鄰家少女 --- 第二季: 下午茶

跟住嗰個星期，都係如常咁返學，如常咁欠吓功課，如常咁上堂瞓吓覺同俾阿 Sir、Miss 罰吓企，咁囉！……

以前返學，真係覺得好無聊！返學等放學，星期一等到星期六、日踢場波！……不過依家，上堂可以聞到咖喱味，見到印度妹，咁又有返啲動力喎！……

印度妹真係好認真上堂，佢好似當同我濕吻單嘢冇發生過咁，响學校佢對我一如以往咁冷淡，冇乜睬我。……

都好嘅，俾班 fd 知道我同印度妹有曖昧，實俾佢哋唱，有排玩、有排笑！

今日放學前上 chem，落堂前，印度妹同我兩個，一齊响鋅盆清洗儀器。



「我放咗盒 peni puri 响你書包，請你食！」印度妹細聲同我講。

咩呢話？……咩嚟㗎？……落到課，印度妹已經走咗。我摷吓書包，有個粉藍色食物盒仔。正想開嚟睇睇，見到課室仲有好多人。……嗯~……都係返屋企先，費事俾班 fd 見到，俾佢哋笑！

返到屋企，打開個食物盒，入面放咗四粒大過乒乒波少少嘅炸球，好似煎堆仔咁。炸球上面有個開口，入面釀咗啲啡黃色嘅餡料。

我攞起一粒，一啖擺晒入口，……嗯~……外皮香脆，啲餡有咖喱味，又香又鹹又辣，粉粉哋，……嗯~……好好味！

Google 吓呢啲係乜家伙先！我用電話對住剩返嗰三粒炸球，用 Google 搜尋吓：



「呢啲係印度嘅傳統小食 Peni Puri，……」

哦，原來係印度煎堆！

我開罐可樂，食埋呢三粒印度煎堆。……嘩，正呀，呢個下午茶！

「~~」個電話提示震咗吓。

係個 whatsapp 短訊：



「死仔，呢個星期六下晝嚟我屋企，姐姐同你補習，補 bio，reproduction，仲有，會補到好夜㗎！」

係婷婷姐呀！……好耐冇見佢喇！……

咦，咪住先，補習？……補 Bio？reproduction？……我冇修 bio 喎！

Yeah！婷婷姐同我補習！……係 reproduction 呀！……