呃Like 呃出人鬼戀(完): 番外：另類嘅悲劇結局？

老麥出嫁篇？

「媽媽......媽媽......俾番媽媽我呀......」

拳館裡面傳出老麥陣陣嘅悲鳴。

「你有冇搞錯呀！有女朋友仲要睇埋依啲咁嘅咸片！」小宜發哂脾氣。

小宜見到老麥將電話放埋咗一邊，好奇拎嚟睇下，點知發覺，成部手機都喺入咗同一個叫做白石苿莉奈嘅AV 女優嘅片。一怒之下，當住老麥施以極刑，一條條咁刪除。





「女朋友？妳幾時做咗我女朋友架？我擇偶條件喺最少有G CUP以上呀。」老麥繼續死命咁要搶番部手機。

「依家我無咩。」小宜為咗示威，雙臂緊緊咁夾住胸前。

可惜......換嚟全場鴉雀無聲。

「哈......我明，我明，其實乳溝依家嘢，同就快用完嘅牙膏一樣，吱一吱總有啲。」老麥苦笑。

「你去死啦。」小宜好自然咁反手扣住咗老麥手腕，然後就喺......





當老麥回過神，先發覺自己全身都無一處著力點，依招喺完美嘅......

過肩摔！

成個拳館發出一下震撼嘅倒伏聲。

然後，全場哄動！

「小宜勁呀！第一個！喺第一個呀！」其中一個拳手歡呼大叫。





小宜只喺一時火遮眼，將老麥撻低，完全唔知其他人做咩咁興奮。

「哈哈，妳唔知咩小宜，依條老麥，學拳果陣好大口氣，話一世人都唔會俾女仔撻到。如果有女仔撻到佢，佢就嫁俾佢喎。」依位中年嘅拳手就喺館主，大笑住咁答。

「嫁？」小宜好奇，用反角度俯視住老麥。

老麥苦笑。

「喺呀！喺嫁！條死仔幾囂張，你幫我教訓下佢就啱。哈哈哈！」館主笑得好豪邁。

小宜雙膝跪地，用好懷疑嘅眼神盯住老麥。

「哈......哈......咁妳喺咪娶我啫？」老麥故作輕挑。

「你嫁梗俾我啦。」小宜個頭慢慢垂低。





而小宜兩邊嘅長髮亦都好似布廉咁拉下，為一對小情人遮俺住最溫馨浪漫嘅一幕。

＊＊＊＊＊＊＊＊＊＊＊＊＊＊

男神殞落篇？

小肥波唔算喺宅男，只喺間中先去一下先達皆旺。

今日佢部新三叔N99有啲問題，成日自己重開，所以佢就搭車嚟到先達，搵傳說中嘅「潮玩達人」潮哥幫手睇睇。

點知，佢一踏入先達，就即刻退番出嚟，抬頭望望招牌。

「無嚟錯喎！點解搞成咁？」





先達位置無變，只喺裡面變咗。

依家明明喺黃金時段，地下果層竟然無哂人，仲有幾間店舖拉埋閘添。

小肥波都唔理得咁多，繼續搭電梯一路上。

上到二樓果陣，突然聽到好開演唱會咁勁嘅歡呼聲。

「嘩！男神潮哥嘅魅力真喺沒法擋喎。」小肥波心諗。

點知，當佢破開人潮走近潮哥舖頭時，竟然見到佢一生中嘅女神出現！

思源！

估唔到思源聽潮哥講，做咗負離子直髮，唔再著果啲灰灰黑黑嘅道袍，換咗件米色嘅毛織上衣，加上一條連衣長裙，根本就喺女神降臨。





以前，所有人上到嚟先達二樓都喺為咗搵潮哥，但喺依家思源嚟到，潮哥嘅氣勢一下子被佢壓哂落嚟。

「嗚......思源大師，我有啲後悔將妳變成女神。」潮哥細細聲咁講。

點知，咁都俾思源聽到！只見佢毛衣一揮，竟然喺衫袖入邊伸出一支長長嘅喪門釘。

「阿潮，你頭先講咩呀？」思源眼中閃礫住殺氣。

「無無無無......」潮哥唔記得咗，思源雖然法力盡失，但喺體術仍在。

突然！全場轟然爆響！所有男子驚呼嘅驚呼，呻吟嘅呻吟，好似仲話有啲定力唔夠嘅死嚫仔被萌死入院。

小肥波亦都唔敢相信自己，可以親眼睇到改朝換代嘅一瞬。





當傲嬌屬性嘅思源冒起，亦代表男神潮哥嘅殞落。

而小肥波後來亦成為咗「思源。命。應援團」嘅中堅份子。

＊＊＊＊＊＊＊＊＊＊＊＊＊＊

東寶重組篇？

果晚之後，東寶承受番自己一身嘅罪孽，但喺咁反而令到佢豁然開朗。

東寶將東寶集團嘅所有生意，全部都交咗俾阿克。

而阿克亦都親向去咗警局自守。

由於方家唔打算再追究，再加上阿克認罪，所以法庭輕判咗佢緩刑兩年。

阿克本身嘅運勢奇高，一接手集團之後，生意突飛猛進，而且佢睇通咗新界東北其實喺一塊保育嘅好地方，所以一口拒絕咗政府嘅收地計劃。改為發展考古生態嘅自然境區。

留喺圍村嘅道堂更加被考證為宋朝遺址，後來列入咗香港首個一級文化遺產，吸引咗一班來自世界各地嘅考古學家到來。

初步計算，經濟收益，國家文化局資助，加再上旅遊業，已經大大超過咗賣地起樓嘅利潤。

其他嘅東寶手下，亦都跟隨集團重組，除哂啲黑色西裝，換上白色嘅運動裝，做起觀賞團嘅導遊。

「爸爸，你覺得點呀？」阿克推住東寶嘅輪椅。

「仔呀，你比爸爸有遠見得多。」東寶成個人瘦咗兩個圈，反而令佢睇起上嚟和靄慈祥得多。

「都喺爸爸你教導有方。依塊地喺我地祖傳，無論將來點我都唔會賣，你放心。」阿克遠望眼前青綠山丘，深深吸咗口氣。

「好好好......好好......好......」東寶不停咁念住一個「好」字，佢一生無做過咩好事，上天竟然都俾個好咁嘅仔佢，太厚愛啦。佢覺得已經無咩好牽掛，所以東寶輕輕咁合上眼廉，呼吸最後一口新鮮空氣。