《青梅竹馬的婚禮》: 第十節

當晚，我只係食咗半碗飯，一方面我內心想祝賀一對新人新婚快樂，但另一方面我又唔捨得阿欣。究竟下次我哋會以咩身份再會？我抱住阿欣嘅仔女，佢哋叫我「叔叔」，我又會有咩心情？又或者，我哋根本唔會再見。
 
「克仔，食咁少嘅？出面食咗嘢呀？」賢叔問。
 
「係呀，啱啱喺出面食咗飯。」我答。
 
呢個時候老豆望咗我一眼，佢好清楚我根本未食飯。
 
隨住段影像去到尾聲，賢叔俾咗另一隻碟我，話：「克仔，開埋呢隻嚟睇啦，阿欣啲婚紗相嚟。」
 




我將隻碟放入部Blu-ray機，心中百感交雜，如果要簡單形容，可以話係不是很滋味。
 
隻碟一播，《Because of You》徐徐奏起，一對新人嘅婚紗相以幻燈片嘅形式播放，學牛腩話齋，如果背景音樂換上《First of May》，效果將會更上一層樓。
 
我驚嘆：「嘩！呢個阿欣嚟㗎？」只見專業級嘅婚紗相一張接一張咁播出，同之前段低清影像形成鮮明強烈嘅對比。
 
「係呀，唔似呀呢？」賢姨話。
 
有教堂、有草地、有山、有海，每一個場景入面阿欣都唔同髮形、唔同裝扮。我不禁將依家嘅佢同以前嘅佢作出比較，我深深明瞭，阿欣已經大個、嫁咗人，唔再係以前嘅佢，而我嘅心態亦唔應該再停留喺咁多年之前，人始終要向前望。
 




二十分鐘嘅影片播放完畢，我拋低咗一句：「我飽啦，我返學校先。」
 
「咁快走？唔留多陣先？」賢姨問。
 
「佢就考試，俾佢返去溫書啦。」老豆幫我打完場。
 
道別之後，我拖住沉重嘅步伐走到出面，外頭依然落住大雨，我撐起把遮，對住自己講，呢場雨落完之後，就由得糾結嘅心情隨住雨水一齊停止，或蒸發、或流落溝渠。我知道我哋已經返唔到過去，因為我哋已經成長、我哋已經唔再係以前嘅細路仔，時間會令我哋變得成熟，懂得喺日後懷緬過往、懂得對一段結唔到果嘅緣份一笑而置、懂得去令一切隨風而逝。

阿欣，多謝你舊時對我無微不至嘅照顧，為我送上一段段咁難忘嘅回憶，最遺憾嘅，係我唔能夠親身出席你嘅婚禮，唔能夠親自送上我嘅祝賀說話。祝，新婚愉快。
 




在此，為一對新人送上一首歌，《你的名字我的姓氏》。