和尚師傅抱女過河，徒弟反串

《 和尚師傅抱女過河，徒弟反串》

和尚抱完女人過河，行咗三個鐘山路。

個徒弟一路無出聲，個師傅仲好得戚，覺得自己頭先好有禪意。

到咗破廟門口，個徒弟突然企定，合十：

「師傅，弟子有事想請教。」





師傅笑笑口：「你係咪仲抱住個女人呀？師傅一早放低咗啦。」

徒弟搖頭：「師傅你誤會咗，弟子抱住嘅從來唔係個女人，弟子抱住嘅係你頭先無教嘅嗰堂課。」

師傅愕然：「咩堂課？」

徒弟話：

「第一，戒律堂。你抱女人過河，係慈悲，定係破戒？如果係慈悲，慈悲大過戒，咁請問條界喺邊？幾急先可以破？抱腰定抱手？眼望邊？如果無界，咁以後我見女施主跌落水，我抱唔抱都得，話之佢浸死都得，因為我話我已經放低咗。師傅，你今日無教界，你只係教咗瀟灑。」





「第二，行住坐臥堂。你抱嗰陣，手點放先唔算淫？你心點觀先算定？過咗河之後，你點樣同個女施主講清楚，免佢誤會，免佢起煩惱？呢啲先係持戒嘅功夫，你一樣無教。你只係抱完就算。」

「第三，亦係最重要嘅，為師之道堂。弟子問你，唔係因為弟子心淫，係因為弟子真係唔識，先問師傅。如果個弟子有疑問，你都一句『你仲抱住』就打發佢，咁你收徒弟嚟做乜？收嚟睇你表演放低呀？咁不如喺河邊擺個牌，寫住『老衲已放低』，我哋拜個牌好過拜你。」

「師傅，佛陀教阿難，戒律就係明燈。你今日用一句靚話，吹熄咗盞燈，然後怪弟子點解睇唔到路。你唔係放低咗個女人，你係放低咗做師傅嘅責任。」

成個破廟靜晒。

個師傅個瀟灑笑容僵咗，塊面紅到耳根，成個屎忽鬼咁企喺度。佢諗咗好耐，先至慢慢合十，對個徒弟躹躬：





「係...係為師錯。為師貪咗嗰句說話夠型，偷懶無教你。個女人，為師的確放低咗，但為師個『想扮到好有境界』嘅心，為師抱咗成三十年，今日俾你睇穿咗。」

「呢堂課，應該係咁教嘅：我抱佢，係因為不抱，佢會死。抱，係開緣。但開緣之後，就要即刻懺悔，檢討有無起心動念，手法有無不如法，再同你講清楚，下次若遇同樣事，無緊急，不得開，無惻隱，不得開。咁先叫持戒，咁先叫放下。」

個徒弟說：「 咁就算你啦 ！呢次我就唔拆你個招牌啦！ 我再畀多一次機會你 ，但下次你再係咁懶有型，講一半唔講一半， 為咗要保持好禪意嘅感覺， 就打你個屎忽㗎喇！」

師傅：「係嘅師傅……啊，唔係，徒弟。」