拖住我隻手，得唔得呀？: 第十章：雨一直下，氣氛有點融洽

  就係多得呢次既Presentation作為一個契機，令到我同希文既關係又回復到之前一樣咁，不過其實都唔係完全一樣既，最起碼我一定要比啲心機去讀書，如果唔係佢就一定好似之前咁憎我。
 
  時間話咁快嚟到十一月，估唔到我同希文既關係會由一埸雨開始演變到去另一個關係。
 
  自從Presentation之後，我同希文一齊既時間大大增加咗唔少，係唔係好妒忌
呢？不過你地唔好誤會呀，我地唔係你地諗咁架。因為希文知道我已經成半年冇掂過啲書，所以佢先主動抽時間嚟同我一對一温書，冇咩特別架。不過其實我地又唔單止係去温書既，仲有……去補習囉，個個人都捧到個DSE咁鬼重要，咁我當然都要去吓補習啦。
 
  今日係星期五，我地放學之後諗住一齊去補習社到上堂。雖然我之前試過上網睇下有關補習既野，之不過我見到啲論壇Post淨係一味講啲乜野亞古獸，基爾獸咁，唔講我真係以為自己睇緊啲數碼精靈既大圖鑑呀。最後當我問希文有冇乜野好介紹既時候佢就同我講不如一齊去同一個老師到上堂，佢笑笑口咁話佢介紹我去既兩個人都有半價喎，聽到啲咁既消息我梗係去啦。呀，不過宜家諗返起佢當時笑得好特別，好似唔單止住為咗有半價而開心喎，不過算啦，可能係我諗多咗架啫。
 
  咁耐以嚟我都冇補過習既，返正我都冇認真讀過書，比我去上補習班仲唔係曬錢咩，而且補習呢啲野又唔係上咗堂就學識既，見到我以前啲中六同學個個拎住啲筆記喺到自High個樣我真係點都諗唔明。如果唔係有心學野就咪去啦，咁同政府講既大曬鬼有咩分別呀。




 
  不過一上堂就真係比個補習老師嚇親，我唔係諗住話補習有幾好幾好，之不過同學校嗰啲真係完全兩碼子囉，唔好話乜野筆記好唔好，只係單單講解內容呢方面已經教學校既老師望塵莫及啦。好似地理科講既乜野地震既形成，我喺學校學咗成個星期都唔係好明，但係呢個補習老師只係用咗十五分鐘就講完，仲要係好清析嗰種。當然我唔係咁片面話學校啲老師冇用，始終佢地既工作唔止係教書，仲有學校啲事務等等，不過而家每次我諗起個樣我都不自覺咁嘆咗一口氣。
 
  喺補完習之後我同希文都會行路返屋企，始終補習社距離屋企唔係好遠，而且我地一齊行仲可以傾多一陣計添。不過今日我地上完堂之後居然個天落起雨嚟，老實講我唔太中意落雨，因為真係會好麻煩。
 
  「喂希文，不如一齊返去囉？」
 
  「唔啦……」
 
  「點解唔呀，平時都一齊行架。」




 
  「唔…唔好問啦……」
 
  講完呢句之後，希文佢立即將個書包放喺個頭到，深深吸一口氣之後衝咗出去，睇嚟佢好似無帶遮咁。我立即打開自己把遮然後衝咗出去，廢時希文比雨淋濕。
 
  「希文你做咩呀，冇帶遮咪同我講囉，嗱，我地一齊行啦。」
 
  我咁樣講完之後，希文佢冇再好似頭先喺到跑，而係靜靜企咗係到，低頭望住個地下。
 
  「點解要跑得咁快呀？」




 
  「我…我唔…唔…唔記得帶遮……」
 
  「唔記得帶遮咪同我講囉，我地可以一齊遮，洗乜要咁跑出去呀？」
 
  「因…因為冇帶遮實在好瘀呀嘛……而且我仲要用男仔擔同一把……」
 
  「有乜好瘀呀！如果你遲啲病咗既話你唔覺得係仲瘀咩？」
 
  我諗呢次係我識佢咁耐以嚟最大聲同佢講野既一次，之不過我覺得咁大聲先可以叫得到佢。希文聽完我講之後好似想即刻反駁我，但係佢好似一時想開口之後又欲言又止，我諗佢大約係諗唔到有咩反駁我既地方掛。
 
  「咁…咁…唔該曬你喎……」
 
  就係咁我地就喺呢個雨天到我地兩個就擔住同一把遮行返屋企，雖然話就話係我主動約希文同我擔同一遮，之不過我都估唔到旁邊既人都係咁望住我地兩個，搞到我同希文都有啲唔好意思。我地沿途一路都冇講野，但係情況同之前做資料搜集之後唔同，有講野唔係因為佢又嬲咗我，而係我地兩個都唔知講咩好。
 




  「你…你點呀，有冇淋到？」
 
  我希望可以打破呢個咁尷尬既氣氛，但係唔知應該點做好，所以先求其問一句好普通既問題，但係似乎我呢個問題並冇發揮到我心目中既作用，返而令到我地之間既尷尬轉換到另一種層次。
 
  冇幾耐之後，希文望一望我，發現我為咗唔好比佢淋濕而將把遮傾向佢到，而我左邊既膀頭就因為把遮唔夠大既問題而比雨水淋濕咗，然後將個身慢慢咁挨落我到，對手就攬住我。呢個時候個感覺到右邊既心口有種比軟軟地既野壓住既感覺，搞到我個心跳得愈嚟愈快，緊張到我都唔知望唔望希文好。
 
  「唔…唔好誤會呀，我…我只係唔想你淋到病咗喳，你知你都冇咩時間去温書架啦，仲邊有時間病呀。你…你唔好亂諗野呀！」
 
  「我邊有亂諗野喎。」
 
  大佬，你壓到個身咁埋，我緊張到幾乎唔記得呼吸添啦，仲邊有心情同時間可以亂諗野呀。
 
  「轟隆！」
 
  突然個天響起一聲好大聲既雷聲，大聲到好似行過啲冷氣機房咁。乜野叫做人面獸……唔係，乜野叫做震耳欲聾呢，睇怕呢一個雷聲既係最好既示範啦。




 
  「呀！」
 
  聽到呢一下雷聲之後，希文佢立即尖叫出聲，然後將本來攬住我嗰對手由本來只係好普通放係我膀頭到變成宜家緊緊咁攬實我，咁當然佢既心口亦變得更加貼近我，令到我更加體會到佢既體温。呢個時候既我比起頭先更加唔識得點樣去做反應，唯有行快少少。明明補習社距離屋企唔係好遠，但係今日條路比我既感覺真係長過萬里長城呀，最後幾經辛苦先至送到希文返到佢樓下。
 
  「多…多謝你呀…………………………拜拜。」
 
  見到佢面紅紅咁講完拜拜之後就立即跑返上樓，我先至鬆返一口氣行返屋企。呢一埸特如奇來既雨，應該令到我同佢之間既關係變得更加親近掛？至少我係諗……

--------------------------------------------------------------------------------------------------------------------------------
我都知自己出文既時間係好鬼慢, 但係都好希望大家可以體諒 :)
出文既速度暫時都會係一至兩個星期一篇, 我諗sem break既時候應該會快返掛……
最近身體都唔係太好, 天氣一轉就病咗成個星期, 宜家都仲有一大堆Project同Present等緊我, 唉…………
最後都係嗰句：覺得個故有趣既話記住要share比朋友睇同埋留個comment呀！