第019集 ~ 輝︰酒店部(車立)裡面…

「沒問題。」阿狗用普通話回應阿妮。

「大袋」唵住嘴笑到停唔到。

我開頭都覺得阿狗佢吹水吹到咁大都幾好笑,不過諗真D,阿狗雖然鍾意同我哋班人玩,但係其實…佢係讀精英班架。

仲記得,有次學校請咗個所謂嘅記憶大師嚟學校推銷咩咩咩記憶法咁,阿狗佢上台挑機,仲要贏埋,當時個記憶大師…





真係(火羅)到爆,學校就尷尬,阿狗佢就威到盡,所以,佢真係叻到識咁多語言都唔係出奇。

之後,我冇再理佢哋講咩,我再打多咗次俾阿欣,點知…都係冇人聽。

過咗冇耐,阿明同「光管陳」真係喺廁所行返出嚟,我哋就諗住一齊搭(車立)返酒店房。

「阿妮,我返上去執好D嘢再搵你傾計丫。」阿狗講。

阿妮微笑及頭回應咗阿狗。





「死傻狗你唔訓,人哋唔使訓咩!?」「大袋」講。

「陳Sir,你覺唔覺得個女職員好怪呀?」我喺「光管陳」耳邊問。

「冇害人就得啦。」佢呢個答法好似言有由衷咁,真係有D怪。

「係噃,我記得你哋食飯嗰時講過,話部(車立)有D怪聲,係咪呀?」「光管陳」轉個頭問。

我一諗起就另轉頭問阿明︰—





「係噃,傻佬明,其實個(車立)嗰度係咪你扮聲嚇我哋呀?」

「梗係冇啦,頭先咁多把口,我硬哽咋。」阿明咁答。

「其實頭先我都想講,你哋講話部(車立)裡面D嘢呢,似係我同「大袋」佢哋之前喺個(車立)度嘅對話。」阿狗搶住講。

「不過,我哋都覺得你哋遲我一部(車立)冇乜可能聽到我哋講嘢,所以我哋都冇講喳嘛。」「大袋」加把口埋嚟。

「OK,咁我知咩事喇,你哋四個一陣入咗(車立),一句說話都唔好出,企晒四個角就得,我會企中間。」「光管陳」講。

「使唔使咁嚴重呀?」阿狗同「大袋」一齊問。

「跟住做啦。」我講。

之後(車立)到,我哋跟住「光管陳」嘅指示企喺四角,我同阿明企後面,阿狗同「大袋」企前面。





部(車立)慢慢閂埋咗門,我哋五個人一粒聲都冇出,連呼吸聲都好細好細,(車立)裡面變得好靜,靜到…

耳邊有D「依依」聲,好似入咗另一個空間咁,雖然知道部(車立)速度唔快,但係明明係一分鐘左右就到,偏偏好似成個鐘都未到咁…

一陣緊張感壓住咗我成個人,我冇去睇個(車立)去到咩樓層,一直就俟住埋個角度,耷低頭望住「光管陳」嘅動靜。

突然……「砵」一聲。

「頂!死人「大袋」放臭屁,焗死人喇﹗」阿明鬧鬼「大袋」。

「嘻嘻嘻…」一把唔知喺邊度傳嚟,由第六個「人」發出嘅聲音。

「光管陳」望一望我,我大約明白佢嘅意思,我即刻接住講︰—





「塞隻腳落去佢屎忽窿啦。」

「嘩,攞我隻腳嚟「教飛」,你塞丫!」阿明再鬧。

「嘻嘻嘻…嘻嘻嘻…」呢次聽得好清楚,聲音係喺(車立)頂傳嚟…

「唔好郁住。」「光管陳」雙手拍一拍我哋,好細聲咁講。

「叮!」部(車立)到咗12樓,開緊門,「光管陳」突然大叫︰—

「噤住部(車立)!」

之後佢右手用力揸埋「大袋」個心口度,一扯扯咗「大袋」心口個校章出嚟,做咗個手印,向上大力一掟…

「啪」一聲,有D火光咁,一舊嘢喺(車立)頂跌咗落嚟,「光管陳」再一腳將舊嘢踢咗出(車立)…





「你哋都出(車立)!」

我行出(車立)口一望,嗰舊嘢原來係一個冇著衫﹑全身偏藍色﹑頭上有兩隻小角嘅細路仔嚟。

我見到阿狗佢竟然醒到做好咗護身手印﹑「大袋」同阿明就仲呆咗喺部(車立)裡面度望出嚟。

「光管陳」一手舉起似係想打落去咁,個細路仔驚到雙手護住個頭,我見佢好似好可憐咁,唔忍心佢被打死,即刻就衝咗埋去。

「陳Sir,唔好呀!」

「光管陳」真係停咗手,仲咁講︰—

「唔好咩啫?我都冇話要殺佢,佢咁曳,打佢兩吓都唔得咩?而家D細路好難教架!佢仲要係妖怪嚟架!」





我另轉身就想氹返個小朋友,點知……

佢突然喺我面前擘到個口好大,大到足夠吞咗我……

(待續)

下集預告︰

…真係同「細鬼」條鹹蟲走咗去叫雞呀?