途，他們每一個都是買蘋果過來。TY現在看到蘋果，也似乎很怕。
「今日咁齊人咁熱鬧啊？Flora你都黎咗～」
Flora來的時候，我和Donald翹着二郎腿坐在沙發上，Kerry和Ken少在TY的左右兩邊，床尾還有Rachel。
TY笑著望向Donald回應他：「哈哈哈…估唔到而家到我瞓喺張床度…」
「TY你點啊？見你面色好似好啲。」Flora走到Rachel身邊問候他，放下了一袋蘋果在床尾的桌上。他們看到這袋蘋果很驚嚇。我心中真的很想偷笑。
「Flora有心啦…今日好好多。」
Kerry在切蘋果，Ken少在吃蘋果，Donald和我面前的茶几上，已經擺放了二十幾三十個蘋果。
Flora邊半掩嘴偷笑，邊說：「唔好意思啊TY…我…我唔知你哋買咗咁多蘋果……」
我們所有人都在忍笑，只有TY一個笑不出。
「你哋真係太夾啦…Donald、Kerry、Ken同Rachel，都係買蘋果俾我…」TY苦笑：「其實我喺你哋心目中，係咪真係咁鍾意食蘋果？」Donald和Kerry忍不住，笑了出來。Flora保持禮貌和斯文地偷笑。
「你哋今日一人同我食三個蘋果先好走，知唔知啊？」TY掃向我們所有人。
「切緊切緊…」「食緊食緊…」Kerry和Ken少幽默地說。
「TY哥你冇事呀嘛！我聽Donald哥講話你今日好啲，就買咗啲你鍾意食嘅蘋果過嚟探你……」門外來了一個不速之客，Marcus，和一袋日本蘋果。「嘩咁多人嘅？Donald哥、Michael哥、Ken哥、Rachel姐、Flora姐、Kerry～你哋約埋㗎？」
「Flora姐！你都買咗蘋果？」他走向Flora又望向Donald前面的茶几，他立刻嚇到手上的袋都掉在地上：「哇黐線㗎？30幾個蘋果…」
「Marcus，所以你嘅心意，我心領啦…」TY苦笑，然後所有人在忍不住，一起笑了。
「好啦！你食唔晒嘅我就幫你拎走啦！」這裏最直接的人應該就是Marcus。他會將我們不明說的話放上枱面。
「Marcus，做得好好！」「多謝Donald哥！」他是真的洋溢笑容。
「Flora姐，我可唔可以食一個你買嘅蘋果啊？」他望向Flora的目光，真的太明顯了。
「你隨便啦Marcus～」
他似乎有點小開心，拿了一個Flora買的蘋果便在旁邊的鋅盤沖洗。
「Marcus，一個蘋果咋喎？」Ken少故意問。
「唔同～～佢係Flora姐買嘅～」他站在Flora身邊大口吃著，又補充：「Flora姐無論係做生意、打扮、揀咖啡定係揀嘢食，眼光都係咁獨到。」Marcus…他真的表現得一點也不像和我差不多年紀的人。
「Marcus，你太多啦…」Flora苦笑。
「我講真㗎！你上次請我飲嗰兩包藍山咖啡係真係好好飲，我已經飲晒啦…」
「咁快？你有興趣嘅話，問吓阿Ken有冇興趣買返啲放公司？」
Marcus雙眼發光定望向他的大老闆Ken少。
「邊隻咖啡啊？」Ken問，Rachel和我也好奇：「send埋比我。」
她把咖啡照片發給我們三個，又給TY看。
原來是這款。林泳昕放在業務發展部的藍山咖啡，是Flora喜歡的咖啡……
「嘩，你哋個個都咁嘅反應嘅，關Kerry事㗎？隻咖啡係咪有咩問題啊？…」Marcus真的非常直接，不放上枱面的話，都說了出來。
「哈哈哈……」TY看了眼我，又望向Kerry。
「做咩你笑到咁嘅TY哥？」Marcus追問，又問Kerry：「Kerry，佢哋望住你，係咪因為你都鍾意呢隻咖啡啊？」
「咳…嗯嗯嗯…」原本在喝Rachel倒的茶的Flora，咳嗽了。
Kerry一直眼光只在蘋果和TY身上，似乎沒有看Flora。
不過Marcus這句太有趣了。
「哈哈哈…」「哈哈哈哈…」TY和Donald同時哈哈大笑，都在望向Flora。
這裏釋出了一個資訊：Donald似乎知道TY的佈局和Flora有關係。一直以來，Donald只是和我提過地皮的事，我們沒有討論過TY佈局的其他東西，包括Kerry。
如此一來，Donald其實知道的，比我想像中多。
Kerry耳朵有點紅，但繼續切着蘋果說：「普通咖啡咋嘛～Marcus，唔好大驚小怪啦～你有興趣嘅，下次我有個以前做marketing嘅朋友，而家係日本一間咖啡豆公司做marketing head，我叫佢寄啲sample俾你試吓…」
「果然係Kerry姐！33歲就坐到恆榮marketing head，你真係我哋偶像～」Marcus說。
「你偶像唔係Flora咩？」Ken少說。
「Flora姐係No.1～」他滿意地微笑，望向Flora。Flora也驚喜地微笑：「多謝你喎Marcus~」
Kerry似乎掃了他們一眼，至於這一眼、這一表情是真實反應，還是演技。我不敢想、不敢說。要知道，林泳昕是一個深不見底的人，之前日本的佈局，她講一句分手，是一絲牽掛也沒有。她的城府、佈局，幾乎可以用「完美」來形容，幾乎無人能敵。我其實也懷疑過她之前的失控，並非真的失控。可惜，我找不到證據。
她的佈局其實和她下象棋的策略是一樣，你以為自己在佈局，當你發現的時候，你已經身陷她的局中。你越覺得自己摸到她的邊界，就越發現這不是她的邊界。
我想起一個戲劇大師，史坦尼斯拉夫斯基。這個世界最頂級的演員，就係讓人分不清到底孰真孰假。它可以將生活融入演技，將演技融入生活。每一個眼神和表情，可以是真的，也可以是故意利用的。林泳昕，可能已經是「史坦尼斯拉夫斯基級別」。