我係網上面識左個女仔: 第五章-阿爸阿媽

算係咁啦，我呢啲小毒向左走向右走識到女仔已經好唔錯，正係我仲搵緊有冇其他有用嘅相或者其他資料嘅時候，我阿媽返到屋企喇。

「仔呀！」
「咩事呀阿媽？」
「過黎幫我，幫我拎呢幾袋米入廚房啦。」
「哦。」
就係咁，我嘅起底行動就被終止左，冇所謂啦，要嘅都差唔多搵到，其它由佢啦。

「阿媽做乜買咁多米呀？」
「平啊嘛！」


「食唔食得曬架我地……得兩個人……」
唔好誤會，我唔係係單親家庭長大，只係阿爸要唔知咩Overseas Training，去左外國，好似好勁咁啦，其實我都唔知咩黎，都成大半年前出發，呢大半年黎佢都有寄下家用俾我地咁，如果唔係靠阿媽得閒打下牌嘅收入，根本生活唔到，何況佢有時仲輸錢添？

「死仔，你老豆下星期返香港啦，係咪連自己有個老豆都唔記得？」
原來係咁，其實我都慣左得我同阿媽兩個人嘅生活，差啲唔記得阿爸係會返黎。（長途太貴，我地好少講，阿爸阿媽又冇facebook，所以都真係冇乜交流）

就係咁，一個禮拜後，我被阿媽帶左去接阿爸機。

「老豆！」「阿爸！」
其實由細到大我都係叫阿爸做阿爸，阿媽就叫阿爸做老豆，Anyway啦。



「老婆，仔！」我阿爸向我地揮揮手。
當行到咁上下，我地終於碰面，冇電視劇嘅擁抱，冇喊，大家只係笑下就一齊行番屋企。我留意到，阿爸嘅樣冇乜變，係衣著方面變化大啲，去個時T-shirt短褲，宜家恤衫牛仔褲。

返屋企嘅途中，阿媽同阿爸都好多計傾，我間中嗯嗯哦哦下，大家好似冇分開過咁。