《港男FF妄誌》: [Day 12－現在過去] PART 2
正當我快要俾Emma推倒，一個完美既少女軀體快要壓到落我身上，修長既美腿就黎要掂到我條半硬既JJ之時...
我唔得喇！
『Emma…小心會跌落床丫～』我Hold住左Emma，唔俾佢壓上黎...
「有你保護我，我乜都唔驚～」Emma笑瞇瞇咁側側地身壓到我身上...
一對豐滿既乳房就夾實左我手臂...條修長美腿就搭左落我隻腳道...
好彩...好彩Hold得住...無俾Emma條美腿掂到我條扯扯地既JJ...
如果唔係，真係唔知Emma會點諗我...
可能從此認定我係一個死變態佬，同一般鹹濕男人無分別！
不過咁樣俾Emma豐乳夾手臂都幾大誘惑下...
我隻手唔敢亂郁，怕Emma誤會我想抽佢水...
不過要我咁樣Hold住個姿勢...等等成隻手會唔會無晒知覺架？
我偷偷望一望Emma...
Emma一直含情脈脈咁望住我...
唔好咁望住我好嘛…你咁樣望住我會令我想入非非架...
我唔係好敢正視Emma...因為我真係好驚...
好驚俾Emma既美貌迷到失去理智...
我好難得先忍到成晚無曳曳豬，我唔想功虧一簣囉...
死喇...諗下諗下...而家唔止條JJ唔多聽話，就連塊面都好似熱熱地...
我Feel到塊面應該已經紅紅地...
死喇死喇...Emma會唔會誤會我諗緊衰野架？！
冷靜D...冷靜D...
屌！俾Emma豐乳夾手臂之下，叫人點樣冷靜到呀？
「飛揚...原來你個鼻都幾高架喎～」當我仲尋求緊冷靜既方法之時，Emma用佢隻嫩滑手指摸一摸我個鼻...
『OK啦...OK啦...』我顯得好唔自然，有D尷尬...
「對眼係矇左D～不過總帶一份憂鬱神傷～鬚根都粗左D～不過就有份不羈浪子Feel～塊面係無乜肉～不過就輪廓鮮明～係皮膚差左D姐～」Emma一路用隻手指，喺我面上畫黎畫去...
『總之就唔係靚仔啦...哈哈...』唉...我都知自己樣衰架喇...
「都唔係丫～將咁多樣野加埋起黎，又唔算話好差丫～」Emma繼續打量我。
『自己知自己事啦...你的樣子如何，你的日子也必如何～你睇下我既日子幾咁難過，就知我既樣子有幾咁難看...』唉...我早就認命。
「你太無自信喇飛揚～」Emma用指尖篤一篤我鼻尖...
我太無自信？
或者真係啦...毒撚最忌有自信丫嘛…
但點解一個人會無自信？
好多時都係因為失敗得多…受挫折得多…
唔好話我軟弱，唔好話我細路仔經唔起風浪！
有時D風浪，係大到戰艦都會翻...
中七嗰年，實在影響得我太深...
一句“我無野想聽 亦無野想講”，阿月就頭也不回，轉身離我而去。
大受打擊之下，無心向學...最後大學都讀唔上...
喺而家呢個社會裏面，無讀過大學就好似個透明人一樣，無人睇到你...
喺任何環境、任何情況之下，都俾人無視既你，真係做鬼都唔靈～
呢樣又唔順，嗰樣又唔順，諸事都不順，做人仲點會有自信？
「每個人生於世上，總有一位天使喺你身後，保護住你，守護住你。」Emma情深意重咁望住我...
守護天使？
『我諗我嗰位天使一定係一個路痴，蕩失左路LUU～』仲要唔知蕩左去邊道風流快活緊都唔定～
「係你唔留意姐！」Emma谷一谷起塊面豬登，拍一拍我胸口...
『哎丫...』Emma做咩無啦啦打人喎...
「好多時都係咁，只係顧住向前行，忽略左背後原來有一位天使望住你。十年...二十年...甚至更多更多年之後，到你驚覺原來一直有位天使曾經默默為你付出，到緣盡之時已經後悔莫及...塵世間最痛苦莫過如此...」Emma帶住一點點失落擰擰頭。
點解好似熟口熟面咁既...
『唔好睇咁多周星馳啦...睇得多會上腦架...』雖然周星馳套西遊記好有深度...
就好似“你愛呀？你愛就要講清楚架嘛。你愛我自然會俾你，你唔愛我梗係唔會俾你啦，無理由你愛我唔俾你，你唔愛我就偏偏要俾你，大家講道理呀嘛。依家我數三聲，你講清楚你愛唔愛羅番...”
唐僧呢段話，並唔係笑話。(事實上，成套戲都唔係笑片。)
好多好多時，你愛佢但你唔講出口，佢係唔會知。
好老實咁講一句，唔好話咩心唔心靈感應，唔好話做到咁明顯你都Get唔到，係唔係智障。
唔講到出口Confirm既話，邊個可以肯定你既直覺唔係錯覺？
但更真實既係，到三聲過後，你想講俾佢知既時候，可能又已經太遲...
講返轉頭，道理有好多人都知，但做唔做到又係另一回事...
你估“我愛你”呢三個字，真係單單係三個字咁簡單咩？
「都唔係周星馳講既～係情聖講...」Emma講到一半，掩住左個嘴仔。
『又係嗰個情聖丫？乜人黎架？成日都講埋呢D以為好有道理既道理，迷惑人心！』聽到呢個名就真係有D火火地！
「你都有睇過佢個Facebook Page架咩？」Emma碌大對眼望住我。
『無喎～我只係聽過我個細妹講過下咁咋喎...』我先唔會睇埋呢D咁荼毒人心既野囉！
呢D野，只會得D無知少女先會去睇架咋嘛！
嗱～我唔係話阿Wing同Emma無知丫下～
你地唔好暴動丫～
「哦...」Emma聽到我提起阿Wing之後，無駁落去...
『唉～總之就唔好睇咁多啦～』我望一望住Emma副無知既面容。
「嗯嗯～你都唔好咁好奇喇～」Emma真誠咁點點頭。
『我絕對唔會對佢有興趣～』我唔係D少女情懷總是濕囉～
不過講開又講，Emma真係好聽教聽話～
點解Emma好似咁言聽計從咁架呢？
其實Emma聽話呢一點，都唔係第一日既事...
識Emma咁耐，一直都好似好聽我講咁...
但如果話Emma係唔係真係咁溫馴，我又唔敢百分百肯定...
就好似今次咁，Emma嬲佢爺爺嬲到要離家出走(以Emma既角度呢講)，算唔算得上係任性？
少少啦...
所以話，喺Emma身上，我總會感應到一點點既矛盾...
或者可以話，我唔太了解Emma掛...
同Emma喺張床道傾下傾下，色心反而減弱左～就連條JJ都聽話左～無咁硬～(仲有少少硬咁囉...)
係唔係身體機能出現左問題呢？
係唔係我性能力方面有問題呢？
係唔係因為成日都射唔出既關係呢？
我都唔知...
或者係我既心理已經修練到成佛既化境～
真係唔使幾耐，可以跟方丈參透人生哲理～
“咕咕”兩聲，唔係由我個肚傳出黎...係Emma～
『你肚餓？』我掃一掃Emma既秀髮。
「嗯嗯～嘻嘻...」Emma尷尷尬尬笑一笑，伸一伸條脷。
『同你落去食早餐喇～』我諗都差唔多係時候...
「嗯～不過...可唔可以俾我沖多次涼，梳洗一下先丫？我習慣朝早會沖涼...」Emma仲係有D尷尬。
『嗯～當然可以～我仲有D新既牙刷、面巾。我拎埋俾你～』無理由要Emma用我嗰D架嘛…
「嗯～唔該～」Emma起一起身...
我隻手真係俾Emma壓到痺痺地...
所以話呢～有條女俾你攬住瞓唔一定係好事～
俾豐乳壓住就更加大件事～
Emma小心翼翼咁爬返落床。
『小心～』我亦以單手扶住Emma條小蠻腰。
「唔該～」Emma幾時都係咁有禮貌～
等我喺個櫃入面，搵返套全新既旅行裝清潔用品出黎，交到Emma手中之後...
「唔該～」Emma點一點頭，拎齊埋自己D衣物，轉身彈下彈下彈入廁所。
邊個話孤男寡女共處一室，女仔實有損失？
邊個話一男一女瞓喺張床到就要搞野？
邊個話女神入左廁所沖涼，就一定會衝入去姦左佢架？
Emma第二次喺我個廁所道沖涼，我都仲係乖乖咁坐喺個廳道發呆咋～
我呢D唔係叫戇鳩！我呢D叫做正人君子～你識條鐵咩～
“滴滴滴滴滴滴滴滴”四圍望一望，分散一下注意力...
望望下，望到阿Wing D相...
阿Wing～阿哥好守信用架～一直都好守～
應承得過你既，從來都無食言～
就算有美食當前，我都無失信於你～
都算係咁啦係嘛？
不過當然...除左話因為應承左阿Wing，唔可以搞其他女仔之外，最主要原因都係因為阿月...
阿月...
黎緊今日，要同阿月上山過夜...
上山過足一晚夜...
我應該用乜野態度，去面到呢個一直種喺我內深心處既人呢？
真係夠晒困惑...夠晒迷惘...
「你點都捉唔到我架喇～」著住白色校服，孭住書包既阿月一直跑，一直喺我面前跑...
『喂喂～等埋丫～』我就一直喺阿月身後追，一直追...
喺阿月身後望住阿月既背影，佢幾時都係咁有活力，好似有用唔盡既氣力...
「飛揚～你跑得真係慢丫～」阿月並無諗住停落黎，繼續向前跑...
『喂～等等我啦～』我已經出盡全力，但都無辦法拉近彼此之間既距離...
喺被遺忘既貧民區之中，我同阿月你追我趕，穿過大大小小既商場同橫街窄巷...
我地兩個無視晒街上既所有人，一直衝...一直撞...
「飛揚～你永永遠遠都追唔上我～」阿月一彈一跳，避開兩個人後加速奔前...
『阿月！』我已經無乜氣力喺阿月身後追...
當阿月跑過仲閃緊既行人過路燈，跑到過對面...
阿月跑到過對面之後，一個轉身，企定定望返過黎仲企喺路軌對面既我...
我企喺對面，望住莞爾一笑既阿月...
一架輕鐵岩岩駛過，打斷左我地之間既眼神交流...
“咔”一聲響，Emma著返好佢自己件粉紅色碎花吊帶連身短裙，拎住我借俾佢D衣物同清潔用品，由廁所行返出黎。
沖完涼既Emma，就好似發光既天使一樣...(Emma有幾時唔係發住光...)
我行到去Emma面前：『D用品同D衫俾我得架喇～」
「唔該～」Emma含羞答答咁將手上既物品交返俾我。
Emma真係好乖呢～
大家閨秀真係唔同D～
不過又真係奇怪...喺現今香港裏，有錢女唔係個個都係公主癌末期架咩？
唔好話有錢女丫～窮家女都一樣患上公主癌架啦～
絕症係無貴賤之分架嘛～
所以呢...Emma總會令我頭上出現幾個問號...
而呢幾個問題，又有可能永遠都得唔到答案...
『唔使客氣～我幫你吹乾個頭先～』我將D物品放喺枱上，Emma就好自動自覺咁行左入我同阿Wing間房。
Emma再一次大方得體咁坐喺阿Wing張床上面，雙手放到大髀上～
大家閨秀真係大家閨秀～幾時都係咁儀態萬千～
“颼”我再一次企喺Emma前面，相當溫柔咁撥一撥Emma把好似用左Rejoice咁既秀髮～
「我真係覺得好幸福～」Emma含情脈脈咁咬住唇望上黎。
『所以有咁多人都鍾意去Salon洗頭～Set頭囉～』我地嗰陣時係會話費用包埋～
「咁都要睇下對象既～」Emma𡁯起個嘴，好似條金魚咁～
『咁我係唔係應該轉行做返Salon？哈哈～』或者做Salon仲自由自在得多～
「如果係咁，不如做我既私人髮型師啦～只係可以服侍我一個～」Emma谷起埋面豬登。
『係又唔驅丫～就係照顧你一個既話，我得閒好多～』係都真係唔錯丫～可以做多D自己想做既事～
「你死喇你～你呢句說話唔好俾你細妹聽到添丫～實呷醋死丫～」Emma對住我古古惑惑咁笑...
『講呢D～佢先唔會咁小器～』事實上，我有小小心虛...
「你唔好話丫～女仔好小器架真係～越靚既女仔就越小器添～」Emma一副看破紅塵既樣，望住我笑一笑。
『咁又唔見你小器～』其實打從心底裏面，我都覺得女仔係越靚越小器...
「我小器，你唔知姐～」Emma陰陰嘴笑…
望住Emma呢個樣，我都唔知係驚好定係笑好...
Emma呢個天使樣，笑出小惡魔既面容...好古怪丫～
『哈哈哈～』最後我都係忍唔住笑左～
「笑咩姐～」Emma谷一谷起塊面豬登～
『無無～你個樣好可愛～哈哈哈～』Emma呢個樣真係好鬼死得意～
「多謝～」Emma微微嘴笑一笑。
『咁都要多謝丫？』我忍一忍笑…
「俾人讚係要講多謝先有禮貌架～」Emma點一點頭。
『你會唔會太有禮貌喇掛？』我真係未遇過一個咁有禮貌既女仔～
「我一直都好努力學習點樣有禮貌～點樣大家閨秀～點樣唔再任性...我真係好努架～」Emma一對堅定既眼神望住我...
我俾Emma呢種眼神吸引住，呆左咁眼定定望住佢...
整個空間靜晒...就連“颼颼”既風筒聲都好似消失埋一樣...
過左好一陣子...
『你已經好有禮貌～好大家閨秀～一D都唔任性～』我帶住微笑回應Emma。
「真係既？多謝～」Emma都帶住微笑，向我回返個禮。
Emma…你呢個女仔太過完美無瑕...
根本就連想喺Emma身上，搵一丁點缺點出黎都無可能...
完完全全係一個全人...
上帝竟然創造左一個咁完美既人，降臨凡間...
試問又有邊一個凡人敢高攀...
幫Emma吹完個頭之後...
『咁你坐一陣喇～我去梳洗下～』同Emma交低一句...
「嗯～你慢慢啦～」Emma坐定定喺阿Wing張床上面點點頭。
我就去簡單梳洗一下。
呢一晚真係過得好特別。
我諗我呢一生人都未必會再有下一次。
可以同天使同眠，仲要係純粹瞓覺...真係講出黎都無人信。
我唔會認為係我正人君子，我有定力...
只係因為我太多顧慮...
顧慮太多，總會令人步步為營...卻步...甚至...逃之夭夭...
好多時就係因為顧慮太多，所以錯過左好多好多…
錯過左好多機會，好多成功既機會...好多改變既機會...
或者只要勇敢D，放下一點點顧慮，踏前一步，就可以得到世界。