米米蓮妖怪作品 -《旅行‧如此‧難以忘‧記 》(百集長篇): 第050集 ~ 明︰呢邊阿公對「夜叉」，「鍾馗」對「鬼武士」呀！
第050集 ~ 明︰呢邊阿公對「夜叉」，「鍾馗」對「鬼武士」呀！
嘩，第五十集喇，梗係要慶祝吓啦！
(慶你條命，有命返到香港先講啦！)
而家我識護身咒，仲自創「六脈齊發」，我使驚返唔到屋企？
(六你條命，撞手神當自己救世主呀？一陣遇到我，你就知死！)
我嚇大架！驚你條春咩！一陣打爆你個死人臭口添呀！
而家，我就喺正你面前講故仔，睇你奈得我咩何？
上次我呻完話鬼多過人之後，佢哋班傻佬連「鬼姦」都出埋，真係睇AV睇到上腦。
不過我冇理佢哋嚧，而且旅遊巴好快就到咗，我就跟大隊上咗車出發去地藏廟…
所謂地藏廟，唔係好似香港嘅咁嘅，係參拜地藏菩薩嘅廟，日本人好似叫做神社。
「光管陳」佢噤住個肚就走開咗，梗係想去「爆石」頂啦…
班衰仔就冇人聽阿輝勸，成班衝咗去地藏廟隔離間鬼廟度，我唯有都跟埋去啦。
呢度一條大路分幾條細路去唔同嘅參神位，呢度真係幾大，路邊都係D揸住長矛嘅日本人像，睇落去都幾英咁。
我哋分咗兩堆人，我同「喪狗」一齊，仲有成十個同學，阿輝同「大袋」就跟另一堆人。
阿輝佢哋去咗左邊，我哋去咗右邊…
因為兩邊都有間較細嘅參神廟，中間間大廟太多人喇，根本入唔到去，所以我哋咪咁行囉，行到入去…
「唔係呀？咁恐怖都有人拜？呢個唔係「夜叉」嚟架咩？」我問。
「「夜叉」嘅嘢，你識條春咩！？」
「你又識咩？」
「唔識。」
「哈哈哈！」
「「夜叉」係食鬼嘅神，拜佢都唔係咩問題丫。」
「你估係幫你先食架咩，人哋係本來就當鬼係食糧咋，使鬼拜咩！」
「咁呢度D人鐘意拜都冇計架？」
「你睇吓個像，好似想連人都食埋咁。」
「食佢丫，食佢丫，佢夠晒大舊呀。」
「你哋唔好咁嘈啦！好多人拜緊神架。」
「拜神啫，邊個話唔俾講嘢架啫，你估去圖書館咩？」
「不過個像真係好鬼醜樣！」
佢哋你一言我一語咁，聽到我都煩喇，咦！唔係噃！食鬼嘅神！？阿公呢？
「阿公！？阿公！？」我用盡全力以最大聲咁細細聲嗌。
死喇，佢唔係俾個「夜叉」食咗呀？咪住先，「佢」係個石像嚟架啫，應該冇事呱？
我喺個袋度攞返咗道「黑色符」出嚟，再襯身邊冇乜人就向住佢再嗌。
「阿公！？阿公！？」
「公乜嘢啫！阻住晒人哋發夢！」
「睇你個淫樣，梗係又諗尋晚嗰四隻女鬼啦！」
「阿公諗咩，關你D細路仔咩事啫，無大無細，不過佢哋真係幾正。」
「又唔見你發夢見阿婆噃！」
「唔係講笑，你阿婆後生仲正！不過而家就…(嘔)」
「仲玩！你而家前面係隻食鬼嘅神呀！我擔心你先搵你咋！」
「食鬼神？新GAME嚟架？」
「哎也，「夜叉」呀！」
「母夜叉？醜樣婆？」
我已經頂唔順佢喇，直接捉住佢個頭另去望住個「夜叉」。
「嗚哇！嗚哇！呀~~~~~~！」
咩事呀？突然聽到有嘢大叫咁，當中仲夾雜住一堆沙石聲。
「哇丫！哇丫！」
周圍D人好似好驚咁想走出門口，人踩人人撞人咁，情況好混亂，佢哋班衰仔都即刻扯埋我走。
我俾佢哋扯咗出門口之後，見到個天變晒色，藍藍紫紫，紫紫黑黑，好似入咗個混沌世界咁。
四周圍D人口吐灰煙，雙眼反白，好似唔知中咗毒定中咗邪咁，場面怪異中帶點寒意…
得我哋班同學冇事，我估係因為「光管陳」俾嘅校章保護住我哋。
D本身嚟呢度參拜嘅日本人變晒行屍一樣，緩緩抬起個身就望住我哋班同學…
似乎係因為我哋非佢哋族類啦，佢哋仲好似想將我哋殺死咁嘅款。
「停止呼吸！」
「扮同類啦！」
「仲講，走啦！」
唔知邊條木嘴喺度廢噏多過乜，佢哋咁諗梗係全部都錯晒啦…
好在，仲有「喪狗」佢好冷靜咁造好晒「九字護身咒」保護大家。
另一邊，我見到阿輝佢哋都出返嚟。
「呢度又乜事呀？」阿輝佢問。
「睇嚟我哋入咗混沌世界，似係隻「夜叉」造出嚟嘅，不過點解就唔知喇！你哋都入咗個「保護網」度先啦！」
「喪狗」講完之後，全部人都入晒個「保護網」度。
「其實發生咩事呀？」黃仔問。
原來條友跟咗我哋嚟呢邊，我諗我哋部份人係去咗「地藏」嗰邊，所以佢哋應該平安無事。
但係…D行屍已經行緊埋嚟我哋度，仲好似想拆我哋個網添。
「呯嘭！」天空中出現一條裂縫，白光由外面透入，一個身影從上而下咁飛落嚟。
我頂！原來又係「光管陳」，係要擺晒甫士咁嘅，我仲以為咩天兵天將添。
「大家揸實校章，用校章當武器對付佢哋就得！」「光管陳」大叫。
之後，班衰仔真係就去當玩咁玩，試咗一吓OK，就一人一個係咁追D行屍打。
死人白痴「黃仔」，仲喺度念「我們在天上的父…」，而家食晏咩？好在大家打屍之餘都有保護埋佢。
但係當大家打到興起，路邊D長茅石像突然郁起嚟，雙眼發紅光咁…
佢哋企定身就一支長茅飛埋我哋度，我哋想匿都匿唔切。
「鳳凰擺架！」
「光管陳」又用呢招接晒所有長茅，型就幾型嘅，但係有冇招新架？
隨住長茅俾佢沒收，成班石像向我哋衝埋嚟。
「大波翻雲破！」
阿公呢招就勁喇，改一個字，連力量都唔同埋，個浪都大D，成班石像鬼總算俾佢制住咗個衝勢。
我亦跟隨佢哋步伐，整好咗我嘅「六字護身咒」，準備用「六脈齊發」。
石像鬼都未平覆啫，夜叉廟突然「龐！」一聲，成隻「夜叉」就從屋頂飛咗出嚟…
而家，佢喺空中，求其好輕鬆咁就執咗兩隻行屍隊入口，成班同學望到呆晒，唯有縮埋一齊。
一波未平，一波又起，另一邊廟唔知幾時，唔知點樣，無端端仲多咗隻「紅眼骷髏武士」…
使唔使咁疊馬呀？兩隻大佬，十幾廿隻石像鬼，無一千都有幾百嘅行屍，圍都圍死我哋啦，點算呀！？
「我諗係因為我隻「夜叉」先重生！呢隻嘢由我嚟啦！」阿公咁講。
「學淵(即係「喪狗」)﹑嘉輝﹑家明你哋睇住大家，隻「鬼武士」就由我攪掂啦！」「光管陳」好認真咁講。
「點解冇講我嘅？」「大袋」呢句廢話可以唔使理。
「光管陳」講完之後，做個手印，之後係咁踏地…
「蹼蹼蹼蹼蹼蹼蹼蹼~」。
突然，「哈！」一聲，全場震攝，成個人飄咗喺半空，長髮長鬚，滿面通紅咁，手上仲執住一把長劍。
「判官？」我問。
「鍾馗呀！」阿輝講。
(待續)
下集預告︰
天下之大，除咗東南西北中五位高人，仲有二絕，稱之謂「風婦臣婆」…