鄰家少女 --- 第二季: 體育堂

第二日，有 PE 堂，可以著 PE 衫 (即係社衣) 返學，又可以著波鞋，感覺輕鬆舒暢。

好唔容易咁，先捱完晒上晝嘅六堂中英數，lunch 後兩堂就係 PE。放學前上 PE 最爽最正，可以落咗堂繼續玩、玩耐啲，又唔使怕玩到身水身汗，成個人臭崩崩咁上其他堂。

由於我班人數全級最少，只有 28 人，所以學校只安排一位 PE 老師，唔使男仔女仔分開上堂。教 PE 嘅係個大肚婆 Miss Lam，三十零歲嘅靚太，佢佗住籮咁大個肚，好似就快生得嗰隻。

Miss Lam 粗身大細，點完名，就坐埋一邊，俾我哋自由活動。正呀！……

我同幾個男仔，立即攞咗個足球去手球場踢波，有啲男仔女仔一齊打籃球射吓波，有啲女仔响室內操場 (即係 canteen) 嗰度打羽毛球，有幾個坐响 canteen 長櫈發吽哣！……



我踢波嗰度有九個男仔，正想搵多個男仔加入，可以玩五對五，忽然見到印度妹跑埋嚟！……

「摻埋我踢，五對五。」印度妹踩住我哋個波响地下度搓咗幾腳。……

「你？得唔得㗎？」肥滔好懷疑！……佢行埋印度妹度，想搶走個波……

印度妹一嘢扭過肥滔，推個波出去，响手球場嘅中場線，向住手球龍門大腳一抽！……

「砰」！……



個波中柱彈出！……

「屌！……爭少少！」印度妹一臉失望表情，粗口衝口而出！

「嘩！」不過，我哋一班男仔，俾印度妹呢腳波，嚇到擘大口得個窿！……

就係呢腳射門，已經夠晒資格一齊踢啦！跟住我哋猜包耷分隊打五對五，印度妹响我嗰隊。佢有速度、有腳法、射門砰砰聲，防守欄截又到位，印度妹幾乎可以一個打五個咁滯，結果我嗰隊輕鬆贏 4:0！……

見到印度妹踢得咁勁，其他同學都停咗自己玩緊嘅活動，走去手球場邊觀戰同打氣！……



落咗堂，印度妹、我同幾個同學响 canteen 飲嘢吹水。……

「戴安妮，好波喎，你以前踢開波㗎？」肥滔啜咗啖檸檬茶，再冇質疑印度妹實力。

「上年我响學校踢女子 C Grade 嘅，最尾嗰場輸一球，結果只係得亞軍。……完場前我射咗球中柱波，好似頭先咁，如果入，我哋就係北區冠軍！」印度妹娓娓道來，個樣仲係好唔憤氣！「我要走喇，下次再踢過。今日好開心！」

印度妹孭背囊起身就走。……我忽然諗起啲嘢……

「喂，印度妹！等等……」我追出去，去到學校門口叫住佢。……

「我有名㗎，高~志~輝~！」印度妹掘住我，語氣有啲嬲！

「阿咩~呢？……戴安……娜？……呀唔係……定係……戴安妮？……係，係……戴安妮！……」我好尷！噏咗好耐先噏到印度妹個名！

「請問，有咩事呢？」印度妹見我仔焦急，佢反而笑咗出嚟！……



「星期六晚……得……唔得閒？……」我好緊張，講到一舊舊！

「你想……約我……去夜街？」印度妹擰側面睄住我。……

「唔係唔係！……唔係去夜街，係踢波，踢夜波！」我想揾埋印度妹同班老嘢鬥波。「我班 fd 約咗班老波骨星期六晚鬥波，我嗰隊有個 fd 拗咗柴未好返，依家唔夠人踢，想搵埋你嚟一齊踢啫！……好唔好？」

「我踢？……得唔得㗎？……你班朋友 OK？」印度妹似乎有興趣加入！……

「你咁勁，佢哋一定冇問題啦！……」我向佢豎起手指公！「嗱！約實你，星期六晚，八點半，田心村足球場。」

「好，到時見！」印度妹轉身走，遞起右手，做咗個 OK 手勢！……