米米蓮妖怪作品 -《旅行‧如此‧難以忘‧記 》(百集長篇): 第041集 ~ 明︰呢邊都有一對…唔係，幾對先啱，波呀！(少少甜)
第041集 ~ 明︰呢邊都有一對…唔係，幾對先啱，波呀！(少少甜)
「你，夠，膽，講，多，次！」
個死「肥妹」呢六個字嚇到全場呆晒，咪住先，收返個「死」字先，唔係俾佢聽到，我就真係要死喇。
不過估唔到阿輝佢竟然為咗「大袋」個死仔，講出「鍾意食嘢嘅女仔，不知幾靚，幾吸引」…
嘩，呢幾個字真係令我佩服到五體投地，但係唔知點解，我都係用咗我嘅一線眼啤住佢…
阿公佢其實都俾「肥妹」嚇咗一嚇，不過之後聽到阿輝講呢句嘢，佢都笑咗出嚟。
「肥妹」佢含情脈脈咁望住阿輝，好在唔係望住我啫，我有諗過去幫阿輝架，不過我真係諗唔到點幫咋。
「肥妹」自稱柏木阿芙，仲讚阿輝似張國榮！？唔係呀？不過講真，阿輝又真係OK靚仔嘅，講起嚟都幾似Leslie…
除咗阿欣，其實都仲有好多女仔鍾意佢，唉，唔好講呢D喇，講到我都有D黯然神傷，我都唔係唔靚仔架，不過唔係「白飯」型囉。
原來香港明星真係咁威，個「肥妹」因為Leslie竟然學到咁流利嘅廣東話。
「變成而家咁」呢幾個字由「肥妹」講出嚟，真係可圈可點，都唔知佢講緊而家妖怪咁嘅身體定係講緊佢咁肥…
不過呢D嘢俾返阿輝佢理啦，「肥妹」睇嚟對佢好有興趣。
一聽到「喪狗」佢幫手解圍，梗係雞咁腳走啦，仲等咩？
「咁我食住嘢等你返嚟丫！」
嚇死人咩？係我肯定唔會再返嚟，容不易食埋我…隻「豬」架？
出咗門口，我哋即刻行樓梯返落大堂，阿輝佢鬧鬼「大袋」。
「死仔，呢次累死我喇，你自己夜D嚟攪掂佢呀！」
「首先，真心多謝你嘅拯救，你就如我嘅再生父母，不過愛情呢家嘢，唔係我嗰科，真係幫唔到你。」「大袋」仲講風涼話。
「哈哈，仲想攪掂佢呀？佢食到咁樣，我哋是但一個都一啖俾佢食咗啦。」而我就咁講。
「咁你哋兩個又唔係幾啱，阿輝佢已經好慘喇，潤少佢一陣啦，呢幾日佢都唔知點先可以逃過「肥妹」嘅五指山嚧。」「喪狗」佢都咗句。
「係噃，真係可以點走呢你估？」哈哈，阿公都潤咗阿輝一句。
突然，後面一陣風吹過嚟。
「你哋做咩咁講呀？阿芙佢好善良架，佢其實都幾靚女丫。」原來係阿妮。
又一次幾對「凌空啤」啤埋去，估唔到妖講大話仲勁過人。
「你聽到晒我哋講咩？「佢」聽唔聽到架？」阿輝問。
「咁你又可以放心，阿芙佢食嘢時候都好專心嘅。」
「睇得出！睇得出！」
一落到樓，阿妮就返埋位做嘢，我哋都見到「光管陳」喺度。
「阿Sir，帶我哋去邊度威呀？」「大袋」懶熟咁講。
「我好似冇話帶你去噃，你D功課做晒未呀？你好似仲爭幾份功課未交噃！」
「哈哈，原諒佢啦，阿Sir，功課返香港我哋幫你提佢，而家就免為其難，帶埋佢去見識吓啦。」阿輝講。
「我講吓笑啫，不過一陣唔係講笑，要聽晒我話，OK？」
「OK！」
「但係其實而家我哋去邊呀？」「喪狗」再問。
「去邊就未知，不過係去「鬼竇」，譚永倫同施計從撞咗鬼，你哋冇人睇得出咩？」
我好想串佢，但係淆，不過永遠總係有「大袋」做前線。
「你以為我哋係你咩，點睇得出呀？」
「光管陳」碌大對眼望到「大袋」淆底為止…
「呢次你啱，不過態度唔好，返到香港先炮製你。」
佢再講︰—
「頭先我見到佢哋兩個頭耷耷咁出咗去架喇，肯定係去「鬼竇」，我放咗D嘢喺佢哋身，方便我哋去追蹤佢哋，你哋而家跟住我，記得唔好太嘈，小心D。」
之後，我哋一行五人一鬼就出發追蹤阿倫同「細鬼」，大家一路跟住「光管陳」行…
行過唔少大街窄巷，街上面見到我哋嘅人，都會用奇異目光望住我哋，真係瘀皮到爆。
不過，都算好快就搵到佢哋，我哋見到阿倫同「細鬼」個背脊，佢哋行得好慢，向住一個好多燈光嘅方向行去…
我哋就一直保持距離跟住佢哋，不過講真其實都好明顯，只不過佢哋兩條友真係混混沌沌，我哋跟住佢哋都唔知啫。
佢哋入咗呢條咁多花燈嘅鬧市就失蹤咗，呢度好多店舖，但係D人好似自己有自己做嘢咁…
全個鬧市都係人，但係冇人望到我哋咁，同頭先經過嘅街道感覺好唔同。
「陳Sir，呢度係咪有咩唔妥呀？點解D人咁怪咁嘅？」阿輝問。
「D人！？丫，我唔記得咗我開咗法眼，呢度一個人都冇，係個荒野嚟，等我幫你哋開眼啦。」
「等等，不如一陣先啦。」我心諗，有靚嘢唔睇，睇恐怖嘢係咪傻架？
「好，一陣差唔多上堂先幫你開啦。」
「上堂！？」
「係呀，今日就教你哋點捉鬼。咦，喺嗰邊，跟我嚟。」
我哋幾個就跟住佢行到一條冇人嘅後巷，呢度雖然冇人，但仲係燈光火著，隔離似係個浴場…
「光管陳」擒咗上個木箱度企咗喺度，(目及)嘢呀佢？
「你哋都上嚟啦。」估
唔到佢竟然係個大鹹濕，我睇錯咗佢，咦，我跟上去咪變小鹹濕？
「上嚟啦，扮咩嘢啫。」「大袋」佢哋都上咗去，仲對住我講。
我見到「喪狗」﹑阿輝﹑「大袋」順序都一望到入去就即刻另返咗轉頭，紅晒塊面咁，我就擒上去試吓望入去睇吓咩事啦。
嘩，我差D就叫咗出嚟，我睇到眼都凸埋，即刻就另返轉頭。
我見到嘅係，四個女人赤裸裸肉騰騰咁圍住阿倫同「細鬼」，摸吓摸吓佢哋個身，佢哋兩條友都係冇著衫褲，真係連條…
「丁」到露埋出嚟。四個女人仲離譜，身材凹凸有緻，紅藍黃紫四色內衣，一人一隻色…
D內衣淨係識避開重要部位嚟遮住，完全想唔明佢哋嘅作用，一人一對…唉，我都唔識形容喇，大波波囉…
睇到我哋 丫…到呢一刻，我終於明白到點解D伯父成日講「打飛機就叻，有女唔識JEK(食)」係咩意思，睇我哋四個就知。
「你哋做咩另轉晒面呀？」「光管陳」問。
「大袋」望一望佢。
「因為…我哋唔想好似你咁流鼻血…」
我哋三個都對「大袋」呢句說話表示敬佩。
「Sorry，呢排比較躁火。」「光管陳」答。
我再望一望阿公，佢都(目及)完望過嚟我度，我見到佢個樣…
「頂你，你係鬼嚟架，學咩人流鼻血啫。」
「阿公在生都未見識過D咁精彩嘅鏡頭，唔好怪阿公學人流鼻血啦，俾阿公欣賞多陣啦。」講完又另返去繼續(目及)。
「陳Sir，你唔係開咗法眼架咩？點解睇到同我哋一樣嘅？裡面嘅係人？」「喪狗」問。
「啱啱忍唔住誘惑閂咗一陣法眼，你話D妖邪幾咁邪惡丫。」
咩唔係佢自己鹹濕邪惡咩？
「好啦，再咁(目及)法，未捉鬼就流血身亡喇，開法眼啦，你哋做好心理準備，再唔會係四條索女，係四隻女鬼嚟架。」
佢唵住我哋對眼，敲吓我哋個頭，又唔知做咗D乜咁就叫我哋開返眼。
「OK喇，睇到咩嘢？」
「爛木屋？」我哋一齊問。
「四圍D嘢去晒邊呀？」真係好神奇呀，所以我咁問。
「荒蕪到咁陰森恐怖嘅…」「大袋」講。
「四周圍得返呢間木屋咋，大家準備啦。」「喪狗」嗌。
大家準備好，面向木屋，「光管陳」大叫一聲，就一腳踩爆道木牆。
木牆冧咗，我一望埋去…見到個畫面…真係「丁」都縮埋…
(待續)
下期預告︰
一陣帶你喺香港睇日本鬼