米米蓮妖怪作品 -《旅行‧如此‧難以忘‧記 》(百集長篇): 第035集 ~ 明︰唔知「佢」嘅出現…可唔可以解決到呢？
第035集 ~ 明︰唔知「佢」嘅出現…可唔可以解決到呢？
「哎呀…」
「細路，你冇事丫嘛？」老婆婆問。
「哈哈哈。」一個小朋友對住訓喺地嘅我笑。
「呢個係我朋友，佢叫家明，呢個婆婆同小朋友都係我朋友，佢叫沙婆婆，佢叫貴寶寶。」小倩介紹佢哋俾我識，雖然我仲訓緊喺地下…
「咁…呢個女仕呢？」我起返身就問小倩。
我差D就講咗「醜樣婆」三個字出嚟。
「佢！？你唔使識架。家明呀，你合埋眼先丫。」
我當然即刻聽小倩話，合埋眼啦。
嘩~！呢次唔知乜嘢事，一合埋眼就好似冇帶頭盔上咗架風馳電制嘅電單車度咁，個人飄來飄去，好Q暈呀！
淨係隱約聽到小倩﹑醜樣婆同沙婆婆好似鬧緊交咁…
過咗一陣，架電單車停咗落嚟…
黐線，我真係當咗自己坐緊車添，小倩縮開咗隻手先至真。
「咦，個女仕呢？」
「佢頭先蝦我，沙婆婆咪請咗佢走囉。」
小倩甜絲絲咁講，沙婆婆同貴寶寶就喺度唵住嘴笑。
「佢蝦你？我仲以為佢係你朋友添。一早同我講，等我教訓佢丫嘛。」
「唔使喇，婆婆佢幫我出咗氣喇。」
我聽到佢咁講，總算喺憤怒中冷靜落嚟，仲四周圍望吓…
「你哋呢度都幾舒服噃，我嚟日本其中一樣好想見識吓嘅就係呢種舊居。深呼吸一啖，真係氣味都唔同D，嗰種遠離凡囂嘅感覺好舒服，俾D風吹吓吹吓咁，真係好正。」
我仲伸咗個懶腰添，而佢哋就喺度笑。
咦，搵個機會同小倩單獨相處吓先，但係好似唔係咁易噃。
好，嚟招「外母政策」試吓先，氹掂沙婆婆同貴寶寶一定有好處，還掂我本來就好鍾意同老人家傾計同同小朋友玩嘅。
我一吓就喺屋嘅木壆衝咗出去沙地執起咗幾粒石仔，另轉頭就問貴寶寶︰—
「寶寶，我叫你寶寶好嗎？你有冇玩過「抓子」呀？」
唔知點解小倩跟到我好貼，差D就仆咗埋我度，如果係真就好喇。
「好。哥哥，「抓子」係乜嚟架？好好玩架？」寶寶佢側側頭咁問。
「好好玩就唔講得，不過哥哥細個成日玩，都幾好玩架。嗱，咁樣拋起一粒就執起地下一粒，咁樣咁樣咁樣…」
我好用心咁教寶寶玩。
見到沙婆婆佢揚揚吓隻手好似叫「唔好」咁，我心諗，叫我唔好D乜呢？
我望一望後面，小倩又走到好近我，笑笑口咁，可能係覺得「抓子」好得意，佢都想學啦。
我再望返去沙婆婆度，就淨係見佢笑到見牙唔見眼咁，咦，睇嚟我嘅「外母政策」都幾掂噃。
我再望一望小倩，唔知點解我見到一條河，河裡面都係心心，我好自然好開心咁跳咗落去，唔通呢D就叫做沐浴愛河？
唔好意思，容許我再發吓癲，因為我耳邊又泛起一首歌喇~
之後小倩佢好似想學，佢冇問我，反而去咗問寶寶點玩，不過唔緊要啦，大家一齊都玩得好開心…
(俗世裡~ 遇到妳~ 我變得那樣奇~ 往昔情懷不再流離~ 留下陪妳~)
「喂，寶寶，小倩，呢度有冇空地或者公園呀？」我望住小倩講。
(此際在眼裡只得妳~ 笑語體貼入微~)
「呢度直行到尾有個空地架。」寶寶講，我當然仲係望住小倩啦。
(妳的言詞姿態神情~ 從未和我分離~)
「不如，我哋去嗰邊，我教你哋玩其他嘢丫，好唔好呀？」我再問。
(就讓我心永遠的交給了妳~)
小倩笑住及頭，寶寶就回應︰「好呀！」
(浪漫愛火我每夜回味~ 今生歲月~ 人若老~ 愛戀不死~)
婆婆都有跟埋嚟，佢就睇我哋玩，我用粒石仔，喺地下畫咗D方格同數字，再教佢哋玩跳飛機…
(忘了憂~ 忘了悲~ 陪著天天也歡喜~)
玩到咁上吓，我D鬼主意又嚟喇，心諗係時候喇，教佢哋玩「麻鷹捉雞仔」先，肯定有機會點吓小倩喇…
(留妳心~ 留我心~ 長伴千千世紀~)
點知…寶寶佢做母雞，要我做麻鷹，佢仲要犯晒規咁，係咁打我，仲要吓吓痛，不過點都唔及我心痛，冇得點吓小倩呀…
(就讓我心永遠的交給了妳~ 浪漫愛火我每夜回味~)
玩咗冇耐，機會又嚟喇，呢次到我做母雞，小倩無論做小雞定係麻鷹都會掂到我喇掛？點知…
(今生歲月~ 人若老~ 愛戀不死~)
我呆咗，沙婆婆佢竟然話要玩，佢嚟做麻鷹，小倩同我中間始終都有個寶寶喺度，唉…
呢次首歌就唱唔晒，我個人就玩到攰晒，之後，大家坐低咗喺地下，唔知點解，我好似識咗小倩好耐好耐咁。
「哥哥，你屋企喺邊架？」寶寶問。
「香港，離呢度好遠架…」
我突然諗起…
「死喇，唔記得咗約咗班同學食飯添。下次再傾啦，小倩…可唔可帶我返去呀？」
小倩個樣真係成日都咁甜，佢又菱角泛起咁回應我。
「當然可以啦，你合埋眼先丫。」
我同沙婆婆同寶寶佢講聲再見就合埋咗眼，一合埋一陣就返咗去嚟之前嘅嗰個更衣室。
正當我想踏一步另轉頭扮瀟灑咁同小倩講聲再見嘅呢一刻，喺我最唔為意嘅呢一刻，小倩佢…竟然…
咦，男人唔可以怕醜咩？佢…錫咗我一啖囉…
「多謝你，陪我玩成日，我返去做嘢先，你聽日會唔會嚟？」小倩佢又用返原本冇尾音嘅聲嚟問我。
當時我開心到連老豆老媽子姓乜都唔記得啦，血液又沖晒上腦，根本出唔到聲答佢，淨係猛及頭回應。
再之後，小倩佢就返咗去做嘢，我就去搵返大家，見到阿輝，我就跟返住佢哋，個腦就仲回味緊頭先開心嘅畫面同嗰一啖，真係…令人陶醉。
當我冷靜返落嚟嗰陣，原來都已經喺間壽司舖度嚧，眼前仲淨返一堆空碟添，班死仔一碟都唔留返俾我。
之後，個老闆請食壽司，點知阿輝一食落去就LUR返出嚟， 成班死仔見到咁就隊晒佢哋自己嗰碟俾我，真係當我傻佬…
我當然唔食啦，返去食杯麵唔好？但係就仲有條傻佬唔信邪，係都要隊入口囉。
我哋食完就離開咗間舖，途中見佢哋傻笑傻笑又一DAY咁嘅款，我就繼續我嘅陶醉…
………
我哋好快就返到酒店，一返到去，我就嗱嗱聲返房沖涼，因為沖住涼嚟陶醉係最「嘆記」家嘛…
點知個死人水喉唔識做，忽冷忽熱咁，攪到我冇晒興奮感覺。
沖完涼一打開廁所門，阿輝就噤鐘，佢入咗嚟，坐低就問︰—
「阿明，你唔驚呢道符係害你喇咩？」
「如果係害到我，早就死咗啦，何況「光管陳」都睇過話冇事，我咪信佢囉。」
其實我係亂答，不過…我好似冇郁過道「黑色符」架喎，點解喺我張床度嘅？
「乓」窗外有一D聲，「乓…乓…乓…」持續咁響。
阿輝望我，我咪望佢囉，佢伸咗隻手出嚟，手背向上，手指向下揚吓揚吓咁，我都唔知佢係想叫我過去定係叫我坐低…
所以我咪求其踎低算囉，之後見住佢慢慢慢慢咁行過去個窗簾度。
佢深呼吸一吓就打開咗道窗簾，我見到D飛絮咁嘅嘢係窗外，不過大部份嘢都俾阿輝佢遮住咗。
「又係鬼怪呀？」我問，但係佢冇答。
淨係見到佢慢慢望去右邊，我都跟住佢望，不過個死仔開窗簾都開得衰過人，淨係開得嗰少少，我乜都睇唔到，淨係見到道簾郁吓郁吓咁…
個窗肯定開到好大啦，右邊窗簾仲浮起埋，似係有舊有生命嘅嘢喺度，舊嘢就喺呢個窗口入咗嚟…
呢一刻，我…終於…見到喇…
係個凌空冇身體嘅人頭，應該直接叫「鬼頭」啱D。
經過尋晚嘅一嚇，加上「佢」依家同我嘅距離，我唔係好驚。但係…「佢」依家喺正阿輝佢面前，唔知阿輝佢點諗呢？
呢次大鑊喇！阿輝佢呆到冇做到護身咒呀！
正當我擔心阿輝之際，突然…
「蓬~！」
一聲之後，我見到一個雄偉嘅身影…
「佢」左手伸到直一直，抓實咗個「鬼頭」…
(待續)
下集預告︰
「白龍飛天！」…「紫龍神劍！」…