結局篇(支線B)

「劉Sir,嗰個葉信希D屋企人嚟咗啦…」

「哦…傑仔,唔該晒你…」

「劉Sir…劉Sir…我係葉信希嗰老豆…」

「亞Sir…我係…我係方子怡嗰媽咪…」





「唔使急!唔使急!逐個逐個嚟…咁啦……發仔!你過嚟…」

「哦?劉Sir…有乜吩咐?」

「你幫呢位太太處理咗方子怡單嘢先!方子怡佢可以走得啦…太太…你跟呢位亞Sir辦埋D手續先…」

「哦!唔該晒亞Sir…豪叔,信晴…咁我跟呢位亞Sir搵返子怡同攪埋D手續先…」

「好呀…好呀…」





「唔係喎劉Sir…方子怡佢襲警喎?可以就咁走得㗎咩?」

「傑仔…上頭話可以放得就放得,你唔好問咁多…跟足程序做嘢就得…」

「Okay!收到晒…」

「好啦…葉生…你哋跟我入房…我詳細講吓葉信希嘅情況俾你哋聽先…」

「好…」





「唔使客氣…你哋隨便坐…駛唔駛要D嘢飲?」

「唔使啦…唔該…信晴,你要唔要?」

「唔要啦…」

「Okay…咁我哋可以入正題講返你個仔單嘢先…有一個好消息,一個壞消息…你哋想聽邊個先?」

「好消息先啦…」

「好消息係葉信希襲警依條罪可以撤消…」

「咁壞消息呢?」

「佢涉嫌強姦條罪可能會被正式起訴…」





「強姦?亞劉Sir…我個仔點會咁做?我唔信…」

「我哋都係依法辦事…根據受害人口供,葉信希强行將受害人拉入殘廁…企圖將受害人施暴…」

「吓?我個仔唔會咁嘅…當中一定有誤會!係喎!得個所謂嘅受害人講?佢講咩都得啦…」

「受害人啱啱驗咗傷,證明胸部嘅瘀痕確係出自你個仔葉信希對手,致於受害人早前提交被告嘅體液,就Send咗去法証科,依家等梗化驗報告…」

「吓?劉Sir…乜真係咁大件事?」

「亞哥唔會咁做㗎!」

「我諗你哋都係請定律師穩陣D…」





「劉Sir…咁我哋依家可唔可以見吓我個仔呀?」

「唔……Okay啦…你個仔依家係拘留室,我帶一帶你哋去…跟我嚟…」

敲門聲……

「入嚟啦…」

「唔好意思…劉Sir…」

「咩事?大舊…」

「劉Sir…可以出一出嚟嘛?」

「好好…唔好意思兩位…你哋等等先…」





房間內…

「爸…亞哥佢會冇事㗎可?」

「信晴…你放心!你亞哥一定會冇事…就算洗晒我D棺材本請律師…我都在所不惜!」

電話聲…

「信晴,係你亞媽打嚟……」

「喂…老公…做咩咁大獲呀?亞仔佢咩事呀?」

「老婆你又知嘅?」





「頭先方師奶打嚟…係佢話過我知㗎…喂…依家係我問你亞仔佢點呀?」

「詳細我都唔係咁清楚…就係知亞仔係拘留室,唔准保釋…我同亞囡啱啱正準備去睇佢…」

「咁大件事?」

「老婆,你唔使擔心…有乜嘢返嚟先講啦…」

「好啦…咁有乜嘢你第一時間打俾我啦…」

「知啦…」

「點呀?亞媽好擔心呀?」

「囡,做人父母點會唔擔心?如果換轉你有事,亞爸亞媽一樣會咁擔心…哎呀!…啋啋啋…」

「爸,希望亞哥今次可以大步躝過…」

敲門聲…

「唔好意思兩位…頭先我哋講到邊話?」

「哦…劉Sir,你話信希好大機會會被起訴…」

「係…係呀…不過啱啱我又有一個好消息…」

「吓?」

「就係葉信希涉嫌强姦條罪正式撤消…」

「吓?亞Sir…我冇聽錯吓話?亞囡,你聽唔聽到?」

「冇…你哋冇聽錯…」

「亞Sir,點解一時有事,一時有冇事㗎?」

「因為我哋嘅夥計係殘廁發現咗一個針孔鏡頭,我啱啱睇完條片,可以証明你個仔係無辜…」

「吓?咁神奇?不過咁都好…最緊要亞仔佢冇事…」

「你個仔今次可以冇事,全靠裝部針孔嘅變態佬…講真真係唔知係好彩定唔好彩…我哋依家會盡快搵條變態佬出嚟…不過依D就唔關你哋事…哎呀…仲有…原來告葉信希嗰個女仔係
你個仔嘅同班同學…係條片見到…係個女仔完全採取主動,所以唔存在任何強姦嘅成份…依家我哋會搵返佢出嚟,控告佢涉嫌誣告他人,捏造事實…」

「亞Sir,咁我個仔係咪可以走得啦?」

「理論上可以,之但係我哋要同佢落多次口供…我哋差館手頭上仲有好多Case,暫時分配唔到咁多人手…我諗都要一段時間…你哋簽完個名可以選擇留底或者返屋企等…」

「劉Sir…頭先你話可以俾我哋見吓我個仔㗎?」

「唔得啦…頭先係因為確定你個仔會被控強姦…諗住俾吓你哋見吓…依家肯定你個仔都冇事囉…你哋返到屋企都有排見啦…」

「咁呀…」

「咁咩!我係你出去簽埋個名就返屋企等啦…」

拘留室內…

「亞Sir,我係無辜㗎…你好心放返我出嚟啦…」

「細佬,我哋只會依法辦事,如果你真係無辜…你一定會冇事…唔好諗咁多啦…」

「咁我想問同我一齊D朋友呢?佢哋點啦?」

「唔好意思,我都唔係咁清楚…如果你有機會自己查清楚啦…」

「………」

「係呢…細路,你衰咩要入嘢依度架?」

「唉…我係被人屈強姦囉…」

「哦…原來係個小色魔…你哋D後生仔好心唔好睇咁多AV啦…嗰D情節呃人㗎…你估周街都係AV女優咩!」

「我冇呀…我真係被人屈㗎!」

「Okay…我明…我明嘅…」

「………」

開閘聲…

「咦?大舊…你落嚟做咩呀?…」

「星仔…係呀…劉Sir叫我落嚟放人呀…叫我帶返依條靚仔上去落過份口供喎…」

「哦…咁唔阻你啦…」

「阻乜鬼!搵日飲茶再講啦…喂…細路,出嚟啦…知你俾人困咗係度好耐啦…」

「吓?亞Sir…我係唔係走得啦?…」

「哼…算你好彩!咁啱殘廁有部針孔証明唔關你事…你上去落返份新口供就走得啦…」

「太好啦!都話唔關我事啦…係呢?亞Sir…我D朋友有冇事呀?」

「冇事啦…全部走晒啦…」

呢個時候,葉信希係條走廊度居然同Christy狹路相逢…

「Christy?…」

「係你?葉信希!!」

「點解你要咁做呀?做乜屈我强姦你呀Christy?…」

「哼!我話過要你後悔一世!!今次算你好彩…不過我唔會就咁算數…你睇住嚟!你實有一次衰係我手…」

一個鐘頭後…

「葉信希…你睇下有冇問題…如果冇問題嘅話…你係度簽個名就走得架啦…呀!係呀…仲有呢部係你嘅電話 …你可以攞返走…真係唔好意思…裡面D訊息我哋警方全部睇過晒…你自己睇返有咩事啦…」

「好啦…唔該亞Sir…係呢…我想問嗰個原先告我個女仔會點㗎?」

「佢呀?簡直係浪費警力!嚴重嘅話可能會入女童院…不過要睇返佢份心理報告…多數嘅情況係一般未滿十八歲嘅人士都列入警司警誡…好啦…小朋友…你可以離開依度啦…」

葉信希被人困係差館度兩日,依家佢終於呼吸到乜嘢叫做自由嘅空氣!係依個時候,佢即刻攞部手機出嚟,見到十幾個未接來電…其中大部份係豪叔同埋豪嬸,而肥仔昌都有二個,當然佢最著緊嘅當然係Ruby有冇揾過佢…

結果係……冇!

正當佢非常失望嘅時候,whatssap突然傳嚟Ruby俾佢嘅一段錄音……

另外早前方面,豪叔同信晴決定返屋企等信希…㸃知佢一入到自己間房嗰時就忍唔住大聲叫咗出嚟…

「哎呀…」

「爸,仲咩呀…你唔好嚇我呀!你有冇事呀?」

「哦…信晴…我冇事…我冇事…我見到隻曱甴姐…被我整死咗啦…」

「你隻腳仲未好返架!自己小心呀…」

「得啦…」

原來豪叔咁大反應係因為佢發覺擺針孔嘅櫃桶唔記得上鎖…而且更俾人攪過嚟…呢一次真係非同小可!黑白針孔機裡面張SD卡仲唔見埋…正當佢諗緊究竟係邊個做嘅時候…一個神秘号碼係佢部電話傳嚟一段Whatssap影片…

嗰段片正正就係豪叔偷拍信希同Ruby嘅口交片段…依個時候,唔使講,兇手己經呼之欲出…

同一時間,

嘟嘟…嘟嘟…(電話聲…)

「喂?…」

「豪哥呀…我真係好掛住你呀…」

「Queennie…講!你究竟想點?」

「豪哥…你冷靜D先…其實我有D事想叫你幫吓手姐…之不過咁啱你俾我發現咗D秘密…我緊係增加手上嘅籌碼啦…」

「………」

「不如咁啦…我見你隻腳仲未好返…你睇吓你屋企幾時冇人…我再上嚟同你傾傾…好唔好姐?」

「乜我可以話唔得咩?」

「你知道就好啦…嘻…唔使急…不過要快喎…」

「後日啦…依段時間就差唔多啦…」


「好!咁就後日見啦…豪哥…嘻嘻」

較早前一段時間…

「囡…囡呀…你走得咁快做乜呀?你等埋媽咪先啦!」

「唔關你事!我嘅事唔使你管!你唔好再跟住嚟…」

「囡,究竟媽咪做咗乜嘢令到我咁黑你憎?」

「你自己心知肚明…你同個社工D嘢我諗起都覺得核突呀!」

「囡呀!全部嘢只係你一個人由頭到尾諗出嚟咋!你知唔知道你有病呀?你聽我講睇返Doctor Ho啦…你有成半年冇覆過診啦…」

「我冇事!我冇事!有事嗰個係你哋呀!!」

「囡…唔好走呀…你聽我講…」

方子怡好快抛底咗佢媽咪,終於佢漫無目的嚟到一個商場裡面…但原來係佢同方太嗌交嘅時候,有一個人靜雞雞咁一路跟踪住佢…

「信希…救命呀!個變態社工係度跟住我呀…雖然佢戴住口罩…但係我好肯定係佢…我喺希慎呀…信希你快D過嚟救我呀…」

依一段係Ruby留俾佢唯一一段嘅錄音…之後無論信希點樣Whatssap或者打電話俾佢,Ruby由始至終都冇再回應,就好似世界上突然間再冇咗Ruby依個人…

葉信希依個時候非常著急,其實除咗方太,豪叔,Dr.Ho同埋社工鄒永恒知道Ruby係有妄想症之外,根本就再冇人知依件事…就算葉信希係佢男朋友!所以葉信希非常相信Ruby嘅說話,加上上次佢對社工嘅印象係咁差嘅關係…所以佢己經認定鄒永恆係會傷害Ruby嘅一個仆街…

「Ruby……你等我呀…你千奇唔好有事呀…」

講返Ruby一個人傻更更去咗銅鑼灣希慎,嗰度出咗名係超級唔好行…記得有次誠品開幕冇耐,佢同信希第一次嚟依度嘅時候…兩條失魂魚摸咗一輪先上到間書局…仲有嗰陣時依度D扶手電梯出晒名…乜嘢出名?知唔係透明扶手走光電梯囉!依度標榜低耗能建築、綠色元素嘅商場,所有樓層嘅欄河同扶手電梯兩旁位置,一律採用透明玻璃設計,但美觀獨特嘅設計卻暗藏春色!只要隨意抬起個頭,到處都係走光黑點,連亮麗嘅反光地板亦都變成露底陷阱…

就係嗰次葉信希同Ruby係誠品搭緊條電梯落嚟向下望嘅時候,佢哋居然見到有條麻甩佬鬼鬼崇崇裝緊Ruby嘅裙底…葉信希當然即刻衝落去追,但係好肯定嗰條麻甩佬一定身有屎,因為佢己經以接近光速嘅速度走甩咗…

自此以後,佢哋兩個拍拖都冇嚟過呢個商場…


現場係希慎廣場中庭…

好多人圍住係度食住花生睇戲…

「方子怡…你冷靜D先…你唔好企咁開…你過返嚟先啦!」

「你個變態佬唔好再行埋嚟!唔係我真係跳落去㗎…」

「好好好好…萬大事有商量!一係我叫你男朋友仔嚟好唔好?」

「信希?」

「係呀…係信希呀!哎呀!一時醒唔起我冇佢電話添…咁啦
…不如你自己打俾佢啦…」

呢個時候,鄒永恆愈行愈埋…

「你過嚟仲乜?我真係會跳落去㗎!!」

Ruby果然言出必行,呼一聲!成個人己經飛咗落去…點知Ruby快鄒永恆比佢更加快…千均一髮, 鄒永恆隻手隔住攔杆扶住Ruby另一隻手…

但係搖搖欲墬嘅Ruby居然係依個時候不斷掙扎,而同一時間葉信希終於都趕到嚟…

原本信希一路趕過嚟仲驚住唔知係邊到揾Ruby出嚟?㸃知佢一入到商場就即刻見到依個咁緊張刺激嘅場面…

「哇!Ruby…」

你話依個世界D人係唔係冷血?係依個咁危急嘅關頭,圍觀嘅人居然繼續食緊花生等睇戲…完全冇人走過去話幫吓手!一個二個睇住鄒永恆就嚟捱唔住…係差在幾時頂唔順鬆開隻手姐…不過好撚在葉信希係依個時候啱啱趕到…

「行開…行開…睇戲嘅行開啦…咪阻撚住晒……」

「仆街社工…你頂住呀…千奇唔好鬆手呀!」

葉信希用盡全身氣力飛撲埋去捉住Ruby另外一隻手,千辛萬苦終於同個社工費盡九牛二虎之力將Ruby抬返上嚟…

依個時候,D人見Ruby嘅空中飛人表演就咁完咗…人群亦開始散開…

「吓吓吓吓…」

「吓吓…吓」

「Ru…by…究竟…發生咗…咩事?係唔係…係唔係依個…仆…街又攪你!」

「喂……你…你唔…唔好誤會…呀…我…我冇呀!」

Ruby由始至終都冇出過聲,之唔係因為佢塞驚冇神係信希佢哋面前暈低咗…

「Ruby…Ruby…你見點呀?你唔好嚇我呀…」

「仆你個街…死社工!你仲唔快撚D Call白車…快D啦…」

四十分鐘後,某某醫院內…

「醫生…Ruby佢點呀…點解佢會無啦啦暈低㗎?依家佢仲未醒㗎?」

「請問你係病人邊個?」

「我係佢男朋友…」

「咁請問有冇傷者直系親屬係度?例如爸爸媽媽…」

「屌…依家係我問你!唔係你問我呀!醫生…」

「對唔住…我哋只會同直系親屬講解病人嘅情況…」

「我屌你老母呀…」

「信希…你冷靜D先…醫生…醫生…我係負責呢個病人嘅社工,我己經通知咗佢媽咪嚟緊架啦…我知你哋醫生好忙…不如咁啦…你可唔可以將病人嘅情況話我知…之後等我再話返俾佢媽咪知都係一樣姐…」

「咁呀…」

「一於咁話啦…」

「社工…我諗唔使啦…你睇下前面…Ruby佢媽咪嚟咗啦…」

急速腳步聲…

「醫生…我嗰女…我嗰女點呀?亞女你千奇唔好嚇我呀…」

「你好…你係方子怡媽咪?Okay…你唔介意我係度講?」

「醫生…你講啦…我個囡究竟發生咗D咩事?」

「簡單嚟講,你個囡腦度有個腫瘤…今次佢暈倒嘅原因係個瘤壓住部分神經線…」

「吓…?點解會咁㗎?」

「吓!Ruby個腦度有個瘤?…」

「唔…你哋又唔使咁擔心住…依家醫學咁昌明…實有方法醫好嘅…詳細我哋會作更仔細嘅檢查…確定方子怡腦內嘅瘤位置,大小…之後再作出適當嘅治療…你哋放心啦…」

「醫生…咁即係點?係唔係要做手術?成功機會有幾大?佢會唔會死㗎?醫生你答我啦?」

「係啦!醫生…求吓你一定要醫返好子怡呀…我只係得返佢一粒囡咋…我唔可以冇咗子怡㗎!」

「方太…你哋冷靜D先…咁樣解決唔到問題㗎…」

「冇錯!依位先生講得冇錯…你哋唔好咁激動…病人依家絕對唔可以再受刺激…我諗病人好快會醒返…係呀!太太 …我建議你同你先生都做一次腦部掃描…因為依個病都有一定機率有遺傳性…」

「我…先生過咗身幾年啦…」

「哦?唔好意思…方太…不過我都想問吓你先生因咩事過身㗎?」

「係肺癌…」

「哦…都係嗰句啦…我寫張紙俾你排期去檢查…你一陣去登記處揾何姑娘就得㗎啦…另外方子怡檢查仲需要D時間…冇咁快知道結果…你哋睇完佢…過咗探病時間就好走啦…」

「醫生…仲有一樣嘢我諗要話你知…我係負責方子怡嘅社工…我叫鄒永恆…其實子怡除咗身體上有毛病之外…佢心理上都有問題…佢有精神病嘅記錄…佢嘅精神科醫生診斷佢有
過度妄想症…早期都有食藥…但係依家有成半年冇覆診…我擔心佢情緒方面會有好大問題…」

「哦?咁你有冇方子怡睇開精神科醫生嘅聊絡方法…」

「有呀!Dr.Ho…有呀!嗱!我身上啱啱有佢嘅卡片…」

「咁方子怡有乜嘢消息我哋院方會盡快通知你哋…」

「咪住…咪住先!…你哋究竟講梗咩?Ruby有咩精神病?」

「信希…冇錯…其實我都有話俾你豪叔知…子怡因為佢爸爸嘅死…對佢打擊實在太大…先致會有咁嘅病…唉…估唔到依家個腦仲生多咗個瘤…子怡實在太可憐啦…」

「吓?Ruby…佢…佢真係有精神病?」

「信希…我諗依段時間辛苦你照顧子怡啦…你知子怡佢成日懷疑我同鄒先生…」

「乜原來件事係咁…兩位真係對唔住…對唔住方太…對唔住鄒生…我唔係有心㗎!」

「傻啦…我哋冇怪過你…其實你咁樣做就足以證明你係幾咁愛子怡…」

「希望子怡今次可以大步躝過呀…」

二個鐘後,方子怡終於醒返…佢第一眼睇到係信希緊緊拖住自己隻手攰到扯晒鼻寒訓咗係床邊,依一刻佢感覺到好温暖!自從方子怡嘅爸爸死咗之後,佢好耐都冇依種被愛嘅感覺…依個時候,佢諗返起初初同信希拍拖嘅温馨片段,兩行淚水不自覺流咗出嚟…但係佢仍然小心翼翼鬆開信希隻手,然之後係信希左邊面額輕輕錫咗一啖…依依不捨自己一個人静鷄鷄離開咗間病房…

至於豪叔方面,自從收到Queennie嘅電話之後佢就寝食難安,究竟Queennie要佢做D乜?唔會殺人放火掛?今日佢終於知道答案…

(叮噹…叮噹)

豪叔非常唔願意之下打開大門…

「Hi…」

「嚟咗啦你…」

「豪哥你好似唔係咁歡迎我咁喎…仲唔開門?」

「入嚟啦…」

「咦?你隻腳好似好返好多囉…唔使再用拐杖囉喎…」

「我冇乜事…係啦…唔好咁多廢話啦…講!究竟你想點?」

「喂…唔使咁緊張喎…Take it easy!其實都冇乜嘢…今次嚟係有件事想豪哥幫吓手姐…」

「乜我可以幫到你手咩?」

「當然有啦…仲要係得你幫到我咋!咁啦…為表誠意…首先張SD卡俾返你先…你放一萬個心!我絕對冇留底…只要你答應幫埋我…我就連電話段片都會Del埋…」

「好!我信你!你繼續啦…」

「我想你幫吓手叫我老公心甘情願同我離婚…」

「吓?離婚?上次係你老公唔啱…之但係唔使離婚咁嚴重掛…不過係啦…你兩公婆離唔離婚…好似都唔關我事㗎?講衰D…就算你老公唔肯,你都可以單方面申請離婚㗎…」

「我梗係知啦…不過我等得…我個肚唔等得囉…」

「咩話…你個肚?」

「係呀…豪哥…其實…其實我有咗大陸富商個BB…啱啱有咗差唔多兩個月…佢話應承會同我結婚…而且佢唔介意我有個仔…仲會照顧埋佢…不過條件係要我盡快離婚…」

「你…你…唉…原來係咁!不過你個仔都咁大啦…你仲攪咁多嘢做乜?」

「豪哥…我就係為咗我個仔…先忍咗咁多年!如果唔係?我晨早離咗婚…咁多年嚟,你知唔知我生活有幾咁辛苦?依家襯我仲有個有錢佬搭我糖,仲要唔介意我有個咁大個仔…你話我會點簡?」

「但係…話晒你同老周都咁多年感情…你捨得咩?」

「感情?我承認佢真係對我唔錯…我起初都以為終於搵啱對象…但原來一路以嚟都係自己一直呃緊自己…我好耐之前就己經想同佢離婚…但點知後嚟居然意外有咗德仔…我掙扎咗好耐好耐,到最後一刻我都係唔捨得落咗去…依十幾年,除咗睇住德仔一日一日咁長大值得我開心之外,其他嘅我都好痛苦!你試下同一個冇晒感情嘅人生活十幾年…你話有咩感覺?」

「但係你有冇為德仔諗過?佢唔介意咩?」

「我點會冇為佢諗?佢係我最重要嘅親人…所以我依架盡最大嘅努力鋪排俾佢最優質嘅生活…」

「但係你有冇同佢講個?依D全部都係你一廂情願!先唔講老周先嗰畢…萬一你個仔唔跟你呢?咁你又會點?」

「我都係會選擇離婚 …」

「咁我只可以講句祝你好運!」

「但係我想豪哥你係我老公面前講到佢上大陸叫鷄…要佢好内疚,仲有我要佢答應因為對我不忠而離婚…」

「吓?好似難D喎…」

「所以先叫你幫我!我要盡快辦理離婚手續…」

「真係冇彎轉?」

「豪哥…我要爭取自己嘅幸福…我己經浪費咗咁多年青春,我唔想咁樣繼續落去…求吓你做吓好心幫下我啦!」

「咁…好啦…我盡量啦!不過我係估唔到你同老周依段姻緣係由我一手撮合,到最後又係我親手拆散姐…」

「豪哥,多謝你…」

「唉…」

依個時候,豪叔個電話突然間響起…

「唔好意思…你等陣先!」

「喂……老婆…咩…咩事呀?」

「衰佬…大件事呀!方太頭先打嚟話信希同佢個囡係醫院天台度跳咗落嚟呀……」

「吓?點解會咁架?咁亞仔佢哋有冇事呀?」

「我唔知呀!方太未講完就已經斷咗線…我依家趕緊去呀!你都快D嚟啦…」

「哦…我即刻嚟…」

收線後……

「Queennie…我屋企有D緊要事…我依家趕住去醫院…至於你單嘢…我會幫你…你放心!遲少少再Call你…我走先啦…哦…唔係…你要同我一齊走…行啦…」

「真係走得咁急呀?」

「係呀…」

「我仲諗住同你打返最後一場友誼波添…」

「吓?咩嘢友誼波?」

講返醫院之前嗰度先…

方子怡離開病房十五分鐘後,信希終於慢慢清醒過嚟,點知佢發覺居然唔見咗Ruby!大驚之下,佢即刻仆出去問櫃枱問D姑娘…

結果當然係令佢失望…

係佢依一刻唔知點算嘅時候,突然間係條走廊聽到兩個清潔工友嘅對話…

「黑仔 …突發事件…龍爺話係天台上面見到有個靚妹想跳樓呀!佢依然勸緊個女仔…叫我哋報警同上去幫拖喎…」

「吓…咁大獲?咁拿拿淋上去睇吓啦…」

信希驚喜萬分跟住依兩個工友,果然嚟到天台睇到一個女仔危坐係欄杆邊大叫大壤…

「你唔好再行埋嚟!我真係跳落去㗎!」

「小妺妹…你冷靜D先…你咁後生!有D乜嘢會睇唔開呀?」

「我叫你行開呀!」

「得得得~我企係度唔郁!你唔好亂嚟呀!」

信希依個時候邊嗌著Ruby,邊全力走向佢身邊…

「唔好意思…依個病人係我女朋友…」

「哦…你快D叫返佢落嚟先…我報咗警啦…」

「Ruby…你做咩咁傻要跳樓自殺!有咩嘢事落返嚟先講!」

「信希!你醒咗啦?…你求吓你唔好行埋嚟…我…我好辛苦我唔想再做人啦…」

「傻瓜!有乜事咁睇唔開!…我一定會係你身邊㗎!」

「信希…你幫我唔到㗎…我諗你已經知道我一路以嚟都有精神病…而且個病情都唔輕,我個腦成日諗到好多唔真實嘅嘢,我唔知邊D係真,邊D係假…我好辛苦呀…而家…而家我個腦仲有埋個瘤…信希…我真係唔知點算??嗚…我…我己經決定咗係依度跳落去一了百了…」

「Ru…by…等陣…你等陣先…有乜嘢唔可以解決?你就咁跳落去甘心咩?你點對得住你爹D媽咪?自從你爸爸死咗之後…你知唔知你媽咪幾咁擔心你!你話你辛苦?但係你媽咪比你更加辛苦你究竟知唔知?但係佢始終冇放棄過你!你知唔知究竟點解?係因為你係佢唯一一個女呀…而家你話死就死…有冇諗過佢呀?」

依個時候,樓下已經有一架消防車同一架警車到咗…

「仲有你有冇為我諗過?你死咗你叫我點算?我葉信希只係愛你方子怡一個,無論你有冇精神病或者個腦度有個瘤,我都會同你一齊!只要你唔好放棄自己…我可以為你做任何事㗎…」

「信希…」

「Ruby…聽我講…俾隻手我…等我哋一齊勇敢咁面對未來嘅路…」

「信希…」

依一刻Ruby比信希嘅說話感動咗…佢決定懸崖立馬準備拖返信希隻手落返地面,但係依個時候佢居然突然間被一陣唔知邊度嚟嘅强風吹跌,仲身不由己準備由天台跌落地面…

好彩千均一髮信希嘅右手啱啱好趕得切捉緊Ruby雙手…

「哇!Ruby…你支持住呀!…仲有…你哋三個仲望?…仲唔快D過嚟幫手…」

三個工友幾乎同一時間跑去想捉住Ruby,當大家幾乎好肯定四個人救一個人上嚟係絕對冇問題嘅時候…一陣強風又再吹過嚟…而同一時間三個工友就咁掹大雙眼眼白白睇住信希同Ruby由天台跳落去…

係咁高嘅天台跳落去,正常人都知一定死挭!信希同子怡依對苦命鴛鴦整定要一齊拖住手齊齊落去見閻羅王…

砰砰清脆兩聲!大家可能會想像到佢哋可能血肉橫飛?屍横遍野?定係斷頭斷手斷腳?Sorry…以上所講嘅通通都冇出現到…而且佢哋係咁高嘅地方跌落嚟仲要係絲毫無損!點解?知唔係家吓D消房員工作效率真係一流,喺信希同Ruby仲係天台糾纏嘅時候,佢哋己經係地面精心佈署咗一個舒適嘅黃色充氣墊等候梗佢哋兩個…

(筆者以前好愚昧咁覺得做消防依個行業係一份好筍嘅政府工…而且條件只係得一個,就係你夠大隻!返一日放兩日…哇…依D工屌你正到呢?相比同警察份工,分分鐘日日活係槍林彈雨之下,簡直爽到冇朋友!點知原來係錯晒…仲要係錯得好離譜…其實佢哋所謂嘅一日,係指24小時…正常普通人工時8小時嚟計…即係一日等於我哋嘅三日,所以返一日放兩日係好合理…其次佢哋次次出勤,唔計之前D白痴新聞…乜嘢開唔到門call消防,試戴鑽戒除唔到又或者試著boot之後除唔到又Call消防之外…基本上佢哋每日On duty分分鐘都係同死神交戰…早前嗰單新聞有條友係屋企開煤氣自殺累街坊,攪到上去救人班消防員全部炸傷,筆者深深感到消防人員嘅使命係幾咁偉大,尋日睇新聞先知其中一個消防隊長終於撤手人環…筆者都忍唔住滴咗兩滴眼淚…)

講返入正題先,信希同Ruby依個時候雙雙拖住手大字型灘咗係一個充氣墊上面郁都唔郁…

「Ruby…連個天最後都俾個機會你叫你唔好死!加油啦…Ruby!我一定會係你身邊支持你!」

「信希…好多謝你!」

「傻瓜!你係我女朋友嚟…唔駛同我客氣喎!…」

「信希…你真係唔介意我嘅病?或者下一分鐘我可能當咗你係我殺父仇人…又或者下一分鐘我己經死咗…」

「我唔介意!你放鬆吓啦…唔好諗咁多嘢啦你…知唔知?」」

「喂…喂…喂…你哋兩個冇事嘛?」

另一方面嘅稍後時間,豪嬸同信睛已經嚟到醫院,佢哋原本約咗方太係大堂詢問處等,但係居然遲遲都未見到方太,打電話又搵唔到佢,於是乎佢哋急不及待走去詢問處正準備問吓D姑娘…

「唔好意思…頭先依度天台係唔係有人跳樓呀?其中一個係我個仔嚟㗎…」

「哦…佢哋係晒七樓,你哋上到去再問人啦…」

醫院病房內…

「劉Sir…乜又係你哋呀?」

「依句說話應該係我同你哋講先啱喎…你哋都幾煩㗎喎…」

「唔好意思…我都唔想…一切純屬意外!」

「你一句意外就講得口響…難為我哋班夥計姐…你知唔知你哋依一跳,出動晒警察,消防同救護…簡直浪費政府公帑…」

「對唔住…劉Sir…」

「唉…一陣有個夥計會同你落份口供…循例姐…我哋己經查清楚今次純粹係個別企圖自殺個案…今次我哋真係要講拜拜,唔好再見啦…」

「麻煩晒…劉Sir…ByeBye…」

係劉Sir走嘅同時,豪嫂,信晴同啱啱就搵到入嚟…

「仔…你冇事嘛?嚇死我啦…」

「哥…你冇事嘛?」

「媽,細妹…我冇事…你哋睇…冇穿冇爛…」

「咦?仔呀…我想問子怡係邊?唔見佢嘅?」

「子怡係隔離嗰邊病房…不過佢啱啱去咗做腦部掃描…放心…佢同我一樣…乜事都冇!」

「冇事就好啦…係呢…你老豆呢?唔見佢嘅?」

「我都唔知呀?我仲估老豆同你哋一齊嚟添…」

「個衰佬都唔知攪乜鬼?自己個仔發生咁大件事都可以咁耐都未嚟?有冇攪錯?」

「媽…老豆隻腳啱啱先好返…横掂我都冇乜事…不如你打電話叫佢唔使嚟啦…要佢撲嚟撲去就唔好啦…」

「咁都好…我依家打俾佢啦…順便去個廁所先…你同你細妹傾兩句先…」

豪嫂行開後…

「哥…其實你唔好怪做亞妺嘅多口…自從你同Ruby拍拖之後…你覺唔覺得我哋屋企好似發生咗好多事?」

「妹…對唔住…帶俾你哋咁多麻煩真係唔好意思…其實Ruby佢都唔想㗎!」

「佢唔想?」

「係呀…其實…」

信希於是一五一十簡略將Ruby嘅精神病同個腦度有個腫瘤話俾信睛知…

「吓!乜原來係咁呀?哥…真係辛苦你哋啦…」

「唔辛苦!我依D點叫辛苦…最可憐都係Ruby佢姐…」

「你倆兄妹傾成點呀?」

「媽…你返嚟啦?搵唔搵到老豆呀?」

「你個老豆都唔知攪乜?打極電話都冇人聽!唔理佢啦…係呀…亞媽又要趕住返工!差唔多要走啦!囡…你同我一齊定留多陣?」

「我冇乜事…你哋兩個一齊走啦…」

「咁好啦…你自己休息多D啦…」

「哥…Ruby一定冇事嘅!你自己抖吓啦…」

係佢哋兩母女走咗之後…信希原本都想瞓一陣,但當諗起Ruby嘅時候…佢就好苦惱,把口就話同Ruby一齊面對,但實則佢可以幫到Ruby D乜?就喺佢諗唔通嘅時候…佢部電話傳嚟Christy俾佢嘅Whatssap信息…

「葉信希…俾D好野你睇!」

隨即send咗一條影片俾佢…

(段片就係豪叔偷拍信希同子怡係房嘅口交片段…)

信希睇完之後嚇到成個電話跌咗落地下,同一時間,Christy打電話俾佢…

「葉信希同學…你好!」

「Christy…點解你會有依條片?你…你究竟想點?」

「連個天都俾個機會我…點解我會有?嘿…唔關你事喎…不過我有股衝動想將條片forward俾D同學仔囉!」

「喂…你…你千奇唔好亂嚟…」

就係依個時候,豪叔同一時間終於嚟到…
已有 0 人追稿