第001集 ~ 明︰出發喇!我喺飛機度見到條貓屍呀!

今年,聖廸達書院唔知做咩鬼嘢,A Grade成隊波冇個真係好波嘅,偏偏贏咗個學界足球比賽冠軍。

經條死PK老淫蟲校長努力爭取下,班校董終於唵錢請嗰22個校隊成員去日本旅行7日…

其實爭咩取丫,講到尾,咪又係因為校隊成員嗰度有幾個老豆係校董囉…

唗鬼氣,好在我都套到佢哋光,飛機住宿唔使錢,都幾好,我係邊個?我叫何家明,叫我阿明得啦。





自己屋企窮,冇咩錢,自己根本冇能力去旅行,有機會仲唔仆到去咩,我死人老豆又真係好錫我…

見我Form 6咁大個仔都未去過旅行,自己唔食都搵2000蚊返嚟俾我去日本嗰邊買吓嘢,真係要錫啖佢。

自己唔生性,大鄉里到死,戇膠膠咁走咗去「廖唱丁銀行」度唱円,唱咗30000幾…

之後先知間PK銀行食水好深,「吊」,真係對唔住老豆。「唉」,算啦。

老媽子又幫我問阿姨借咗個旅行喼,牛龜咁大個紅色硬膠旅行喼,放條屍入去都仲有位剩,真係睇到都唔想拎…





不過冇計啦,老媽子問人借嘅,唯有帶埋去啦。

終於到咗出發嗰日,晨早溜溜刷個靚牙,沖個靚涼,食個靚飯,攞齊行李就落樓下,搭的士去最近嗰個機場快線站。

嘩!又幾正噃,雖然有D大鄉里,但係第一次搭呢條線個感覺真係幾好,幾有旅行Feel。

到咗機場,嘩!地方好大,落地玻璃,四周圍都係旅客,直頭覺得係壯觀呀!

見到D型到爆嘅機師﹑索個震嘅空姐,真係頂佢個肺,沖上雲宵咩!?





「嘟嘟嘟嘟魔他嚧拿~」

電話嚮起,「喂,邊個?」

「阿輝呀,見到你啦,唔好走開,我過嚟搵你?」

阿輝係我最好嘅朋友,同我一樣,打正選後防嘅。我另來另去都見唔到阿輝,突然左邊膊頭俾人拍咗一吓…

「呢邊呀。」阿輝條木咀喺另一邊出咗嚟,「喪狗」同「大袋」喺佢側邊,佢哋兩個都係打中場嘅…

「喪狗」跑得好快,跑到成隻狗咁,咪叫佢「喪狗」囉;

「大袋」點解叫「大袋」!?呢個問佢老豆老母啦,點解生得個佢個「袋」咁大。

「喂,嚟咗好耐呀?有冇見到其他人呀?」阿輝問。





「有呀,見到三條柒頭。」我答。

「吊你啦。你就柒頭。」阿輝回應。

「我唔係柒頭,我係喪狗,應該係狗頭。」「喪狗」回應。

「柒,狗,頭。」我哋三個人一齊講。

傻笑咗兩吓之後,我哋就去咗搵埋其他人。

原來佢哋一早到咗,見到前面嘅人,我哋四條友忍唔住一齊講咗句︰—

「仆你條街丫!」





唔知點解「光管陳」﹑「鐵拳」同「黃仔」都嚟埋嘅,從此多事喺啦!

「光管陳」除咗教英文,仲教「水」嘅,俾人見過佢對長腿,冇毛又白淨,成對光管咁,係條女就好嚧,不過佢係男人嚟。

「鐵拳」就你玩過「鐵拳」就知喇,真係好似嗰個阿伯。

「黃仔」係訓導主任,好惡,但係對我都OK嘅。其他人仲有︰—

死PK老淫蟲校長 — 林伯特修士
足球教練 — 王Sir
球員 — 阿張﹑阿華﹑達明﹑陳仔﹑大寶﹑細寶 ﹑阿龍﹑細鬼﹑大Lin雄﹑孖腸﹑大咀﹑Stephan﹑Kenny﹑豬仔﹑老鼠安﹑大舊﹑阿倫﹑膠榮。

就係呢班人,一齊去旅行,去嘅時候係一行27人。

整色整水,整呢整嚧,終於成班人上晒飛機,我哋成班人差唔多包咗廂,喺我哋坐嗰度得幾個陌生人…





我哋四圍走,四圍玩,玩到俾D空姐叫返埋位,我坐都未坐定啫,又走咗去廁所…

廁所喺機廂最後面,因為廁所門係閂埋嘅,我傻吓傻吓咁以為廁所裡面有人,一直喺外面等…

直至有個靚女空姐走埋嚟問︰「先生,你喺度等緊廁所呀?」

我俾佢架妹樣嘅美色吸引住,淨係及咗吓頭啫…

佢之後講︰「裡面冇人架。你可以入去。」佢輕力推開道門,好有禮貌咁請我入去…

我嗰吓真係覺得自己樣衰到唔敢再正視佢,一入去就順手閂埋道門,坐喺個塔度。

我望望上去塊鏡度,覺得個鏡好似鬆鬆地咁,咁我咪用隻手摸吓佢囉,點知…





成塊鏡跌咗落嚟,好在未屙得出啫。但係,喺塊鏡後面,而家喺我面前嘅係,一隻郁都唔郁似係死咗嘅黑色貓屍……

(待續)

下集預告︰

…幾條光柱向上照射,射到一個直筆甩企喺我面前嘅人度,嗰個人一身清朝官服…