《距離》

01 親吻

地點：課室
時間：放學後 5:00pm

浠文喺林sir前，鼓起勇氣，遞上情信：「林sir，我好鍾意你！」

「呢度要閂門喇。你都快啲離開。」林sir扮睇唔到，繞過佢，準備離開課室。

但係浠文捉住林sir手臂，死都唔放過佢：「我好認真㗎，我真係鍾意你，唔係玩玩吓。」





林sir停住腳步，沉住氣：「咁我都認真同你講，我係唔會接受你。」佢輕輕甩開浠文嘅手，但係被浠文反握住掌心。

林sir望住佢哋拖住咗嘅手，佢自己心底裡都好激動，但理智話佢知「唔可以」。

浠文窮追不捨，聲音帶啲不忿：「我唔信你對我冇感覺？」

林sir再次甩開咗佢隻手：「我冇。」佢回應嘅時候，眼神閃縮，內心都顫抖住。不過，佢決定咗要做呢個狠心嘅角色。

浠文衝上前抱住林sir條頸，拮起腳尖，精準咁錫落林sir度，嘴對嘴，透過呢個吻，將所有愛意傾瀉出嚟。





林sir嚇咗一跳，唔知點反應，成個人都僵住咗。浠文慢慢細味林sir嘅雙唇，然後用舌尖強行撬開佢嘅防線，瘋狂掠奪佢口中嘅氣息。

兩人忍唔住纏繞咗幾秒之後，林sir忽然清醒，瞬間抽身，嘴唇離開浠文。親吻嘅衝擊，令林sir激動到胸膛上下起伏：「浠文⋯⋯唔得⋯⋯」

「點解唔得？你明明都鍾意我！」浠文要衝上前，錫多次林sir，明明頭先佢係有回應，佢就唔信林sir唔鍾意自己。

但今次林sir有防範，所以避開到。不過佢知道佢哋已經過咗界，於是輕輕推開浠文：「請你記住，我係你老師。」然後佢毫不留情咁轉身離開，淨返浠文一個喺度，呆呆咁望住林sir嘅背影。

浠文眼泛淚光，垂手緊緊捉住校裙，裙腳跟隨住手，輕輕顫動。





——