[愛回‧家][推理] 執到寶事件手帖: 國產馬沙專用高達 - 第三章
「點解咁既？去咗邊呢？」
今日我返到鋪頭門口既時候見到阿飛同尋日一樣喺鋪頭入面走嚟走去，之但係佢唔係去清潔或者吸塵，睇個表情應該係揾緊啲重要野。
我如常咁行入「執到寶」到，然後慢慢咁走過去阿飛既身邊。
比著係平時既阿飛幾忙都好一定會好精神抖擻咁同我打招呼，但係今日居然揾野揾到連我企喺佢身邊都冇察覺，照咁睇佢一定係揾緊啲好重要既野。不過既然開咗鋪既咁揾落去都唔係辦法，我唯有開口問佢發生咩事。
「阿飛你做咩咁既樣呀，唔見咗野呀？」
「係呀事頭，你之前咪叫我放你喺徐生到收到嗰箱玩具上架既……」
「冇錯呀。」
「但係我按住你比我嗰張紙汁野既時候發現有件玩具唔見咗呀。」
「唔見咗？你有冇睇清楚呀？我咪同你講咗子仁拎咗三件既，計咗未先？」
「我梗係計咗啦，之但係仲係有一件唔見咗呀。」
「咁係邊件呀？」
「紅色嗰部高達，好大部嗰個呢。」
如果係紅色既高達既話，我腦入面第一時間就諗到應該係嗰部令到我好在意既馬沙專用高達。
「如果嗰個就算啦，反正呢部高達係山寨貨，我都唔諗住賣既，反正遲早都要處理咗佢既，唔洗擺喺心到喎阿飛。」
「事…事頭，件野我真係冇心整唔見架，你唔好怪我呀。」
「都話唔洗擺喺心到呀阿飛，你平時份人係點我有眼睇架，我梗係知唔見咗你都唔想。算啦，唔見咗部高達你咁唔開心都冇用架啦，不如你唔好再諗呢件事，繼續做野啦。」
「嗯……」
阿飛雖然唔係話係嗰啲好醒目既人，但係佢喺工作上一向好有交帶，整唔見野呢啲事，我誇張少少講句，呢個鋪頭既另一個員工洪爺整唔見野仲多過阿飛。
所以我可以好肯定咁講今次呢件事一定唔關阿飛事。之不過到底今次呢部馬沙專用高達點解會無啦啦唔見既呢？會唔會係有小偷呢？但係點解好偷唔偷要嚟夜冷鋪偷呀？唉，不過算啦，今次冇咩損失就算啦。
今日既鋪頭依然係好冷清，自從開鋪既時候阿飛唔見野呢一件小風波出現咗之後都冇咩特別事發生過，平平淡淡咁等到入黑既時候我就收鋪返屋企。
返屋企食飯可以話係我每日最開心既時刻，有乜野可以開心得過我地成家人聚埋一齊呢？食下我老婆阿嫦煮既野食，聽下子仁分享有咩工作趣事，睇下阿壯又搞啲咩笑料出嚟，的確唔錯。
就喺我入到屋之後，阿爸佢一面哀傷咁行過嚟我到。
「阿強呀，你知唔知阿壯佢發生咩事呀？」
「阿壯？我今日都見佢好地地，冇咩事喎。」
「冇，我見佢咁耐都唔嚟呢到我覺得有啲怪啫。」
阿壯一向都唔係同我地一家人住埋一齊，而係同阿爸佢一齊住喺隔離屋，不過食飯既時候佢就會走過嚟我嗰到。
但係今晚似乎真係有啲唔妥，平時未到食飯時候阿壯已經會主動走過嚟我地呢到，跳嚟跳去咁喺到叫話好肚餓，嘈到拆天咁滯，但係點解今日連個人影都唔見既？
「阿強呀，不如你幫我過去睇睇阿壯啦。」
「得啦，一於交比我啦阿爸。」
就係咁我就走咗去阿壯嗰邊睇下到底發生咗啲咩事。
去到阿壯屋企門口既時候，忽然聽到好大聲既連續碰撞聲喺屋入面傳出嚟，聽落好似係啲傢俬喺到撞嚟撞去咁。
會唔會係阿壯有咩事呢？
我不停咁禁個門鐘，但唔知係唔係因為入面本身就係好嘈既關係，我禁極都冇人嚟應門。
就算我平時幾冷靜都好呢個時候個心都變得好急，我怕我呢個細佬會有咩意外。
我不停咁打阿壯既電話，不過佢個電話一直都冇人應。見到個咁既情況，我已經準備返到自己間屋到拎阿壯屋企既後備鎖匙出嚟開門睇下到底發生咩事。但係啱啱喺我轉個身諗住返自己屋企既時候，剛才既碰撞聲突然間冇曬，屋入面變得一片清靜，接下來既就係個鎖頭好清脆咁扭開既「喀嚓」聲。
「咦二佬？你喺到做咩呀？」
「冇，阿爸見你咁耐唔過嚟食飯，叫我過嚟睇下發生咩事啫。」
我望住眼前呢個著住便服既阿壯，再望望屋入面既情況，睇到既時候真係嚇咗我一跳。
「點解你間屋搞成咁架？啲電視櫃呀，茶几之類通通都移曬位既？」
「呀……呀，冇，我最近有份文件唔見咗，但係嗰份文件都幾重要架，我唔知會唔會唔少心攝咗入電視櫃底之類，所以我咪喺咁搬開啲野睇下有冇囉。」
阿壯講呢段說話之前好似有少少猶豫，唔似平時口快快得罪咗人都唔覺既佢，不過我諗都係我自己多心啫。
「你份文件係點架？洗唔洗我幫你揾呀？」
「唔…唔洗啦，你唔會揾到架啦。」
「唔會揾到？你做野既文件大約係咩樣我都知架喎，點解咁肯定我揾唔到呀？」
「即…即係咁…咁既，如果要二佬你幫我揾先得既我仲叫神之馬壯？都係等我自己一個揾啦。」
「咁呀……不如你食咗飯先啦，費時要阿爸膽心先呀嘛。食完之後再返嚟揾啦。」
「咁好啦，見係二佬你咁講喳。」
聽到阿壯咁講之後，我好無奈咁嘆咗一口氣。唉，好彩係我嚟叫阿壯返去食飯喳，如果係其他人既話都唔知要搞幾耐呀，呢個阿壯真係一日到黑都要我呢個二佬為佢擔心既……