我係網上面識左個女仔: 第三十七章-這不是導火線(11)

「點解要跟住入黎。」
我盡量冷淡，但真正原因係講太多我驚我會忍唔住再喊。

「因為我愛你，我會證明俾你睇。」
佢拎出果隻狗狗公仔。

眼神雖有不捨，但更多既係堅定，你到底有幾愛我呀？

佢……一野整爛隻公仔。
媽呀，依家個個女仔都咁暴力架？



望住我精心揀既公仔，被Anna一手摧毀（其實係雙手），好似係個天提醒我唔好心軟咁。

「宜家你信啦……我同佢無野架……」
佢用一對水汪汪既眼睛望住我。

「算啦。」

佢以為我既意思係我唔再追究，露出一臉欣喜既笑容。
「我地以後都要相信對方……唔好再唔信任對方啦……」


佢拖起我既手，想挨個頭落我膊頭度。

但係我甩開佢隻手，再行開一步。

「你……做咩呀……」
Anna好難以置信既樣。

我別過頭，低聲講道。
「我話算啦，係指……我地之間，算啦。」



經過幾秒既冷場，升降機亦停到21層，留低一臉茫然，仍然未接受到今日發生既事既Anna，翻返屋企，再次返返去對我不離不棄既床上面，望住對我不離不棄既天花板。

「天花板呀……點解你可以做到對我不離不棄……但係我就偏偏做唔到？」
忍左好耐既淚水，係天花板面前釋放，我放聲大哭。

對唔住Anna，祝你幸福。

隔壁既你，一定以為陸仔係我地感情破碎既導火線吧……希望你唔好憎左佢啦……如果唔係又要佢花心機追你，佢已經等左你八年啦……

對唔住呀Anna，係你生日先咁對你……嬲我啦……