成長的天空 - 復活節篇: 留堂

今日係學校復活節長假嘅第一日，依家，我坐咗喺學校 1B 嘅課室，對住肥楊 (我嘅班主任兼數學阿 sir！)。喺我枱面，係一大叠要做嘅數學功課！

放假先嚟罰留堂，唔通連個天都唔鍾意我？

「留堂又有乜好驚喎，希望在明天吖嘛！」心裡面有把聲音咁同我講！

點解我放長假都要留堂？是咁的……

自從 Heidi 師姐返咗英國之後，我哋就再冇聯絡。我雖然有 follow 佢嘅 IG，但佢冇乜更新個 IG，所以我都唔係好知佢嘅近况。



好掛住你呀，Heidi 師姐！

(我同 Heidi 師姐嘅故事，可睇返《成長的天空》。)

嗱，我有聽 Heidi 師姐話㗎，我有努力發奮㗎！之前經常欠交功課，一星期留堂四、五日。近來我啲功課交(抄)得幾齊，已經好少留堂。

但係，好景不常，唉！……

最近數學幾個 chapter ，肥楊教埋嗰啲咩嘢平行線呀、等腰三角形呀、相似三角形呀咁，做功課又要抄題又要畫圖，又要計數又要寫理由，見到條數個圖都想暈！就咁，我呢排欠咗肥楊唔少功課，加埋最近啲 quiz 又肥鬼晒，搞到佢老人家罰我……復活節假期……都要返學留堂呀！



我要放假呀！我要打機呀！放過我啦！