落街打羽毛球慘被活力阿婆扣殺，心情好低落: 21

四眼妹到底諗緊咩呢?定還是佢已經咩都無諗..
臨走之際，我見到小食部入面個魚蛋佬比左同情既眼神我



「算啦...」
眼神話


唉..早餐食得果幾粒燒賣，邊撚度夠飽..又唔知四眼妹點..


我成個早上都無精打采，得返個殼
直到午餐時間，我食返兩個大麵餅，仲有個來電通知我放學去返工，先令我稍為踏實d


下午既第一堂英文堂好悶，miss講得蚊支咁細聲..
訓又訓唔著，我一直係度諗四眼妹係咪已經對我徹底失望..

我拎起左支筆，係單行紙上寫起上黎




「對唔住，令你失望
從今以後，我會成為百份百可以保護你同對得住自己既男子漢
仲有，用靚既鏡片，睇書無咁易攰，副新眼鏡我拎左，等你...
最後，唔好成日坐係度睇書，參加下課外活動，好似我咁郁動下會健康d」


寫完之後既一堂，我眼定定將呢四行字睇完又睇..睇完又睇..
間中仲好似聽到miss問我問題，不過只要堅持唔答佢就唔會再係我問題
呢個miss我地好了解，只要我坐定定唔企起身，佢最後就會哈哈哈然後自問自答




睇睇下，我一手渣返起支筆，一手拎出水樽飲返啖水..

同時，我聽到三聲清脆既「哈哈哈」


佢仲未趕得切答返自己，中央咪已經傳來鐘聲
「叮噹叮噹」又落堂



此時，我張單行紙只係刪剩一句
「參加下課外活動，好似我咁郁動下會健康d」