拖住我隻手，得唔得呀？: 第五章：點解會咁架？有冇人可以解釋下？

 
  「阿樑，我最近發現左原來我真係好憎你。」
 
  老實講，佢呢一句說話真係hurt到我應一應，所以話有時文字既殺傷力真係好比一把利劍。女神開到口話唔中意我，我覺得自己既心情真係灰到同燃燒炲盡差唔多。
 
  「點…點解呀？」
 
  「我開頭仲以為你係有決心考返好個考試先至會嚟重讀，之不過原來一切都係我喺到自作多情。你諗下你之前個測驗，三分，係三分呀！如果你有温下書既都唔會考成咁啦下話。好似你呢啲做事咁唔認真既人我就係最討厭架啦！」
 
  「咁……」




 
  其實我真係好想反駁佢，之但係佢又的確講得一啲都冇錯。我入嚟呢間學校讀書只不過係為左應付我阿媽，根本冇諗過要考返好個考試既，咁我又點會有心機讀先得呀？而且我冇用心考個測驗係事實，我考得三分又係事實，聽到佢咁講之後我除咗望住個地下之外就真係唔知比咩反應好。
 
  「你唔好再送我返屋企，如果非必要我都唔想見到你。」
 
  希文講完之後就頭也不回咁直接返咗上樓，而我就一個人呆咗咁一直企咗喺到。
 
  去到第二日返學，我地好似之前咁一樣見到面都冇講野，我知道自己喺佢面前講野都只會令到佢更加嬲，所以都冇主動咁去揾佢。而喺呢個時候，同我同一組既子軒笑笑口咁行咗過嚟。
 
  「點呀阿樑，你呢幾日好似冇乜點同希文佢傾過計嚟喎，係唔係比佢話成績差唔中意你呢？」




 
  「你…你點知架？」
 
  「你有所不知啦，諗下都知啦，佢個樣又唔差，身材又好喎，成績你都有眼睇架……咁既條件，年終都不知有幾多好似你咁既人中意咗佢。」
 
  「吓……乜…乜野中意呀，都唔知你講乜。」
 
  呢個時候我感覺到塊面變得好熱，應該係因為我塊面宜家紅曬掛。冇錯我對希文係好有好感，但係咁都唔洗咁直接講話我中意佢架嘛，不過其實我都…都…唔知係唔係中意咗佢……
 
  子軒望到我塊面之後拎一拎頭，然後微微一笑，成個世事都比佢看透mode咁，然後叉住對手放係胸前。




 
  「不過點解希文佢宜家仲係單身呢？咁即係證明嗰班追佢既人都……你明架啦。」
 
  「之不過你點知佢因為我成績差而唔中意我架？」
 
  「我亂吹之嘛，嘻嘻。」
 
  「吓……」
 
  講真我除咗吓真係唔係講咩好，咁都比你吹得中，有冇咁好彩呀？子軒我一定會認住你，等遲啲你同我都夠十八歲我一定拉你去馬會買返次六合彩。
 
  「講笑喳。不過聽講話希文佢屋企家教其實好嚴，如果成績考得差少少就會比人鬧而且冇晚飯食，所以佢由細就覺得成績就係一切，見到有人唔比心機讀書就會討厭佢地。」
 
  「原來希文既背後係有個咁既故事既……」
 




  「咁你又點呀，你係唔係諗住放棄先？定係你諗住繼續去追佢呀？」
 
  「唔放棄又可以點先……咪住！我幾時有話過你聽我要追佢呀？你唔好亂諗喎。」
 
  「同你同一組咁耐又點會估唔到你諗乜先得架？你日日上堂時時刻刻都淨係識望住希文就知你乜野事啦。」
 
  唔通我上堂嗰時感覺到嗰種比人望住既感覺就係子軒？咁都好啲，等我仲以為係唔知乜野靈異野添。唉，不過都唔知仲會唔會有其他人都望到我咁做先得架。
 
  「咁…咁我宜家有咩可以做呀？」
 
  「呢啲時候就應該對症下藥，千祈唔好行差踏錯。」
 
  「咁即點呀？」
 
  「咁都唔明？！你真唔明定假唔明呀？」




 
  「嗯……」
 
  「即係比啲心機讀好啲書囉傻仔。」
 
  講完呢句之後子軒佢就跳下跳咁行開咗，個樣好似期待住啲唔知乜野咁。不過我都冇咩時間去諗點解佢要嚟解釋咁多野比我知，我都係快啲諗下有咁野方法可以令希文冇咁討厭我仲好。宜家只要我一諗起佢之前話好憎嗰個情況我就真係想喊出嚟啦。
 
  不過到底點做至好呢？係唔係要成績有返好轉呢？之不過我又點知下一個測驗係幾時喎，唉，真係愈諗愈頭痛。
 
  唔係喎，如果講最近既話應該有一件事可以用喎。

-----------------------------------------------------------------------------------------------------------------

其實我都唔知自己寫成點, 得既話大家介唔介意留下言比啲意見我呀？





btw, 因為都係時候開學, 更新既時候會慢啲, 希望大家見諒
同埋覺得好睇既記住要介紹比朋友呀 :)