米米蓮妖怪作品 -《旅行‧如此‧難以忘‧記 》(百集長篇): 第017集 ~ 明︰五咩絕丫？睇我「女神」出場好過啦！

第017集 ~ 明︰五咩絕丫？睇我「女神」出場好過啦！

「揸住人哋碌嘢嘅遊戲唔啱我，你哋慢慢啦。」

行開咗之後，我見到一男一女企喺遠處傾緊計，個女仔條裙好靚架，白色碎花吊帶裙。

因為呢條咁靚嘅「碎花裙」，我真係忍唔住想睇吓個「主人」襯唔襯得起「佢」。

我慢慢從下而上咁望嗰個女仔，一雙白色有花邊嘅高踭鞋，白滑嘅雙腿帶有少少肉地，睇對腳真係一流。





一條白色碎花吊帶裙裡面包裹住嘅係一副「S」型嘅身材，嬌滴滴咁，唔太高，連個身型都啱晒我，未睇個樣之前，我直頭祈埋禱︰—

「唔要豬扒，要女神；唔要豬扒，要女神……」

到我直望埋去，清楚見到佢個樣……

佢紮起咗D頭髮，有條小辮仔，兩邊有少少頭髮垂落嚟，眼睛大大，水汪汪咁，柳月眉，鼻仔高高，嘴泛起菱角，皮膚白滑，吹彈可破咁…

切切實實就係我心目中嘅女神，佢天仙般嘅樣子完全覆蓋咗佢魔鬼般嘅身材。





望到佢，我先明白到咩叫一見鍾情，唔知邊度嚟嘅勇氣，明知佢應該係日本人，無咩可能可以同我溝通得到，但係我就係好想衝埋去…

最少可以俾我再望清楚一吓佢丫。

我踏前幾步就發現一個陳列架阻咗我行埋去，我眼見佢同同事講完嘢，轉身就向另一邊行去…

我即刻就兜路去搵佢，唔知點解我耳邊真係泛起一首咁嘅歌…
(如陽光~ 你將癡心亮起~)

一條又一條柱好似刻意阻我去見佢咁…




(我已鍾情於你~)

離遠見到佢，佢就企咗喺個玻璃陳列架前面…
(那份愛~)

我忍唔住衝咗埋去。
(灼熱我心內~)

我喺佢背面企定咗喺度抖大氣，佢可能感覺到我行咗埋嚟，佢放低咗手上嘅物品，就另轉頭過我度望住咗我。

(行近~ 我又怕驚動你~) 唔聽歌住，俾我静静地感受一吓呢一刻，可能係佢俾我唯一一刻嘅一個夢，因為…

下一分鐘，佢一出口，如果講嘅係日文，可能成個世界就會幻滅晒。

「……。」





「女神」講咗幾句說話。除咗「蘇咪媽些」，我一句都聽唔明，雖然佢嘅聲音真係好甜，但係喺呢一刻，我真係流咗眼淚出嚟…

之後，我鼓起勇氣，同佢講英文︰—

「哈囉，你好，你好咔娃依呀，未哎……」

D英文戟住晒，我自己都唔知自己想「未哎」D乜。

佢對住我低低頭淺笑咗一下，之後佢講︰「你好。」

一把聽都覺得好甜既聲音，仲要係廣東話，成個世界即刻返晒嚟，前面原來真係會見到曙光架。

「先生，你有冇事呀？我可以幫到你嗎？」「女神」講。





雖然有少少唔正，但係感覺真係，太正喇！

「我…我冇事呀。我叫何家明呀。小姐，唔知我可唔可以知道你叫咩名呢？」我搲搲個頭，面都紅晒回應佢。

佢再低低頭淺笑咗一下，「女神」個樣真係好可愛呀！

「我叫結衣。」

佢一講，我已經肯定咗呢個名將會喺未來20年風靡整個東南亞。

「我姓佐佐木。你係香港人？」

「係！」我即刻諗都冇諗就回答佢。

「我媽媽都係香港人，我有個中國人嘅名字，叫倩兒。」





耳邊又泛起一隻歌喇！「Beli Bala Beli Bala」，唔係！係呢首，我細個最愛嘅動畫主題曲呀！

(在清風中我追趕千次~)
(為法律重伸正義~)
(面對壊人雖側不太易~)
(這心態重來未靜止~)

「我哋可以做朋友嗎？我可以叫你小倩嗎？」

「結衣」佢又用佢嘅招牌笑容回應咗我，以後我可以用「小倩」嚟叫佢喇。

「喂，走喇，佢哋走晒喇！」「大袋」佢離遠好大聲咁叫我走。

我又唔識路，唔跟佢哋走唔得，但係又好想同小倩佢傾多陣，所以我即刻咁問︰—





「你聽日會唔會喺度架？」

「會，我明天都要上班。」

「咁我哋聽日見啦，不見不散，我一定會嚟架，等我呀！」

之後我一邊望住小倩，一邊走返埋大家度，我真係好開心呀！

(待續)

下集預告︰

一個日本中年男人，佢仲對住我笑，笑起嚟一排利齒表露無遺。

註腳︰上面有兩首歌一句歌詞，一首係蘇永康嘅檸檬茶經典主題曲《Sol#4》，一首係歐倩怡嘅《皇家雙妹嘜》，「Beli Bala Beli Bala」一句來自歐倩怡嘅《問題天天都多》