第005集 ~ 明︰幫我求埋丫。我喺酒店發現咗D怪嘢,仲有怪聲呀!

講返我呢邊先,上次講到我哋到咗日本,上咗旅遊巴,有隻白色好恐怖嘢跟咗我哋上車,行咗埋我度…

見住佢越行越埋,我因為太驚,所以好大聲咁叫咗出嚟︰—

「你哋睇唔睇到呀?」

「睇到咩呀?」「大袋」回應。





「前面,前面,前面個樣好恐怖,面無人色嗰隻嘢呀。」

嗰隻嘢突然低下頭蹬大對眼望住我。

之後一陣笑聲傳咗出嚟…

「你條友,真係黐很咗線,人哋係我哋導遊嚟架。」「大袋」再講。

「導遊!?點解我未見過佢架?」





「你條友,集合嗰時又遲到,人哋講嘢你又睇女,上到飛機,人哋講嘢,你又去廁所,落咗機又傻吓傻吓咁,你想點丫?」

之後我好尷尬咁同個「白面鬼」講咗對唔住。唔知係咪頭先真係嚇親,而家真係有D心神恍惚咁。

原來個「白面鬼」頭先聞吓左聞吓右咁係點緊人數。之後「白面鬼」行返咗去前面…

我見住「鐵拳」俾咗D錢佢,佢就落咗車走咗。

我問返D同學先知,原來我哋D老師識路,所以打發佢走,諗住自己去四圍玩。





架旅遊巴終於開咗,佢哋都係照舊聽歌嘅聽歌,訓覺嘅訓覺。

天黑黑,我個位又睇唔到風景不滯,見到前面嘅王Sir…

佢冇訓,喺度望吓望吓出面D風景咁,佢側邊又冇人,我就行咗埋去同佢嗲兩句︰—

「王Sir,你第一次嚟日本呀?」

「唔係,嚟過幾次啦,你第一次嚟呀?傻吓傻吓咁,你冇嘢吓嘛,你好似唔係好舒服咁噃。唔好唔舒服呀,成七日,有排捱呀。」

「冇咩嘢,頭先喺飛機度發咗個惡夢啫。」

「綺夢咋呀?又邊條女咁唔好彩俾你發夢攪呀?」後面個死人「豬仔」原來未訓,喺度講笑咁講。

我起身另轉頭,嚟手就「啪」一聲打落佢個頭度…





「你老,母呀!」我哋都好Friend嘅,我都係同佢玩啫。之後我轉身返過嚟同王Sir講。

「阿Sir,唔使理「豬仔」,我哋繼續講。係噃,做咩「光管陳」都跟埋嚟嘅?」

「「光管陳」!?邊個嚟架?你講緊陳Sir!?我都唔知佢做咩跟埋嚟噃,淨係知道佢唔係學校出錢請佢嚟架,佢自已唵荷包架。」

「自己唵荷包!?自己唵荷包使咩跟我哋嚟呀,條友唔係有咩癖好呀?」

之後「光管陳」喺我哋前兩排度企咗起身,嚇咗我一跳,唔知佢係咪聽到,佢起身就同大家講︰—

「各位同學,我呢度有D校章,每個人一個,大家都要帶住佢呀,記得千祈唔好唔帶,記住記住。」

「小學雞咩,帶校章,點溝架妹呀。」班死仔喺度細細聲咁講。





「丫,不過陳Sir嚟都好,學校知道張Sir(即係「鐵拳」)識講日文先請埋佢嚟,方便溝通,聽講陳Sir都好叻,識多國語言,可能佢都識講D日文。」王Sir咁講。

「佢成日淨係講英文,真係唔知佢識日文噃。」

之後冇咩講,咪望前去囉,見到個死淫蟲校長又借D倚抽「阿張」水,「阿張」係我地隊最細嗰個,後備嚟…

佢咪就係其中一個有個有錢校董老豆架囉,佢識鬼踢波咩,咪又係靠關係。

條死淫蟲,正一孌童癖,佢試吓點吓我丫喇,我頭都打爆佢。

唔經唔覺,我哋到咗酒店,好在唔係大賓館啫,都總算有個大堂,旁邊仲有間舖仔賣精品嘅。

大家企定定喺門口就等「鐵拳」去幫我哋辦理攞房卡,我見冇嘢做,又唔行得開,咪望吓四周圍囉。

見到有兩個「鬼佬」坐咗喺大堂梳化,一身黑色長袍,都掛住條 銀色十字架頸鍊,似係D神職人員,一直就喺度對噏。





另一邊「小貓」三四隻,喺度傾緊計,可能係等緊團友。唔知係咪因為差唔多七點呢,冇咩人喺度,精品店都見唔到職員。

櫃台幫緊「鐵拳」攪嘢就有個女職員嘅,呢個女職員個樣都幾睇得吓,可能因為係我嚟到日本真係企定定喺度睇嘅第一個架妹啦,真係覺得佢幾靚。

望望吓,見到櫃位側邊好似有D嘢郁郁吓,咪望過去睇吓囉,見到有個影喺度郁,好奇心驅使下,我咪再行埋少少睇吓囉…

見到有舊毛茸茸嘅嘢,睇得唔係太清楚,我 捽一捽眼,佢就唔見咗,之後行到埋櫃位側邊,望到個女職員條腿,真係被佢吸引住,又長又白又靚。

「喂,死咸蟲,仲(目及)嘢,D人上晒去喇,仲有成七日,有排你(目及)啦。」班死仔一齊對住我講。

原來一早分好晒房,我要同「細鬼」住1201號房,即係走廊最尾嗰個房,成班同學都係呢層,不過D老師就唔知住邊。

「細鬼」佢係校隊後備,打前鋒位嘅,佢係條「鹹蟲」,未嚟之前已經講到實牙實齒話要去叫雞…





我諗佢夜D肯定靜靜雞自己去,真係鬼唔望佢「精」盡人亡,不過我諗條友都想。

之後,D同學老師都先返自己房放低D嘢同去個廁所,我同「細鬼」就返咗自己房,阿輝佢哋就喺1216號房,係另一邊嘅盡頭…

「細鬼」放低行李就走咗去隔離。我一入去房,見攰攰地,一吓就推咗個喼埋牆,撞到個喼跌咗落地,呢次仆喇,個喼爛咗…

我見到爛開咗嗰個位有D嘢。

望咗埋去,見到張好似紙嘅嘢,我覺得好奇怪,咪隊隻手落去攞佢出嚟,係一張黑色長方形嘅紙,上面有D灰銀嘅鬼畫符…

點睇都唔似係保平安嘅符,似係D邪門嘢,我再望望個裂口,係針線連埋,仲齊咠咠,應該係新整嘅。我心諗呢張嘢咩嚟架?

呢個係阿姨嘅喼,又冇人掂過,應該係阿媽或者阿姨放落去嘅,佢哋應該 唔會害我呱,今晚都會打俾阿媽報平安,夜D問吓佢先。

我揸住「佢」望吓四周圍,兩張白色嘅床,落地大玻璃窗,兩邊係有得開關嘅窗,有張木檯,檯上面黐住牆就有塊鏡,仲有部電視…

有道應該係可以打通隔離房嘅門,地下係地毯,黃色燈,可以教光暗嘅,牆上面有幅人像畫,廁所有個浴缸,有洗手盆,一大塊鏡,毛巾,清潔用具齊全。

「喂,傻佬明,行喇。」「細鬼」行返嚟門口叫我出去食飯。

我隨手就將我手上嗰張「黑色符」掉咗落垃圾筒,抆張房卡就行咗出去,閂埋門。

「你敢掉我落垃圾筒!今晚你就知死!」一把有幾道回音嘅聲,似係喺房裡面傳出嚟……

(待續)

下集預告︰

…個面白璽璽,夜晚見到真係好鬼驚。