《深夜霖時信箱》📮: 📮【千瘡百孔，未必是被傷害，而是內耗至腐爛而不自知】

Hello，歡迎嚟到深夜霖時信箱，我係你哋嘅霖時郵差。
今晚既第一集，信箱仲未收到大家嘅來信，所以我決定同大家分享我一本寫咗幾年嘅簿仔。
咁呢一本簿呢我係2021年開始，當我聽到對方同我講一番好有力量既說話；聽到一句歌詞一句對白或者係網上面見到一句令我有諗法嘅字句，我都會寫低佢。
我逐啲逐啲去收集唔同嘅光，收埋喺呢本簿入邊希望自己喺低谷嘅時候佢會陪住我，燃點起一小小嘅光芒。
建立咗呢一個小空間之後，我好想同有緣份相遇嘅你哋去分享，將呢份溫暖帶俾你哋。

今晚我要分享俾大家，係本簿寫嘅第一番說話。

「想讓周圍的人感到幸福，先要讓自己變得幸福。自私不一定是不好的，要是太累就先讓自己感到幸福。」





我記得寫低呢番說話嘅時候，係我終於明白，點解啲人成日講：「要愛人、要錫人，你首先要識得錫自己。」
當時嘅我完全唔明呢句說話，究竟點樣先做到？點解佢哋會有關係？點解我一定要先錫自己，先可以去錫人哋呢？
咁當時呢我應該係經歷緊一個唔開心，當時嘅我呢喺生活上呢係搞到好雞手鴨腳，
我就發覺我冇咗愛人嘅能力冇咗照顧其他人嘅能力。
我會成日發脾氣，我會好容易忟憎，因為我覺得好攰我已經冇心力去再理解對方好好處理任何事。
嗰陣我先突然明白：原來當連自己都唔諗自己感受。
唔擁抱自己嘅時候，你係做唔到任何嘢嘅。包括去錫、去照顧你身邊所有你重視嘅人。
因為你已經太攰。
嗰陣我成日都會孭埋人哋嘅責任，所以成日都覺得好攰，咁當然我不自知啦。
  




咁嚟到2026年嘅今晚，
我再睇返呢一句說話呢，我係覺得呢番說話其中一句「自私唔一定係唔好」，
應該改為自愛唔係唔好嘅嘢。自愛係必須既 。

曾經小郵差就係一個覺得自己唔需要自愛，自愛係自私嘅。
我會覺得為對方我所重視嘅人去付出，去傾倒我嘅心力。
咁係應該嘅 ，因為我愛佢地。

但係當我自己千瘡百孔嘅時候，我就發覺原來唔係咁樣嘅 。
我曾經都睇過有一句說話善良我哋要擁有，但係我哋唔可以俾佢成為對方傷害自己嘅一把刀。




咁千瘡百孔唔一定係被傷害，除咗有機會被唔珍惜被傷害之外，
好多時都係你用盡晒所有嘅力氣去愛人，你冇去愛自己然而你自己已經筋疲力盡你唔知，
直至到你冇辦法做任何嘢。
愛有好多種 聽落好抽象，但係舉個例就係當你去照顧對方付出心力嘅時候，同時間你亦要保留一啲力量去照顧自己個心 。
好好去了解自己到底想點樣做然而去保護自己。
咁你先會維持到一個感到幸福嘅自己去照顧對方帶你嘅幸福帶俾身邊既人，呢種都係其中一種愛。

喺呢一個人生旅程入邊可以相遇，同大家一齊分享吓自己喺一個人生小旅程當中嘅經歷或者一啲小得着。
我覺得我擁有好大嘅幸福感，因為呢一刻我係好難得做緊自己想做嘅事。

如果今晚嘅你聽完今晚小郵差俾你嘅呢封信，
希望可以畀到你少少力量同溫暖。
如果你嘅筆記本或者腦海入面，都有咁樣一句陪伴過你嘅說話，
歡迎點擊連結，https://docs.google.com/forms/d/e/1FAIpQLScYbAWxoZDT8JD5skj2We8WcZcVnWH-mzfxFagPOS_yk9gtzQ/viewform寄信畀我同我分享。
今晚先到呢度，祝大家有個好夢，晚安。