第069集 ~ 欣︰我被嚇暈咗…13樓出事喇!

上次講到我抵受唔到「異性相吸」嘅吸力,慢慢咁俟埋輝輝度,而且佢隻手仲好似想唔規矩添。

當我等緊佢隻手埋嚟嘅時候,佢無端端彈咗起身,仲揸起個搖控,噤開咗部電視…

但係,佢個樣好攪笑架,一副好後悔咁嘅樣,佢仲即刻靜音咗部電視添…

佢轉個身就坐返落嚟,佢仲…





用佢迷人嘅眼神望住人哋,而我就…

只有望住佢,輕輕力咁呼吸,一邊聽住自己嘅心跳聲,一邊…

等住佢嚟錫我,而終於…

佢真係錫咗我一啖,我…我…佢…佢個嘴好軟呀。

當我想合埋眼享受呢一刻嘅時候…





「嘭~!」

房門突然打開,我都未知係邊個,就即刻驚到縮起嚟喇!

畢竟,人哋怕醜丫嘛!

「即刻出去!出去執返你朋友呀!」

原來係家姐,佢好惡呀!睇嚟輝輝朋友要遭殃喇。





輝輝同我耍個手就出咗去救返佢朋友。

「細妹!朱嘉輝佢有冇對你唔規矩呀?」

睇嚟我縮得切,家姐睇唔到輝輝錫我一幕,所以我即刻咁回答︰—

「佢邊敢噃!你估佢唔驚你殺咗佢咩!」

之後,我喺度扮寫日記,而家姐佢呢,睇咗陣電視就訓咗嚧。

我心諗,最衰係輝輝佢啦,人哋本來想話佢聽佢有危險家嘛,點知佢又…

唉,都係算喇,都係等「先生」聽日過嚟先講啦。

我見家姐佢訓到鋸鋸聲,我咪自己靜靜雞,偷偷地出去行吓囉。





………

係呀,我認呀!我係想出去搵吓輝輝喳嘛。唔通想見吓自己男朋友都唔得咩?

我行到出走廊,見到一個女職員,我先記得原來我唔知輝輝幾多號房架喎…

所以,我咪想上前嘗試問吓佢囉。點知…

「美奈子,你點呀?你好似唔太舒服噃!不如換我做,你抖吓啦!」

係一把…男人嘅聲音!?唔通又係俾鬼上身!?佢其實係背住我嘅…

我見佢似乎未知我喺度,我就即刻做咗「隱身咒」,諗住返房先。但係…





個女人突然一吓180度另個頭過嚟,我…我即刻就俾佢嚇到呆咗,點知佢仲…

拉開自己個口,個爛咗嘅口度,仲要衝咗個人頭出嚟…

我…就咁俾佢嚇暈咗。

………

到我醒返之後,我發現自己唔知身處喺邊…

呢度…都係正正常常嘅一個酒店房,冇乜特別。我即刻企起身就諗住離開。

點知突然廁所出咗一個男人出嚟,我立即再做「隱身咒」。

「隱身咒對我冇用架。」





原來係達叔。

「達叔,係你喺隻怪物手上救返我架?多謝你呀!」

「哈哈哈哈,唔應該話我救咗你,因為頭先根本就係我嚇親你,不過正確嚟講,係美奈子嚇親你。」

佢講嘅美奈子應該就係個女職員,但係我唔係完全明白佢講緊乜嘢。

「頭先嚇親你,唔好意思呀,我叫咗美奈子好多次唔好咁樣架喇,可能佢太緊張啦,哈哈。」佢面帶點尷尬咁講。

「冇錯,我係隻妖怪,正確嚟講,應該講我係人,美奈子先係妖怪,我哋同體嘅,不過你唔使驚,佢都係好人嚟架。」

點解佢咁似輝輝講嘢嘅,係咪係男人都係咁講嘢架呢?





邊有人咁怪,自己話自己係好人架啫?

但係…似乎「先生」同「風婦」前輩所講嘅嘢都應驗咗噃!

妖魔鬼怪纏身,但係會冇事,因為D妖魔鬼怪都係好人!?

雖然頭先係恐佈咗D,不過知道咗係達叔嚟,我都放心返D…

畢竟佢請過我食嘢,同佢識得阿妮丫嘛。

「嘟~ 嘟~ 嘟~ 嘟~」達叔身上突然發出D咁嘅聲。

「係唔係美奈子要出嚟呀?」我有D驚佢再嚟換樣。

「唔係,係樓上似乎出事喇,eee…不如你先返房啦。」

「咩事呀?我可唔可以跟埋去睇吓呀?」

「咁呀,eee…等我報警先。」

「報警!?」

「係呀,你見過啦,河童呀!」

「河童!?」

佢轉個身就去打個電話。

「喂,Pakka,13樓有事呀!快D嚟啦!」

「吾吾吾,咁我哋上去先啦,你快D嚟喇喎。」

「得架喇,你而家同我一齊上去丫。」達叔另返轉頭過嚟同我講。

之後,我哋行咗去後樓梯,但係…點解淨係得一幅牆嘅?

達叔做個手印,點咗吓牆,成條樓梯就出咗嚟喇,原來呢度有D咁嘅機關架喎。

我哋沿住樓梯向上行,差唔多到,已經聽到上面好嘈,所以達叔同我都加快腳步…

………

行到去13樓門口…

「哇丫~!丫~!嗚哇~!」

一陣慘叫聲,達叔打開道門一睇…

「哇丫!」呢次係我叫咗出嚟。

我見到個有角嘅男人俾班…

傳教士!?打到頭破血流,血流披面咁。

嗰種恐佈比起鬼怪嘅驚嚇嚟得更加真實同心寒,我成個人就咁嚇到呆咗。

「做乜事呀!?大家以和為貴啦!大家都係呢度嘅住客。」

當達叔分開大家之際,我見到輝輝嘅朋友,阿明呀!佢俾D人噤咗喺地下…

「快D救佢呀!快D救佢呀!」

點知…原來…噤佢喺地下嘅就係班傳教士,我已經俾佢哋嚇到喊晒口…

估唔到…佢哋仲…有一個人衝咗埋去,想用支手臂咁粗嘅銀棒打落阿明度。

「啪~!噗~!碰~!躂~!嘭~!」

咦,係陳老師呀!佢救咗阿明呀!嗰五個壞人俾佢三兩吓手打開晒。

而且,我仲見到個男仔衝埋去一拳打落個傳教士度,點知俾人一人一拳打返轉頭。

幸好陳老師再出手打開D壞人,似乎…

陳老師﹑阿明同佢朋友都係企咗喺鬼怪嗰邊,同D傳教士打鬥緊。

傳教士大約有20人,鬼怪就有30隻左右應該係太驚縮埋咗一邊…

而地下被打傷嘅就有約10隻鬼怪。但係…咦…

達叔做乜嘢突然縮埋一邊呀?佢都因為怕事所以咁!?

「大師兄!?」陳老師突然大嗌,似係嗌緊達叔。

達叔即刻走咗去,同時間,傳教士想繼續出手攻擊陳老師佢哋同D鬼怪,但係…

全場突然變得冰冷,一種似曾相識嘅感覺,我記得喇!係雪女呀!

但係只係啱啱先凝結冰層,冰層就好快退去,換來嘅係…

「匙~ 匙~ 匙~ 匙~」

地下再次出現水氹,係Pakka呀!佢帶返雪女返嚟。

(待續)

下集預告:

我毛管立即豎起晒,仲覺得好心寒添…