《一位明星，在自己的「生前喪禮」上死了》: Chapter 24
Chapter 24
從老總房間走出來，Nicole 臉上竟流露出興奮的神情：
「嘩！靈異題材呀，啱晒我呀！我最鍾意調查啲神怪嘢架喇！」
Erica 聽到，好沒氣地回答：「真係？咁老總叫嘅，就交俾你啦喎！我去訪問下其他藝人點記念 Vincy。」
「好！無問題！包喺我身上！嘩！調查『驅魔』喎，一定好刺激啫！仲可以訪問司徒玲玲師傅，叫佢順便幫我睇下姻緣運先，正呀！」
Erica 看到 Nicole 那份喜悅，就好像個小朋友有得去迪士尼一樣，心裡面想：
「Nicole 鐘意調查『驅魔』就太好啦，等我可以有時間全力調查 Vincy 死因。」
＊＊＊＊＊
4月4日，警察先生約 Erica 到警局落口供，順便交換一下情報。
「好多記者同 fans 都想知道 Vincy 死亡嘅真相，係咁打電話嚟警局問查成點。而家網上面嘅傳聞每日都不停增加，陰謀論層出不窮。老實講，唔單止警隊高層，連我自己都想件事快啲完。」
警察先生給自己和 Erica 各自遞上一杯咖啡，自己呷上一口，繼續說：
「其實要完嘅話，單案件而家已經可以 close file。因為已經有足夠嘅證據，證明鄺牧師就係殺 Vincy 嘅兇手。」
「有咩證據呀？」
警察先生揭一揭面前的文件。
「首先，第一，水晶棺張軟墊入面驗到有高濃度氬氣，同鄺牧師房間床邊嗰支氣樽，成份相同；
第二，鄺牧師房封遺書，經筆跡專家驗證，證實係鄺牧師親手寫嘅字跡。遺書入面佢承認自己就係殺 Vincy 嘅兇手；
第三，鄺牧師自殺時，房間的確係從入面上鎖，上埋防盗扣，所以絕對無可能係有其他人出入過房間。所以有好大機會佢真係自殺；
第四，水晶棺的確係鄺牧師代『鹽光社』送俾 Vincy 嘅。我地揾到之前水晶棺嘅設計圖，發覺個吹氣軟墊，本身唔係咁厚架，係大概三個月前改設計嘅，張軟墊足足加厚咗一倍。而呢個改動，係由鄺牧師親手簽名作實嘅；
最後，係擺放水晶棺間房嘅出入紀錄......」
警察先生從一大疊文件中抽出一頁紙，給 Erica 看。
紙上面印著：
【『永生號』上擺放水晶棺的房間的電子卡出入紀錄】
[進入] 4月1日 03:11：Vincy
[離開] 4月1日 04:06：Vincy
[進入] 4月1日 11:28：Amanda
[離開] 4月1日 11:55：Amanda
[離開] 4月1日 17:27：鄺牧師
[進入] 4月1日 17:54：陳校長
[離開] 4月1日 21:51：Amanda
警察先生繼續說：
「呢個係水晶棺房間嘅電子卡出入紀錄，人名係我對應返各人嘅電子卡編號得出嘅。
有一個事實係我已經向多個人證實過，就係生前喪禮當日嘅朝早十一點半，即係出入紀錄上面第三至四行，Amanda 帶咗全部擁有後台通行證嘅人，不過唔計你同 Nicole，總共六個人，一齊入去參觀同檢查個水晶棺。
我分別問過入過去嘅 Amanda，陳校長，Rosemary，同 Aaron，四人都話當時無留意到水晶棺有任何異樣。
除咗 Rosemary 話自己無太認真睇之外，Amanda，陳校長 同 Aaron 都好肯定咁講，話佢地六個人十二點離開房間之前，好認真咁 check 過一次個水晶棺，肯定當時係無任何膠索帶綁住軟墊個軟膠開口。Amanda 仲話肯定自己專登閂實咗個軟膠開口，確保唔會漏氣。
照咁講，即係當日上午 11:58，至到個水晶棺由後台升上舞台期間， 兇手應該曾經入過水晶棺間房，咁先可以用膠索帶綁住軟墊個軟膠開口，令軟墊入面嘅氬氣能夠順利噴出。」
Erica 看一看那張電子卡出入紀錄，略有所思的說：
「如果係咁，根據呢張電子出入紀錄，由上午 11:58，至到個水晶棺由後台升上舞台期間，即係大約晚上六點半，只有兩個人曾經入過去間房。分別就係...... 鄺牧師，同埋...... 陳校長...？」
警察先生回應：
「陳校長入去間房係合理嘅，因為根據生前喪禮個 rundown，最後 Vincy 唱歌環節，陳校長係要彈三角琴伴奏，而個三角琴就係同水晶棺放喺同一間房，到表演時陳校長同個三角琴一齊升上舞台；
但係，鄺牧師入去就完全無合理解釋。」
「我記得...... 鄺牧師應該係喺台上突然拉 banner 示威反對安樂死，被工作人員趕之後，自己由台上面走入後台。可能就係咁入咗間房。」Erica 估計。
Erica 再次研究那張電子卡出入紀錄，突然發現：
「咦？凌晨三點...... Vincy 入去做咩呢？仲留咗一個鐘咁耐喎。」
「無錯，呢個都係一個疑點。
照推論嗰個唔會係 Vincy，因為 Vincy 手手腳腳都郁唔到，點拍卡呢？
所以一係就係 Vincy 同其他人一齊喺凌晨三點入咗去水晶棺間房，一係就有人攞咗 Vincy 張卡。
而咁啱，鄺牧師入咗醫院急救之後，我地喺鄺牧師嘅褲袋入面，揾到 Vincy 張電子卡。」
Erica 聽到這個證據，第一反應是「哦！咁鄺牧師一定係兇手啦！」。
但當她再深入想清楚：
「咁...... 究竟...... 喺生前喪禮前一晚凌晨三點入去水晶棺間房嘅人，係咪真係鄺牧師呢？同埋，凌晨三點走入去水晶棺間房成個鐘做咩呢？會唔會 ——」
「無錯，我地警方都懷疑，凌晨三點入去間房嘅就係兇手，而入去嘅目的，就係要用氬氣注滿水晶棺張軟墊。
至於係唔係真係鄺牧師入去，定係兇手入咗去，之後再將張卡塞俾鄺牧師嫁禍，我就真係唔知點樣可以證實。可惜鄺牧師而家變咗植物人，唔可以提供任何資料。」
「唔......」Erica 認真的消化了剛才一大堆資料，「既然有咁多證據，都可以肯定鄺牧師就係殺 Vincy 嘅兇手，你做咩仲咁苦惱？」
「最主要有我覺得仲有兩個疑點。」
警察先生喝了一口咖啡，繼續說：
「第一個疑點，就係鄺牧師殺 Vincy 嘅動機。
點解鄺牧師要殺 Vincy 呢？遺書入面，佢話有把聲音叫佢殺 Vincy ，但佢又喺生前喪禮之上咁高調咁反對安樂死。仲要之後自殺添。
你話佢反對安樂死，但佢咁做，殺咗 Vincy，好明顯會令社會大眾更加憎恨『鹽光社』，更加憎恨反對安樂死合法化嘅教會。『鹽光社』一向稱安樂死做『合法殺人』，大力反對，但而家鄺牧師又自己去殺人？
呢個係第一個矛盾。
牧師殺完人，之後又自殺？
恕我孤漏寡聞，我真係未聽過有神職人員會自殺。佢地個教會咁重視生命，正正因為重視生命而反對安樂死。但如果真係重視生命，又點會殺人同自殺呢？
我唔識講，總之就好矛盾喇。」
「咁有可能佢真係有精神分裂加思覺失調，就好似佢封遺書咁講。」
Erica 想了一陣，說：
「我記得呢...... 當葉醫生證實 Vincy 死咗，『永生號』突然駛出大海時，當時你同 Aaron 去咗駕駛室，大家都唔知發生咩事。
Rosemary 唔太敢講佢同 Vincy 係計劃去台灣行婚禮，嗰個時刻，鄺牧師好挑釁性咁問 Rosemary 『Vincy 係唔係計劃去進行安樂死呀』，又話自己查過『永生號』嘅註冊國家係荷蘭，而安樂死喺荷蘭係合法。
鄺牧師佢咁講，好似一早知道『永生號』會出海咁，仲一早估計 Vincy 係想出海安樂死。如果係咁...... 而佢又咁反對安樂死，殺死 Vincy 黎阻止一場安樂死，又好似好合理喎。」
「唔......」警察先生沒有回應。
「咁...... 第二個疑點呢？」Erica 問。
「第二個疑點，就係你同事 Nicole 小姐發現到， Aaron 喺自己間房入面，試圖收埋一支同鄺牧師用黎自殺嗰支一樣嘅黃色氣樽。」
「係喎！我都差啲唔記得呢件事添！你喺船上面嗰陣時話等落咗船先講，以免打草驚蛇；咁而家點樣？Nicole 有無睇錯，Aaron 房入面係咪真係有一支一模一樣嘅氣樽？」
警察先生取出一幅有兩支黃色氣樽的相片。
「Nicole 無睇錯。Aaron 房入面個衣櫃，的確係有一支一模一樣嘅氣樽。更加可疑嘅係，我抄低咗兩支氣樽嘅出廠編號，再叫人問氣樽嘅生產商同香港代理商，即係一間潛水用品公司。得到嘅資料係，兩支氣樽係屬於同一型號，同一批次，仲要係半年前用同一張單買嘅。而買氣樽嘅人，正正就係 Aaron。」
「咁 Aaron 佢有咩解釋？」
「Aaron 話嗰支氬氣氣樽，其實係叫 『Drysuit inflation bottle』，係潛水愛好者落海時，用嚟打氣入件潛水衣度保温嘅。因為氬氣嘅傳熱率低，比起空氣更加保温，可以令潛水衣嘅保温程度提升 20%，所以當佢要去水温低嘅地方潛水就會用氬氣氣樽。
Aaron 鐘意潛水，呢個興趣的確眾所周知，過去好多電視訪問都有影 Aaron 喺世界各地潛水嘅片段，所以佢擁有呢啲氣樽，我覺得唔出奇嘅。亦都係呢個原因，佢會有潛水用嘅氧氣樽俾葉醫生進行急救。
但最大問題係，點解佢支氣會去咗鄺牧師間房度，而鄺牧師會用支氣黎自殺，甚至可能係用黎殺 Vincy 呢？
呢個問題，Aaron 佢答得好含糊，淨係識得話『因為鄺牧師問佢借，所以就借俾佢』。但當我問得佢再深入啲詳細啲，Aaron 佢就吞吞吐吐，好似係有嘢隱暪，喺度作故仔咁。」
「咁又真係好令人懷疑喎......」
「同埋，照你同事 Nicole 所講，佢試圖收埋樽氣喎。如果唔係身有屎，點會咁驚？」
「咁又唔係喎，我諗...... 可能係正常反應，佢見到鄺牧師疑似用同自己同款嘅氣樽自殺，為咗避嫌，都會收埋嘅。
講講下，我反而咁睇：如果佢係兇手，就唔會最後一刻先收埋樽氣啦，應該一早就收埋啦，佢收埋得咁慌張，反而唔似係兇手。」
「仲有一個 Aaron 引起我懷疑嘅重點，就係佢係呢架船嘅主人。因為架『永生號』係佢擁有嘅，佢最熟悉呢架船，佢可能有能力可以不留痕跡地開到所有房門，佢有好多方法犯案而唔留低任何線索。」
「不過有能力犯案，唔等如就係兇手嘅，仲要睇佢有無動機。」Erica 說。
「你講得無錯。我就係想查下 Aaron 有無殺 Vincy 同鄺牧師嘅動機，而呢個亦係我今日約你黎嘅原因。」
「你想我查下 Aaron 有無殺 Vincy 同鄺牧師嘅動機？」
「無錯。因為鄺牧師用來自殺嘅氬氣氣樽來自 Aaron，我而家主力懷疑 Aaron ，但警方高層唔想我再查，希望直接宣佈鄺牧師係兇手就算， case close。
一來因為好多人證物證都指向鄺牧師，
二來 Aaron 咩身世背景大家都知，高層唔想搞大件事，所以唔俾我再掂呢單案件 ......
所以我諗住同你呢個娛樂記者，交換情報。我頭先就透露咗好多警方調查到嘅線索俾你，希望你可以利用娛樂記者嘅專業觸覺同人脈，調查一下Aaron 、Vincy 同鄺牧師之間有咩關係。」
Erica 聽到警察先生這樣說，正想推卻這個重任，吿訴他其實電視台高層都不容許自己再調查此案。但是，Erica 腦海中突然閃過一個畫面。
「呀！我記得呢...... Rosemary 嗰晚喺大家發現鄺牧師自殺之後，曾經好激動咁話， Vincy 當年係因為鄺牧師先至離開教會，唔再信教，仲好唔顧儀態咁叫鄺牧師做『仆街牧師』添...... 睇嚟 Rosemary 好似知道一啲內情，所以咁憎鄺牧師。我估，好有可能係同『鹽光社』有關。」
「嗯，咁就麻煩你去調查啦！有咩新消息新線索，就隨時打俾我喇！」