上個世紀末的一些人和事: 第十一章 | 你有我哋

放榜嗰日，烏雲密佈，跟一眾學子心情一樣。
 
攞咗成績，大家各自過咗一個漫長又混亂嘅下晝。
 
黃昏時分，不約而同又返到籃球場，
之後一齊行上天台。
好似只有呢度，先可以消化一切。
 
阿玲同阿豪都有書讀，升入中六；
瑩瑩阿敏成績一般，與其重讀，不如先做嘢幫下屋企；




阿俊想入體院，但係裏面唔教籃球，所以亦考慮先搵工；
細強冇達標，索性講明唔再讀，聽老竇話去學泥水；
肥仔輝考得麻麻，但反而笑得最輕鬆。
 
冇人特登恭喜，冇人特登安慰。
 
「原來真係會咁樣分開。」
瑩瑩輕聲講。
 
有幾滴雨，但大家都繼續坐低，陪住身邊嘅人。




 
就喺呢個時候，阿俊抬起頭，
望向對面樓嘅天台。
 
「喂……你哋睇下。」
 
——
 
對腳點解帶咗佢上嚟，佢已經唔係記得。
 




佢只係記得，攞咗張紙之後，
個世界離開咗佢。
 
佢諗返起，細個嗰時，遲到記過，比阿爸趕出走廊，隔離鄰舍睇住，
嗰種比人拒絕同奚落嘅感覺。
 
不過，今日，係放大咗無限倍。
 
之後嘅一個鐘，佢對腳帶咗佢返屋企，一如住常——
一個只有佢自己嘅屋企。
 
佢記得，佢除咗對鞋，換咗條褲，
跟住已經企唔穩。
 
張紙離開咗佢隻手，飄降落床，




佢都冇力再攞返起佢。
 
噚晚，佢燙好校服，諗住今日，可能有記者係學校，
佢會上鏡。
 
而家……
 
——
 
天台圍欄旁邊，企住一個人影，
上半身仲著住校服，下半身係短褲拖鞋。
 
佢慢慢爬咗上圍欄，
風一吹，件校服裇衫向後揚起。
 




「係……阿誠？」瑩瑩認得出。
 
「佢應該唔係……」阿豪冇講完。
 
大家都明。
冇人再坐。
 
佢哋一齊跑落樓，入去對面大廈大堂。
搭升降機嗰陣，冇人講嘢，
只聽到自己心跳。
 
——
 
上到天台，風好大。
 




阿誠聽到聲，慢慢轉身，
雙眼通紅，但冇喊。
 
「你哋唔好過嚟。」佢聲音好輕。
 
阿俊第一個停低，舉起雙手。
「我哋唔過嚟，留係𠵱邊，得唔得？
我哋只係想同你傾下。」
 
阿誠苦笑。「有咩好傾？我考成咁，連自己都交代唔到。」
 
阿玲向前一步，但仍然保持距離。
「你知唔知，我哋今日都係有啲人有書讀，有啲冇。
但冇一個人覺得自己贏晒。」
 




「你哋唔同！」阿誠突然提高聲線，
「我一直都係成績最好嗰個！我唔應該失手！」
 
風聲之中，肥仔輝慢慢開口：
「我成日讀書唔好，但我阿媽都仲會煮飯俾我食。
你屋企人……都會一樣。」
 
阿誠怔住，大聲儍笑。
 
「有好多你哋奉旨嘅嘢，我都冇。而家連最後一樣我以為我有嘅嘢，都冇埋。」
佢把聲好似幫佢流緊眼淚。
 
陳sir唔知幾時上到嚟，佢仲著住裇衫西褲，企喺後面。
 
「阿誠。」佢語氣好穩，
「你而家覺得自己跌得好重，因為你條路一向都好直。
今次跌一跌，唔代表條路冇咗。」
 
阿豪接住講：「我哋啱啱喺度講，將來未定。
但至少……今日仲可以一齊坐低，
我哋都想，你都同我哋，一齊坐。」
 
大家點頭。
 
阿誠望住佢哋，一個一個，
同樣喺屋邨長大嘅面孔，
有住同樣不知所措嘅神情，
心情同自己，可能不相伯仲。
 
又一次，佢感覺到被需要、被留意、被圍住。
 
—我有用。
—我有人理。
—我唔係包袱。
 
佢慢慢退後一步，然後跳返落天台地面。
 
阿俊即刻向前，但冇掂佢，
只係企喺佢身邊。
 
「嚟啦，落去。籃球場仲開燈。」
 
阿誠望住地下，點咗下頭。
 
呢個夜晚，一班少年，
用彼此嘅存在，
拉住一個差啲跌落去嘅人，
同時佢哋亦都拉住咗自己。