米米蓮妖怪作品 -《旅行‧如此‧難以忘‧記 》(百集長篇): 第027集 ~ 明︰隔離都有間廟，仲有個「學生妹」。
第027集 ~ 明︰隔離都有間廟，仲有個「學生妹」。
「光管陳」話佢自己攪得掂，我梗係信佢啦，咁我哋幾個咪返去房度先囉。
返到去個房度，發現條死人「細鬼」原來冇返過嚟。
都估到架喇，不過估唔到條友真係咁夠薑啫。仲要玩成晚，佢真係性慾強。
我執好D嘢就諗住落樓集合，但係一諗起尋晚「光管陳」喺門口做嘅嘢，我真係唔明…
佢明明係睇住幅「裸男畫」，又明明係叫我放心架，點解尋晚好似對隻妖怪冇用咁嘅？唔通佢呃我？
應該唔會丫，佢唔似會攞我條命嚟玩架喎。唔通相係唔得，要畫先得嘅？定係…對鬼先有用，對妖怪冇用嘅呢？
唉…都係唔理喇，幅畫又唔係好大，放埋喺心口先，不過，都幾頂心口吓。
我就係咁，放咗幅畫喺身，就落咗樓同大家集合，之後一齊上咗旅遊巴去七福神廟。
喺架車度D同學講開我先知，原來阿張同條老淫蟲同房訓。唉，阿張仲有得剩嘅？
但係睇佢仲安然無恙咁坐喺前面，應該冇事嘅，不過條死淫蟲真係狼，又坐咗喺阿張隔離，睇嚟過得尋晚，都過唔到嚟緊呢幾晚嚧。
大家仲有講到阿倫同「細鬼」添，條死人「細鬼」真係帶埋阿倫去，仲要攪到佢而家咁嘅死款…
「細鬼」佢真係害人不淺，真係有D戥阿倫心痛。
我另個頭，望到阿輝佢望住佢哋兩個望到定一定咁，唔知係咪又有D咩事呢？
不過我哋識護身咒﹑隱身咒，仲有「裸男畫」護身，應該都唔使怕嘅。
「傻佬明，你心口D咩嚟架？」「大袋」突然咁問。
「Eee…學你囉，鹹書呀！」我當然尷尬，仲亂咗添，咁講，似乎會仲衰。
「攞嚟睇吓！」死人「喪狗」仲幫埋手搶我幅畫。
「嘩！原來你啱呢D！？」
「做咗咁耐朋友，我哋唔會歧視你嘅，不過你都係唔好咁近我哋，費事我哋帶壞你啦。」
「「光管陳」話幅畫可以護身架，不過阿明你唔係有相喇咩？點解要帶幅畫呀？」阿輝出口幫我解圍。
「尋日張相好似冇用丫嘛，所以咪帶埋幅畫出嚟囉。」
「你真係傻佬嚟架，搵個袋袋住佢，帶住喺身咪得囉，使乜放心口呀。」
阿輝佢講得又好似啱噃，之後我就搵咗個袋袋住幅畫。
過咗冇耐，我聽到王Sir講原來「光管陳」佢報咗警處理嗰兩個通緝犯，我仲以為佢幾勁幾勁，可以一打二添。
諗諗吓，我真係懷疑幅畫係咪真係掂。
再過咗冇耐，我哋就到咗埗，之後一齊落車行去七福神廟，沿途都好多人，有遊客，有日本人，仲有好多團體…
大部份都係中小學生，我望來望去睇風景…
突然見到阿輝佢個動作好怪，背住嚟跟住我哋行咁，好在我哋係行最尾，唔係好多同學見到佢咁。
「喂，阿輝，做咩呀？」
我見到佢烏低個身，做住護身咒，一路向後行，一路抖大氣，唔知發生咩事呢？
「喂，阿輝，你做咩呀？」
之後，我用幅畫喺佢前面揚吓揚吓，突然「依丫」一聲，係把好凄怨嘅尖叫聲，仲要唔知邊度傳嚟…
呢一吓，真係嚇到我丫！
而阿輝佢就停咗落嚟，抖咗啖氣，仲好似好攰咁…
「唔該呀，好在有你咋，仲有你幅畫。」佢搭住我膊頭講。
「頭先發生咩事呀？又有鬼怪呀？幅畫救咗你？」
「係呀，好恐怖呀，拍得住尋晚達叔同美奈子呀！」
………
之後，我哋成班人去到七福神廟，大家就分散行吓，約好咗一陣喺門口集合。
呢度好多日本學生，嘩！正呀！D女學生條裙短到呢，真係想借D倚踎低睇吓個光景…
我頂！班死仔真係有幾個行咗埋人堆咁做喎，正一禽獸，呢D嘢我唔會做囉，最多都係諗吓嘅啫。
我哋之後又係嗰四個人，自己一堆行開咗，阿華同達明都跟埋我哋嚟…
呢間廟四圍都有光照到，外面亭園又大又開揚，亭園有好多攤位，都係賣精品嘅…
有賣平安符，有賣公仔，有賣飾品，都有幾多嘢好買架，人氣又旺，感覺好正氣好舒服。
我都忍唔住伸咗個懶腰，大嗌咗出嚟︰—
「丫！好正呀！」。
「你講D女學生定七福神廟先？」一把熟悉嘅聲音，「佢」仲要搭咗我膊頭一吓。
哦，原來係「光管陳」。
「佢哋邊有你咁正丫。」我講。
「你做咩揸住幅畫呀？」
「唔係話可以做護身符咩？」阿輝幫我問。
「護身符！？喔，係呀，係呀，你揸實D喇喎，不過有起事嚟，記得先用我教你哋嘅護身咒呀。」
「光管陳」雖然咁講，但係總係覺得佢答得怪怪地咁。
「陳Sir，你處理好玉佩件事未呀？」「喪狗」問。
「咩玉佩件事呀？」阿華同達明問。
「冇嘢，頭先阿Sir我見到有人偷咗塊玉佩，去報警啫，攪掂架喇。我而家入一入去廟拜吓神先。」
我哋幾個知情嘅同學，當然知道唔係事實嘅全部啦，得閒有時間再問返佢先。
「光管陳」行咗兩步，就另返轉頭。
「唔記得咗提吓你哋，廟唔好亂入，神唔好亂拜，因為越多人供奉，個神力量會越大，相反如果拜嘅唔係神，都會有同樣效果，仲有，記得唔好亂攪人哋D神位，OK？有冇人跟我入去？」
我哋都又及頭又另頭咁，都唔知答得邊樣，不過阿輝﹑阿華同達明就跟咗佢入廟。
之後「大袋」﹑「喪狗」同我，三條友，四圍走，離開咗七福神廟範圍，行咗去另一邊…
我哋見到遠處有一間細廟，有條都幾長嘅石春路，條路係連接呢間細廟嘅，我哋都好好奇，咪行過去睇吓囉。
呢邊人唔係好多，我哋三個喺度行來行去睇吓嘢咁。
見到細廟出面有棵大樹，樹下面有個學生妹企喺度，長長頭髮咁，個樣都幾標緻吓，佢喺度望吓望吓棵樹咁…
我哋三個自閉仔，仲唔嚟個人多蝦人少咩，衝埋去搵佢影吓相先。
「大袋」第一個衝到埋去，佢用英文問︰—
「你好，可唔可以同我影張相呀？」
個女仔好似唔明佢講咩咁，不過佢見到部相機，之後都及咗吓頭。
「喂，我影先，幫我揸機，影完到你哋。」「大袋」講。
見佢第一個衝埋嚟問人哋，我咪好心幫吓佢囉，一陣我又有得影，無所謂啦。
我揸住部機，準備影相，喺個鏡頭度望過去…
「哇！」我大叫咗出嚟。
「咩事呀？」「大袋」同「喪狗」問。
「冇嘢，冇嘢。」
我之後遞咗部相機俾「喪狗」。
「我影相唔靚呀，阿狗你影丫。」
「你睇吓丫，睇吓點解決丫。」我再細細聲同「喪狗」講。
佢雖然好疑惑，但係都揸住咗部相機，想就咁就影埋去…
「哇！」「喪狗」都嗌埋一份。
「冇嘢，冇嘢。「大袋」你等等先。」
佢講埋呢句之後，仲靜靜雞細細聲同我講︰—
「阿明，一陣你過去，當我數到三，你就用護身咒撞佢，之後帶「大袋」走，OK？」
「不如你去救佢，我數三聲丫。」我細細聲回答佢。
「喪狗」無奈中帶點緊張咁慢慢行過去，我覺得佢好英架，只不過我覺得自己做得唔會俾佢好咋，唔係就我過去架喇。
「準備…」我好緊張咁揸實部相機…
「一，二…三！」
「咔嚓~！」
(待續)
下集預告︰
阿明佢哋三個踎咗喺地，抖晒大氣咁