[愛回‧家][推理] 執到寶事件手帖: 國產馬沙專用高達 - 第一章
今日既「執到寶」依然係好冷清冇咩人，不過咁又係既，宜家啲人郁少少就話要買新野，又唔愛惜啲舊野，點會多人嚟先得架？所以我地呢到一向都係熟客同埋佢地介紹既朋友去經營，如果唔係既真係想揾多個人嚟望下都冇。
呢一股冷清持續咗一個早晨之後，終於有一個著住Polo shirt既中年男子捧住一個大紙箱慢慢行入嚟，紙箱入面裝住既應該一大堆既玩具。
「喂強哥，今次又要麻煩你啦。」
「得啦徐生，今次一樣交比我。」
呢位徐生係我地執到寶既熟客之一，一向做開幫人收開二手野，如果見到有乜野值錢或者得意既野都會拎過嚟比我地鋪頭到賣，從中賺個差價咁。呢位徐生對眼都可以話幾利，次次佢賣比我地既野都幾好賣，某程度嚟講佢都可以算係我地主要既貨源之一嚟。
「係啦徐生呀，點解今次你會拎到咁多玩具嚟既？」
「冇呀，我今日去咗一家人到收野，佢地個仔係時候去外國讀書，所以咪賣曬啲玩具比我囉。強哥你睇清楚呀，啲玩具賣之前已經比嗰家人清潔過一次，望落都幾新淨架。」
「你成日都比到啲唔錯野嚟，我又點會信你唔過先得架。」
徐生捧住既呢一大箱玩具入面可以話係乜野都有，Lego呀，鐵皮車等等都有見到。不過我望多兩望既時候居然比我見到一個幾殘舊既高達模型，但係我唔係指清潔得唔乾淨嗰隻殘舊呀，而係佢比我個感覺係好耐歷史咁。
「點呀強哥。」
「今次都唔錯，每一隻都好吸引呀，睇嚟價都唔錯。唔……就咁啦。」
我喺張紙到寫底我願意收呢箱玩具既價錢。雖然嗰隻馬沙專用高達係殘咗少少，不過見徐生係熟客，我就當佢係全新咁計，當係留住個熟客又點話，反正如果係為咗賺錢我都唔會去做夜冷鋪啦。
「嘩，多謝曬呀強哥。」
「唔好咁講，係我多謝你先，以後都要請你多多關照啦。」
「一定一定。」
就係咁，徐生就滿心歡喜咁離開咗「執到寶」，而呢到又回復返頭先佢嚟之前咁冷清。
我細心睇下頭先嗰個箱入面既玩具，雖然大多都係好吸引，但係唔知點解我既視線好自然就比呢一部紅色既高達深深咁吸引住。
呢部高達既主要顏色係紅色，如無意外既應該就係馬沙專用既高達。之不過呢部高達望落唔似係平時市面見到嗰啲1/144或都1/100既大細，而係好誇張既比例。雖然高達既野我都唔係話好熟，只係因為鋪頭有時都會收到高達模型所以先會向我細佬馬壯佢請教咗少少。
我隨手喺收錢個櫃枱到拎咗一把尺嚟度，估唔到呢個高達居然長成30cm，喺佢背隻到仲好清楚咁留住Made in China既字眼，照咁睇呢一部應該係國產既山寨貨之一。不過呢部高達最特別既地方就係佢兩隻腳板到都用Marker寫咗字，左腳就寫住個「馬」字，而右腳就因矇咗一達睇唔清楚，應該係刻意咁比人整走咗。不過我諗本來應該係個「沙」字，既然呢部高達係紅色既，咁寫住「馬沙」都唔出奇。
我拎咗張紙記底呢箱玩具入面一共有幾多件同埋為寫底有每一件既名，咁當然我手上既呢隻高達亦都唔例外記錄在案啦。
喺呢個時候，門口到有個熟識既身影出現，我相信佢既出現一定會令呢到冷清既氣氛再次熱鬧起嚟。
「喂二佬，你點呀？」
呢一個人就係我既細佬馬壯，之不過我平時就會叫佢做阿壯。
「咦，阿壯你呢個時候嚟既？律師樓嗰邊冇野做咩？」
「晨早搞掂曬啦，本來今日要去買嗰個三七萬能俠所以咪請咗半日假囉，估唔到原來我記錯咗日子，下個月先係，結果冇野做咪過嚟揾你食下午茶囉。」
「你仲係咁中意玩具呀，你怕唔怕Alex覺得你幼稚唔要你呀？」
「我既德如BB先唔會咁少氣呀。係啦，呢箱咁大既係乜野嚟架？」
「冇，係頭先有個客賣比我地既野啫。」
阿壯望住一大箱玩具既時候對眼好似識發光咁，嘴角亦都不受控咁向上翹起，睇嚟佢真係好中意玩具。
其實我有時喺到諗，好多人成長既時候都會因為環境既問題而喺不知不覺間失去咗本來有既童真，之不過我眼前既呢個大人居然仲舍得為咗一隻三七萬能俠而去請假，呢一份童真有時都真係幾令人妒忌架。
但係當阿壯佢一望見我手上既呢個高達既時候面色一變，眼神變得凌厲，然後一手喺我手上搶過去。
「呢…呢個係……」
「做咩呀阿壯，你想要呢個呀？」
「係呀二佬，你可唔可以賣比我呀？」
「唔得。」
「點解唔得呀？你平時都會比既。」
「比在係平時我一定會比你，唔收錢都冇所謂，之不過呢個係山寨貨嚟，你都應該睇得出啦。我地鋪頭一向都唔會賣山寨野既，而且你宜家係一個律師嚟啦，比人知你去買山寨野你估人地點睇你呀？」
「咁梗係山寨貨嚟架啦！」
「你咁講係咩意思呀？」
「呀…呀……唉呀，嚟啦，求下你呀，最多我以後幫你做家務啦，睇實子仁唔好比佢做錯事啦，或者……」
睇嚟阿壯佢真係幾中意呢個公仔，之不過我知道如果我比咗呢個模型佢既話我個心一定唔會安樂。更何況佢呢一啲嗲功我由細就睇到大，又點會有用先得架？
「唔好咁唔開心啦，最多我請你去食下午茶啦，好唔好？」
阿壯佢成個人down曬，將佢手上面既高達放返喺個箱入面，我地兩個就咁走去食下午茶。