米米蓮妖怪作品 -《旅行‧如此‧難以忘‧記 》(百集長篇): 第025集 ~ 明︰得喇，落去囉…見到…通緝犯！？
第025集 ~ 明︰得喇，落去囉…見到…通緝犯！？
我見到小倩佢呀！佢著住一件白色輕紗，輕紗又薄又透，些微帶D性感，但係完全唔覺得有DD嘅俗氣，就好似仙女下凡一樣…
佢企喺我前面大約幾步距離，面仔紅紅咁對住我笑，之後慢慢細步細步咁行埋我身邊，慢慢坐低咗…
我怕醜到塊面紅晒，成個人亦都硬晒咁，之後，佢仲想錫埋我個面度…
「起身喇！傻佬明！食早餐喇！」阿輝佢叫醒我。
「唉吔，唔好啦，我發緊個好夢架。」我半夢半醒咁。
「又好夢！？成日都有得發綺夢嘅你，你係咪真係咁性育強呀？」「喪狗」原來都起咗身。
「性育強，賓周長，長到嚇死D姑娘…」「大袋」都起咗身，仲跳晒舞咁念口簧添。
「但係幼到似牙籤，個袋仲要細到癲，醫生決定切左佢條鞭…」「大寶」即刻跟埋口。
「哈哈哈~」起咗身嘅五個人都喺度傻笑。
「頂你哋啦，係咪起身食早餐架？」我問。
我心諗，知道頭先早D衝埋去鍚啖小倩先啦。
「咪嘈啦！阻人訓覺猶如殺人父母呀！係出去就快D出去啦！」大咀仲要訓，所以有D燥。
之後我起咗身，同佢哋五個一齊落咗樓下搵早餐食。
去到二樓，見到有個肥妹好似想食到個山都崩埋咁，我哋驚起嚟即刻就走咗落樓。
酒店隔離原來有間便利店，條死仔「大袋」一入去就攞左支汽水，之後一手就擸咗本鹹書埋櫃位，心諗佢一定會出醜啦，點知呢度D職員，嘩，果然專業。
一出到去街，「大袋」就應承咗我今晚比我參考吓本書。
之後行咗去對面馬路，見到個通緝犯告示，大細寶兩兄弟竟然白痴到影完人哋相，仲吐咗D口水去個告示板度，我真係呆咗，使唔使憤世疾俗成咁呀？
再之後我哋去咗「牡丹樓」度食漢堡包，嘩，雖然硬硬地，但係我覺得好食過香港好多噃，杯汽水都係。
食到大約十點，大家就走喇，諗住返酒店集合，我哋行咗冇幾耐，阿輝就問我︰—
「你見唔見到嗰邊嗰個男人呀？」
我另轉頭一望，真係見到有個男人，佢兇神惡煞咁望住我哋幾個，我再另返轉頭，又有一個男人同樣咁望住我哋。
「大家快D行返去酒店，有D唔妥。」阿輝佢突然咁講。
我哋正想快步走返酒店，點知…
「你哋喺度做咩？」後面有個人拍阿輝膊頭。
原來係「光管陳」，仲有「鐵拳」同王Sir。
「冇呀，我哋啱啱食完「牡丹樓」，諗住返酒店，會合大家11點出發囉。」「大寶」回應佢。
有三個阿Sir陪住我哋，當然放心好多啦。之後我哋一齊行返去酒店…
到咗門口，突然，我見到頭先嗰兩個男人，佢哋喺左右兩邊行埋嚟我哋度，我見住右邊個男人舉起把槍，好似想射我哋咁…
我估另一邊個男人都係一樣嘅，我就即刻大叫︰—
「走呀！有人想殺我哋呀！」
大家好快咁入咗酒店，暫時總算有驚無險。
「咩事呀，阿明？」「鐵拳」問。
「頭先我見到有個男人揸住支槍想射我哋呀！另一邊又有個男人，應該都係想殺我哋架。」
「你講咩呀？一舊舊咁。」王Sir講。
「我都見到，前後係兩個男人，都有手槍，似係想嚟殺我哋。」阿輝幫我口。
「我都見到呀，我仲見到其中一個，我記得佢係通緝犯嚟架，另外一個我見唔到，但係估佢哋就係對面通緝告示嗰兩個通緝犯。」細寶都加把口。
「通緝犯！？…張Sir﹑王Sir，你哋返上去執嘢先，我去處理就得。」「光管陳」咁講。
「真係得！？使唔使報警呀？」「鐵拳」同王Sir咁問。
「得架喇，我會攪掂，真係攪唔掂我會報警架喇。」
兩個阿Sir轉個身就返咗上房。
「你哋六個唔好走住。之前做過D咩，點解人哋會追殺你哋？」「光管陳」問我哋六個。
「唔俾人哋係嚟追殺你哋三個阿Sir架咩？」「大袋」真係丫！
「講少句廢話啦，你有冇做過咩呀？陳Sir，我應該…就冇喇。不過…」
「吞吞吐吐做咩啫，講啦！」
好似篤人哋出嚟唔係咁好，所以我冇爆佢哋吐過口水去通緝犯張相度，我淨係咁問︰—
「影過佢哋告示板張相，唔知關唔關事呢？」
「影相！？應該唔關事丫，又唔係對人，對相啫，除非佢兩個係條屍，鬼魂喺張相度，不過講唔通，點會喺派出所嘅相度啫，係都喺靈堂張相度啦，快D講，仲有咩嘢你哋冇講？」
我心諗，咁即係應該吐口水都唔關事啦。
「冇喇，冇喇，我哋咩都冇做過。」大寶咁回應，明眼人都會覺得佢身有屎啦。
「光管陳」都係咁覺得，所以即刻就捉住佢，搜佢身。
「唔好意思，我覺得你有D可疑。」
「喂，你做乜嘢呀？」細寶想阻止「光管陳」。點知…
「光管陳」真係喺大寶身上搜到半塊金邊玉佩。
「呢樣嘢係咪你架？」
「我哋家傳之寶嚟架。」細寶佢仲要死撐。
「唔好玩，會死人架。」
大寶走埋去細寶度，攞埋佢嗰半塊玉佩出嚟。
「算啦，細佬，唔好呃阿Sir喇。唔好意思呀，陳Sir，其實係我哋兩兄弟尋晚喺附近執返嚟架，我哋見對玉佩咁靚，又啱啱可以俾我同細佬一人一個，所以咪據為己有囉。」
「我唔怪你哋，呢對玉佩有魔性，會引誘人類據為己有嘅。如果我冇估錯，嗰兩個男人就係俾呢對玉佩支配咗，而且一般人唔會咁易俾佢哋支配，所以 我估嗰兩個男人已經擁有呢對玉佩一段長時間，一直跟隨住呢對玉佩嘅指示去殺人。你哋唔使擔心，一陣去七福神廟，我會化咗呢對玉佩，而家你哋準備出發先，我會處理嗰兩個男人。」
(待續)
下集預告︰
嘩！仲有得淨嘅？