我係網上面識左個女仔: 外傳-對不起

大家好！我係Cedric，即係陸仔。

我同Anna係讀同一間小學既，即係話Anna係我小學師妹。我係小學三年班(被迫)參加課外活動嘅時候識到Anna，果時開始，我就鍾意左讀緊二年級既Anna，果陣覺得佢好nice，又好可愛，又pure又true，但係毒向左走向右走性格，無同Anna做到朋友，一直暗戀Anna，暗戀到我六年班。

我鼓起勇氣，去左搵Anna，問佢打算讀邊間中學，為左同佢繼續一間學校，我一定會好努力去考佢理想中學，Anna對於我呢個唐突既問題無多留心，答左我，跟住我好努力考呈分試，最後真係入左Anna所講果間中學。

不過Anna無入到第一志願，我地最終都係唔同校，我以為自己四年暗戀終於要告終，不斷勸自己放低，一段時間過左，我唔再成日諗住佢，我以為自己已經放低左，但係係中二某日，我竟然係旺角見到Anna既蹤影，心跳既感覺突然出現翻，之後又一直對佢念念不忘，我先發現自己仲鍾意Anna，跟住就一直鍾意佢到依家啦，一直以黎做Anna既「守護天使」，默默伴在旁。

我中二發現自己仲鍾意Anna開始，所有節日呀Anna生日呀乜野特別日子都好，都會以「小蘋果」呢個名送禮物比佢，同寫卡祝福佢，至於點解要叫小蘋果……係因為……我認識Anna果個興趣班，其實係寫詩，我第一首作品就係叫「小蘋果」……入面寫緊既其實就係Anna，果首詩仲被人貼堂，不過Anna應該唔知我寫既係佢。



今年，坐我後面果個青蛙仔，屋企發生左少少事，所以搬左去Anna屋企對面住。

我係一個好自私好賤既人，我認我有異性無人性架，我真係好鍾意好愛Anna，為左佢我咩都做得出。

有日佢搵我傾計，食飯時間，我一路行一路吹水一路諗，佢想講咩……？一定係關於佢呢排發生既事，如果係父母問題，佢就搵老師啦……洗唔洗搵我？如果係咁……應該係感情問題，例如……佢女朋友？但係佢有女朋友架咩？

坐低之後，我比佢先開口，坦言我想佢幫我追Anna，佢無正面回答我，然後就同我講佢既野。

佢話佢阿爸之前走左佬，阿媽因為咁自殺左，之後發現原來佢阿爸去左照顧佢舊情人既仔女，但係依家佢個『女』係佢女友。



我突然醒起，母親節我送禮物比Anna既時候，見到Anna同個男人一齊並行，宜家諗翻……果個男人好似就係青蛙仔阿爸，好耐之前青蛙仔po過張相上FB，就有佢阿爸。

唔通……佢女友就係Anna？唔怪得知頭先唔正面回答我啦……

既然你問我意見……你同Anna都唔係識左好耐姐……我敢肯定我愛佢多過你愛佢，我把心一橫，教唆青蛙仔離開Anna，只有咁，我先可能乘虛而入。當然佢話到讓Anna比我果陣我無一口答應，講到好似好委屈佢咁，不過我熟識佢性格，咁樣唔單止唔會動搖到佢，反而可能令佢更加覺得應該讓Anna比我。

最後？因為青蛙仔既幫助，我成功令Anna成為我女朋友！不過其實當初佢都係愛住青蛙仔，雖然我唔知我有咩比唔上佢，我將佢同佢阿爸既事講左比Anna知，當然有加啲鹽加啲醋，講到青蛙仔同佢一齊好辛苦，等Anna唔再執意同青蛙仔一齊，最後，我用誠意打動到佢，我地成為左真真正正既情侶，佢望落亦慢慢放低青蛙仔。

我同佢就幸福快樂咁生活落去，好似童話般既結局。



考完DSE後，有一日，我經過Anna屋企樓下一間茶記，聽Anna講呢度有好多佢同青蛙仔既回憶，我見到青蛙仔係果度一路食一路喊，原來……你竟然有咁愛Anna……隔左咁耐都仲未放低佢……遲黎既悔疚感一湧而上，對唔住呀青蛙仔……