Chapter 5

「『Youth in Asia』同『Euthanasia』...... Vincy 啲咁既爛 gag IQ 題都俾你估到,真係抵你有運行呀,後生女。」
Aaron 笑說。「Vincy 由細到大都好鐘意搞爛 gag 架。」

「八卦問句呀,蔣少你識咗 Vincy 好耐架喇?」Erica 問。

「哦,係呀,我以前同佢番同一間教會架,不過自從佢入咗行之後,就無再番過去喇。」






離開後台,走上了一層樓梯,三人剛踏上甲板,Nicole 就已經忍不住大喊:「嘩!個花園好大呀!個海景好靚呀!」

Aaron 一邊走,一邊向兩位記者介紹甲板上的場地設計:

「『永生號』既甲板,大約長 2000米,闊100米,面積大概有25個標準足球場咁大。不過聽日淨係會用一半面積架啫。

Vincy 佢一早已經計劃好晒個生前喪禮要點樣 set 場:

首先,個場最後方既 area 要有提供小食既自助餐,要有飲品,要好似一個 cocktail party 咁;場既中間係一排又一排櫈,要好似睇 concert 咁,啲櫈一定要舒舒服服好似戲院梳化櫈咁,唔可以係求其既膠櫈,左右兩排櫈中間又要有花叢做裝飾;





個台呢,前面要有管弦樂隊同聖詩班,又要有噴水池製造啲流水聲出黎。
上面要有個好似戲院熒幕咁大既熒幕,等後排既觀眾都睇到台上面做緊乜;

台中間要擺一張影得佢好靚好有型既大頭相。要有好多花,仲要有個好靚既水晶棺,喺儀式最後先由升降台升上黎。
呀,個輓額仲指明要寫『死不足惜』四隻大字。」

Aaron 指著台上方,輓額真的是以白底黑字,用古雅的字體寫著的「死不足惜」。

「『死不足惜』?係 Vincy 自己想要呢四個字架?」Erica 很驚訝。





「哈哈,係呀,陳校長 —— 即係 Vincy 媽媽,都勸過佢可唔可以用過啲好啲既字,例如正正常常『主懷安息』呀,『音容婉在』果啲,但 Vincy 堅持要『死不足惜』,真係無佢辦法。

你知啦,Vincy 大明星黎架嘛,佢話要咩就要咩。你知唔知要喺架郵輪甲板度,整一個升降台,要幾大工程呀,哈哈。不過,呢件係佢人生大事,咪當就下佢囉。陣間仲要等 Vincy 佢黎『驗貨』,實有排煩喇。」Aaron 苦笑。

三人在甲板上慢慢散步,那些工作人員見到 Aaron 都立即誠惶誠恐地叫一聲「蔣少早晨」,然後埋頭工作。

Aaron 望一望手錶:「我啲伙記都夠鐘放 Lunch 喇,你地兩位要唔要叫嘢食呀?我幫你地叫埋呀。不過廚房要忙住準備聽日既食物,所以可能無太多選擇架咋。」

「唔駛喇,我地頭先上船之前食咗嘢喇,唔該晒,蔣少。」

「咁我做嘢先喇,你地自己周圍行下啦。」

跟兩位記者道別後,Aaron 走向一群正在架設音響器材的工作人員。他們正播放著 Vincy 初出道時唱的一首《出生入死》作試音。

「無須要捨不得我,別以遺憾簇擁我。




留低了我就算,帶走的不多,會是你麼?

曾給你珍惜的我,在世間匆匆走過。
遲早也要踏過,承認接受,並沒如果......」


***

「你們是記者來的嗎?」一個講國語,年約五十歲,身穿樸實灰色裇衫牛仔褲的高瘦男人,微笑著走過來了。

「呃...... 對呀,我們是記者。你好,講問你是......?」Erica 疑惑的問。

「你們好呀,我是歐陽牧師。我是明天那個儀式的其中一個主禮牧師。我來看一看場地,在心中採排一下。你們來採訪真的非常好呀,我覺得『生前喪禮』這個活動非常有意義,應該讓多些人知道這個概念啊。」

「哦...... 你好呀,歐陽牧師。不過,原來明天不只有一個牧師的嗎?」





「對呀,明天會有兩個主禮牧師,一個是我,一個是鄺彼得,鄺牧師。我一陣子也要找鄺牧師一齊討論一下明天如何合作,可能是來個雙語廣播吧,呵呵。」

「聽你說普通話,你是從哪裡來的?跟 Vincy 很熟的嗎?」

「哦,我是從台灣來的,所以只懂說國語,不會講廣東話。我來自台灣同光同志教會,當年Vincy 來台灣發展,她順道想了解一下台灣的同志運動,所以我們就認識了,算是好朋友吧。除了明天的生前喪禮,我今次上船還有另外一個秘密任務。不過那個是一個秘密,你們過了明晚就會知道了。」歐陽牧師故作神秘的笑。




*****

Erica 和 Nicole 回到後台。

她們回自己房間之前,在後台走了一轉,但發現都是一間間不同人住的房間,而且全部都關上了門,沒有什麼特別。





回到房間後,二人為數個小時之後的訪問作準備。

由於這個電視訪問將會是 Vincy 在生前喪禮舉行之前唯一一個訪問,所以重要性和震憾性都不容忽視,作為負責訪問的 Erica 感到責任重大。她們早在一個星期前,已經把訪問會問的問題傳送了給 Amanda。

「呀!其實我地係咪要問下 Amanda 聽日喺甲板個會場入面,准唔准我地拍攝同訪問啲來賓?」Nicole 正在檢查拍攝器材,忽然想起這個關鍵的問題。「無理由上船淨係為咗陣間個訪問架?」

「係喎,好彩你提起啫!不如我地而家去揾 Amanda 問一問囉,早啲知道早啲準備嘛。」

二人踏出房間,開始逐個逐個門牌尋找 Amanda 的房間。


她們找到了,但發現 Amanda 的房間大門打開了,而 Amanda 似乎正在和一個男人爭論。為免尷尬,她們躲到走廊出面,卻情不自禁地偷聽起來。

「...... 總之,聽日個活動,係一個好莊嚴既生前喪禮,唔係宣揚政治理念既地方。聽日個台,係唔可以講政治。」是 Amanda 的聲音,語氣非常強烈。





「作為一個神職人員,我有我既原則。我只係想係班病友唱完歌之後,講一兩句,叫人唔好安樂死,同埋唔好支持安樂死合法化啫。」那個男人說。

「你地唱果首歌,已經可以好能夠帶出呢個 message 喇。Vincy 都好鐘意首歌呀,無話唔俾你地唱喎。」

「但係 Vincy 之後係會明目張膽咁講佢支持安樂死喎。我作為牧師,做番個平衡既觀點,有咩問題?」

「佢係講佢既個人睇法,同埋佢只係支持社會正視安樂死呢個議題,佢並無支持安樂死。」

「我覺得佢作為一個明星,佢既意見會影響好多心智未成熟既歌迷既諗法。如果 Vincy 要喺個喪禮上講支持安樂死既言論,我唔會 —— 亦都無權力阻止,始終呢個係 Vincy 既喪禮。但係,作為一個神職人員,當佢發表呢個立場之前,請容許我好有禮貌咁離開個台,以示我唔認同,但我尊重佢既言論自由。咁樣得唔得?」

「你俾我諗下,我地陣間開會一齊傾下啦。」


聽到對話完了,Erica 和 Nicole 正準備轉身回避,想不到身後突然傅來一把聲音。

「哈囉,醒目女記者,你黎咗喇。」
是一把經電腦語音合成的女人聲音。

Erica 一時心虛,嚇呆了,轉身發現原來聲音是來自坐著輪椅的大明星 Vincy!

「呃...... 哈囉,你好呀, Vincy。」

Vincy 輪椅後面,站著一位衣著雍容華貴的年老女士,她對兩位記者親切的點頭微笑。

這時,房入面的 Amanda 和那個男人走了出來。

「咦,你地喺度做咩呀?」Amanda 冷冷的問兩位記者,之後又熱情地跟 Vincy 來個深深的擁抱。


「啱喇,咁人齊,互相介紹下先。

Vincy,知啦。
我係 Amanda,頭先介紹過啦;
呢位,係 Vincy 既媽媽,陳校長。
呢位,係鄺牧師,係聽日生前喪禮既主禮牧師之一。

而呢兩位,係香港電視記者,係 Vincy 邀請上船做訪問既。佢地今晚會喺度住一晚,所以大家見到佢地唔洗緊張呀。」

Erica 和 Nicole 跟各人握手。

「好喇,Vincy 同陳校長啱啱黎到,我帶你地去間房先。鄺牧師,我地十五分鐘後,去 Vincy 間房開會,OK?你兩個做咩架?」

「哦,其實好小事啫,你地開會先喇。我地番房準備下個訪問。」