「咦,呢個係乜野嚟架?喂,飛仔,係唔係你啲結他既裝飾嚟架?」
 
  鋪頭入面傳嚟一把沙啞既男人聲音,不過唔係阿飛,更加唔係我係嗰個熟客徐生,而係我地第二個店員,洪爺。
 
  「咩嚟架,鬼係我架咩?」
 
  阿飛由鋪頭門口思思然咁行到鋪頭入面,好唔耐煩咁回應到先洪爺既問題。
 
  「呢啲咁奇怪既野唔係你仲會係邊個架?」
 




  「我都唔知架……」
 
  聽到佢地你一言我一語咁,講到幾乎鬧交咁滯,連企喺正門睇緊鋪既我都忍唔住行入鋪入面睇下佢地到底發生咩啲咩事。
 
  「你地喺到講緊啲乜野呀?」
 
  「冇,阿洪仔佢執到呢樣野,問我係唔係結他既用具嚟啫,嗱。」
 
  我喺阿飛手上接過嚟睇,係一塊長方型既板,上面有一個好似係飛標咁既四角星型,如果我冇估錯既話應該就係平時見到嗰啲高達拎開既盾。不過呢個盾既顏色配撘有啲奇怪,而且上色非常粗糙,如果我冇估錯既話應該係唔見咗嗰部高達既其中一個部分。
 




  「呀事頭,呢個到底係乜野嚟架?」
 
  「哦洪爺,呢個係一部模型既盾牌,唔係啲結他既野嚟架。」
 
  「聽唔聽到呀洪仔,事頭都話唔係結他野嚟呀,你信啦?」
 
  洪爺宜家嬲到成塊面紅曬,我諗如果我唔喺到既話佢應該會忍唔住手一下拍落去阿飛個頭到。
 
  「阿飛你都唔應該咁講野架。你唔係唔知洪爺對宜家潮流既野唔係好熟悉架咩?如果洪爺問到你既時候你好應該第一時間去解釋清楚比佢知,而唔係喺到否應嗰件野係你架。」
 




  「係……」
 
  始終論年紀嚟講我係大過佢,論人生經驗我又多過佢,再加上我既身份仲要係老闆,所以阿飛一向都唔會駁我嘴。
 
  「聽唔聽到事頭講咩呀,阿飛?呢啲叫做敬老呀,敬老呀?你識唔識呀?」
 
  「哎呀,唔係咁唔開心啦洪仔,係我唔啱啦,最多我錫返你當補數啦。」
 
  「行開啦,我唔啱呢味野架。」
 
  雖然洪爺講就咁講,之但係我知道佢一直都係當正阿飛佢係自己個仔一樣,頭先佢地咁樣嘈法其實一啲都冇傷害到佢地既感情。一諗到我地「執到寶」呢到可以好似成家人咁充滿人情味既時候我個心感覺非常之温暖。
 
  「呀,不過話時話,洪爺你係喺邊到發現呢個盾牌架?」
 
  「你話邊到呀……就喺我個工作室入面囉。」




 
  洪爺喺我鋪頭既職責就係要修補返啲爛咗既傢俬,或都得閒既時候可以幫手鑑定一下收返嚟既古董會唔會係流野,所以我喺鋪頭入面有間房係準備咗比洪爺同阿飛,可以當係佢地既工作室或者係休息室咁。
 
  「工作室呀……洪爺你又冇理由拎玩具入去架……」
 
  「咁咪係囉,我平時都只係會拎啲古董入工作室整架啫,玩具呢啲野我真係掂都冇掂過呀。」
 
  「係啦事頭呀,我記得之前執玩具嗰時同你講唔見咗嗰個玩具係高達嚟喎,呢個盾會唔會就係嗰部高達本來既一部分嚟架?」
 
  我點估都估唔到阿飛居然會心思細密到呢個地步,睇都未睇過嗰部高達就可以推出個咁既結論。雖然我都明白以阿飛份人嚟講就絕對冇可能係佢偷咗部高達既,之不過平時唔係好願諗野既阿飛居然可以諗到個咁既結論,唔通今次呢件事係同佢有關?
 
  「係啦,阿飛你執呢箱玩具既時候有冇拎過入咗工作室到呀?即係做檢查之類呀?」
 
  「當然冇啦,箱野咁重,我又點會想抬出抬入喎,所以我一直都係喺出面整喳。」
 




  「哎呀,飛仔如果你一早拎入嚟檢查咪唔會咁麻煩囉。」
 
  「箱野咁重我實搬得好慢啦,到時洪仔你又實會乘機喺到笑我既。我唔想比你笑咪唔索性喺出面搞掂囉。」
 
  「哦,即係宜家想話我唔啱啦下話。」
 
  「我都唔係咁既意思。」
 
  唉,我剛才先話完我地「執到寶」入面既人好似一家人咁,估唔到轉個頭嚟就見到佢地喺到嘈,真係冇佢地咁好氣呀。
 
  「唔好再講落去啦,係邊個整唔見根本就唔係重點。」
 
  「之但係事頭……」
 
  「唔好再諗啦,繼續做野啦。」




 
  「知道。」
 
  我拎住洪爺執到既呢個盾,由工作室嗰到走到自己間老細房,靜靜咁坐咗喺自己平時嗰張工作枱到,慢慢睇清楚呢個盾既樣。
 
  到底點解個盾會跌喺到呢?
 
  「喀喀……喀喀……」
 
  正當我諗住靜靜咁喺到諗呢個問題既時候有人敲我間房度門,而我亦都好自然咁將個盾牌放咗入個書枱櫃桶入面。
 
  「入嚟呀。」
 
  「老細房既門緩緩被打開,接住落嚟有一個身形略肥既男人走咗入嚟。
 




  「咦阿爸,點解你會嚟呢到揾我既?係唔係有咩事呀?」
 
  「哦係咁既,我有個朋友最近屋企添咗個孫,我想問下你有冇咩BB玩具可以比我送比佢當禮物囉。」
 
  「但係我記得阿爸你以前都唔中意我同阿壯玩佢玩具架喎,點解你今次想送玩具比佢既?」
 
  「係咁既,我以前唔比你同阿壯玩具係因為怕你地心散,但係後來先知原來適當咁比小朋友玩具係有利佢身心發展既,所以我先會想送玩具比佢囉,可能係我入面想透過幫其他人嚟做個補償掛,嘻嘻。」
 
  「原來係咁,放心啦阿爸,我一陣幫你睇下有冇啦,如果有啲靚既玩具我今晚會拎去比你架啦。」
 
  「咁唔該曬你啦,記住做野還做野,唔好去得太盡呀。」
 
  「得啦,我有分數架啦阿爸。」
 
  講完之後,阿爸就慢慢咁離開我間房,而我都冇去再諗部高達既事,只係專心幫阿爸睇吓有冇啲乜野玩具係可以送比佢朋友個孫。