鄰家少女: 七月十四

成個暑假係咁落雨，今日終於好天，可以同班 fd 踢返場夜波。對住班六、七十歲嘅老波骨，我哋呢班打壞後生，好辛苦先贏到 2:1。好耐冇踢全場，好鬼攰，成個散晒，但係好爽呀！十一點幾，响 7 仔同班 fd 飲完嘢吹完水，我哋就各自返歸。

我同老頭、老媽子三個人，住响大圍田心一間兩層高嘅老舊村屋，附近環境都幾清幽㗎！球場就响屋企附近，唔使十分鐘就行到返屋企。老豆同老媽子早幾日去咗遊輪假期玩二人世界，下個禮拜後先返。咁呢個星期，我就無王管，可以無拘無束咁，想點玩就點玩，玩到幾夜就幾夜嘞！

頭先鬥波嗰陣班大叔話，今日係農曆七月十四鬼節正日喎，叫我哋踢完波就唔好周圍去嘞，要早啲返屋企！……挑！嚇鬼咩！……

去到屋企門口，插咗鎖匙準備開鐵閘之際，突然一陣陰風吹埋嚟，我成個人震咗吓！……

我仲感覺到……有啲嘢……捉住我隻腳！……



鬼掹腳？……

我嚇到個心離一離，……唔係咁猛下哇！？……

我向下望一望，响昏暗嘅街燈映照下，有個長髮披面嘅女人 (定係女鬼？) 捉住我隻腳踭！……

冇咁猛嘅！…….定啲嚟！……

我再定睛望落去，個女人身穿紅色背心上衣，牛仔短褲，腳踏白色 Nike Air Force，孭住個手袋仔，坐咗响我屋企門口。



有腳㗎喎，即係唔係污糟嘢啦！……

我踎低，望真吓，……依？……佢咪係住响隔離屋嘅婷婷姐？……佢成身酒氣，似乎貓咗喎！

「姐姐！……」我輕輕推一推婷婷姐個膊頭，佢對眼半閞半合、目光散漫咁，望咗我一眼，跟住又再耷低頭瞓返！

「嗹……嗹……」我走去婷婷姐屋企㩒門鐘。

幾分鐘都冇人應門，佢屋企似乎冇人。我摷吓佢個手袋仔，有銀包、電話、紙巾，但係就揾唔到門匙。佢應該係冇門口入，坐响我屋企門口瞓咗。



响七月十四、鬼門關大開嘅晚上，冇理由俾個飲大咗嘅單身女仔瞓响街度㗎？容乜易俾啲惡鬼捉走㗎！……唔好理咁多，扶佢入我屋企先。

「姐姐，起身喇！……」我踎低，搖吓婷婷姐個膊頭，佢有少少反應。

我將佢隻左手臂搭住我膊頭，用右手攬實佢條腰，將佢成個人扚起。嘩！佢都幾鬼重，……佢身上嗰陣酒味真係好臭、好難頂！……我用另一隻手扭鎖匙開門，將婷婷姐半扶半拖咁搬咗入屋。