第056集 ~ 明︰肥咩僧丫,我叫佢「肥龍」,睇嚟佢有D料噃!

其實阿輝佢講得啱,我係真係好緊張…

我亦好擔心自己唔可以同小倩佢結婚生仔,畢竟就算係國家大事呢D嘢,都唔及得兒女私情咁重要丫嘛…

不過…我更擔心嘅係…我就連孝順父母嘅時間都唔會再有…

(睇你個樣唔似咁孝順噃!)





阿爸佢讀書唔多,成世人最叻嘅就係學李小龍咁,功夫佢就學唔到,淨係學咗一句說話…

仲成日掛喺口邊,「我讀得書少,你唔好蝦我」。

佢細細個就要出嚟做嘢, 打工賺錢養家,靠住自己一雙手,每日勞力工作…

辛辛苦苦先養得起呢頭家,將最好嘅都俾晒屋企人,自己就連衫褲都唔買多件…

咁多年辛苦嘅工作,換來嘅係一副 五勞七傷嘅身體,成日話腰骨痛,手腳痛咁,叫人點樣唔擔心丫?





阿媽佢生咗我之後,百病纏身,又糖尿病,又偏頭痛,試過出去做嘢賺錢…

但係亦試過做做吓嘢累低咗,屋企人都擔心佢多過自己,而家仲…(抹抹眼淚)…

算喇,喜劇嚟家嘛,唔諗負面嘢喇,為咗佢哋,我一定要生存落去!

我唔會再令佢哋擔心我,傷心嘅嘢就同眼淚一齊留返喺個心裡面啦,正所謂歌都有得唱啦—男人仆街讓女人流淚丫嘛!

所以我一定唔會仆街嘅,亦唔要阿媽因為我而流淚!我會繼續以樂天嘅態度去過我嘅人生!





講返「酒乜吞童子」先,呢邊總算已經攪掂,之後我哋好快就搭車返晒去酒店,大家都各自返到自己房。

我見自己返酒店途中諗得太多唔開心嘢,唔想自己鬱埋鬱埋,所以想搵個人分擔一吓…

我本來係想搵阿輝佢哋三個傾吓心事架,但係…一來,麻甩佬有D嘢好難開口嘅…

二來,阿輝唔知去咗邊,「喪狗」就去咗溫女,「大袋」又去咗爆石,所以…

我好自然就諗起另一個可以傾訴嘅對象,我女朋友,小倩!

我好厚面皮呀可?人哋都冇應承過做我女朋友就咁叫人哋,但係…唔厚面皮,點追女仔呀!?

我之後自己一個人離開咗酒店去搵小倩,行行吓見到個地鐵站口就落咗去,不過…

奇怪喇!呢個位原本唔係個地盤嚟架咩?不過算啦,都落咗去嚧,呢度人影都冇隻…





人影都冇隻呢家嘢,就意味住冇人會查我,亦意味住我唔使俾錢搭車…

不過,其實係因為我得幾張大紙冇散紙啫,我都唔想架…

(扮咩嘢啫!搭霸王車就搭霸王車啦!枉我頭先仲俾你攪喊咗添!)

係呀!我認呀!拉我丫笨!我就係咁,落咗月台…

落到月台,我見到架車就開,咪即刻衝門囉,身為香港日日搭地鐵嘅一群,我點可以眼白白睇住架車走架,我「呵」一聲就跳咗上車。

車門閂埋嗰一吓,一個人從罅隙攝入嚟,真係嚇鬼死我,點知…

原來係阿輝。





「你做咩跟埋嚟呀?」

「我擔心你俾鬼迷呀!」

我之後將認識小倩嘅經過都講晒俾佢聽。

「咦,你阿公呢?」

「佢話頭先打鬼打到攰,要返房睇睇「大電影」充充電喎。」

「咁你隻「戇居狗」呢?」

「人哋叫「居居」呀!佢話今日成日都冇玩過波波,要返去同阿妮玩喎。」

「嘩,果然識揀人玩!」





「唔好諗衰嘢啦!」

「咦!奇怪喇!點解仲唔開車嘅?」

「有冇人呀!?有冇人呀!?」我睇住阿輝佢不斷咁大叫。

我心諗,佢唔係覺得呢度有人識聽廣東話呀?我見佢係咁嗌,咪陪佢癲吓囉,跳起身就兜嘢拍落去個緊急安全制度,但係…

換來嘅係…地震!?

「龐龐,龐龐~!」

咩事呀!?黐線架!?日本D安全制咁唔安全嘅!噤個制啫!使唔使放隻「恐龍」衝過嚟呀?





唔好話俾我聽係佢係職員囉!個樣咁「親切有禮」就唔在講啦,一身麻衣木珠,仲要加個布袋…

如果佢出聲話自己係職員,我諗我真係要重新評估一吓日本人嘅品味囉…

見慣鬼怪嘅我哋,當然唔會俾佢嚇到淆底啦,嗱嗱聲就造好「九字護身法」!

冇錯!我已經識做晒「九字」,無他嘅,我驚「六字」頂唔住隻「肥龍」丫嘛…

佢衝到過嚟,竟然冇傷害我哋,反而「嘰呢咕嚕」一番,我想問,我哋兩個邊忽似架仔呢?

隻「肥龍」後面轟轟隆隆咁,好似有一大堆嘢衝緊埋嚟,但係俾佢個肥身阻住晒我視線,攪到我睇唔到…

佢望一望後面,突然雙手運勁…

「噼嚦,啪嘞,噼噼,啪啪~!」

佢雙手發出電光,「哈」一聲將兩個電光球掟出去,隨住佢稍為轉咗肥身,我見到電光球打向一大堆鬼怪…

我驚又嚟唔切,讚又嚟唔切,連避都嚟唔切,「肥龍」另返轉頭就一手捉住咗我個頭,一手捉住阿輝個頭向另一邊跑去…

「喂!唔好捉頭得唔得呀?好很痛呀!」

「個頭就嚟甩喇!」

死人「肥龍」仲要跑得超快,就連鬼怪都追唔到佢嘅速度,請問有冇當過我哋兩個係人呀,好很痛呀!

「姨!」

你話死唔死丫?條頸俾佢整到連個「咦」字都變成「姨」音,我離遠見到一個老人,佢氣定神閒咁坐咗喺左邊手嘅長櫈中間…

「肥龍」見到佢,立即衝上前就停低咗…

「嘩,我條頸呀!」

「肥龍」將我哋放低,而且好恭敬咁向呢個老人家行禮。

「咦!廣東話!?」老人家咁講,佢竟然識聽?

「香港人梗係講廣東話啦!」我答,我郁郁個頭,整整條頸,之後再問︰—

「咦,咁你又識講廣東話嘅?」

「香港人梗係講廣東話啦!」老人家串嘴回應,佢之後轉身就打落「肥龍」個頭度。

「巴架耶魯!」老人家好惡咁鬧「肥龍」。

呢句我識聽呀!不過,之後佢都係嘰呢咕嚕。

佢講完之後,「肥龍」就喺自己後面攞咗道白色嘅符隊咗入個口度吞咗,我好奇…我好好奇…

點解佢後面冇褲袋都可以攞到張白色紙出嚟架?究竟喺邊度攞出嚟架?我參透唔到呀!

不過,你唔好理,食完白符之後,佢竟然識講廣東話,世事果然無奇不有!

「你兩個做乜喺度架?你哋知唔知呢度係大蛇妖身體裡面?」「肥龍」咁問。

「大蛇妖身體裡面!?」我同阿輝一齊講。

我哋未得閒問個老人係邊個,因為D鬼怪都已經跟到上嚟喇!

「肥龍」突然蹬大對眼,另轉肥身,向住鬼怪,雙手做出…竟然…竟然…係呢個動作!?

「噼嚦,啪嘞,噼噼啪啪,噼噼嚦嚦,啪啪啪啪~!」

佢座低個身,雙手電光匯聚,之後身體隨住雙手另向一邊腰間,一個強大嘅電光球就喺佢腰間嘅呢雙手之中變得無比強大,電光噼嚦!

說時遲,那時快,佢雙手已向鬼怪用力一伸,大叫︰—

「紫,電,靈,丸!」

光球隨即射向鬼怪,唔係講笑,八千幾條閃電連住一個光球,配上車廂嘅狹窄空間,就好似幫架車清理腸胃一樣…

D鬼怪根本冇機會亦冇空間生存到,簡單嚟講,渣都冇得剩…

但係,我反而係想講嘅係…點解…點解呀?點解要係呢個名呀?我唔想呀!

「我唔鐘意呢個名囉!」

阿輝佢竟然直斥其非,我除咗呆咗,就只能心裡面表示認同加一。

但係…「肥龍」佢…

(待續)

下集預告︰

邪道外魔都企一邊~~~