米米蓮妖怪作品 -《旅行‧如此‧難以忘‧記 》(百集長篇): 第071集 ~ 明︰真相！？攪掂13樓後再講啦！
第071集 ~ 明︰真相！？攪掂13樓後再講啦！
阿輝，我一陣先接返你嗰邊，睇咗我呢邊先！
班西人，果然夠「西」，唔啱自己意見，連人類都照打，佢哋連我都打埋…
幾個將我噤喺地下，一個仲拿起支銀棒兜頭打落我度！
好在，有「光管陳」幫拖，加上…
「細鬼」！？佢幾時變得咁勇猛呀？佢喺「光管陳」旁邊，兜搥打落個西人度…
雖然佢俾人打返轉頭，但係佢有心救我，都算兄弟喇！不過…
我都唔記得，佢其實睇唔到D鬼怪，我估佢淨係見到D西人打我。
而家我哋三個企喺鬼怪嗰邊，同D傳教士對侍緊…
「陳Sir，幫幫「細鬼」開法眼先啦。」
「開乜鬼嘢呀？我一早睇到啦！」
原來佢睇到架喎！我(火羅)咗添。
呢班鬼怪根本好怕事，數目比班西人仲要多，但係連出吓手反抗一吓都冇…
我哋同班西人一直就對侍緊，情況一直都僵住，點知突然…
「大師兄！？」
「光管陳」突然向後樓梯方向大嗌，我仲見到達叔同埋阿欣添。
但係達叔唔知點解，轉個身就走咗去…
俾人嗌聲「大師兄」啫，有乜咁大不了，要離開我哋，不顧而去呢真係？
同一時間，班西人真係衰到趴街，竟然想借D倚抽水…
班西人一湧而上，衝埋我哋度，但係…
地下突然結起冰嚟，將佢哋嘅衝勢都停住咗，不過D冰好快就退咗。
之後，地下傳出D咁嘅聲，我仲見到有個水氹出現咗。
「匙~ 匙~ 匙~ 匙~」
一隻禿頭，綠面，黃色短鳥嘴嘅妖怪喺水氹中轉出嚟，仲要帶住隻白璽璽嘅女…妖。
睇個樣都已經知，嗰隻好明顯就係「河童」，另外一隻，我叫佢…「白姐姐」啦，佢白成咁。
「做乜嘢！？做乜嘢！？」
「河童」第一聲就問班西人，「白姐姐」就聲都唔聲，似係佢嘅跟班。
我﹑「細鬼」同「光管陳」都覺得好愕然，阿欣就襯時機走返埋我哋度。
「人哋好好地，冇攪你哋，你哋做乜要攪人哋呀？」「河童」再問。
「自古正邪不倆立！」一個會講國語嘅西人出口。但係…
「光管陳」唔知發乜神經，聽完呢句，突然一個箭步衝咗前去，一巴就打落個西人度…
條友當場俾佢打到飛起再跌返落地，仲暈埋添…
全場都俾佢呢一吓嚇呆咗。
「高手！你唔好咁嬲嬲豬住，呢度我地頭，等我處理就好。」「河童」咁講。
另一個西人用英文大約講話「光管陳」都係怪物一伙，要將佢同D鬼怪一齊「處理」埋。
之後，佢哋攞咗更加多武器嚟對付我哋…
「你班屎忽鬼，唔啱你哋就連人都打！？我就打鑊金你哋嘆吓！」「河童」似乎唔係少嘢。
「水淹金山！」佢用一把走音嘅聲嗌出嚟。
突然成個場注滿晒水，所有人類鬼怪迅間被淹沒。
「飲淡水冷靜吓啦！」「河童」再講。
「Wuppppp~ wuppppp~」
D西人想講嘢都講唔到，似乎淨係得「河童」可以喺水裡面講到嘢…
咦，唔係噃！「光管陳」結咗個能量網俾我哋，我哋俾個氣泡包住，仲好輕鬆咁呼吸到。
但係…之前坐喺大堂嗰兩個西人都唔弱，佢哋都結咗個網…
「河童」見到佢哋冇俾水浸住，即刻就收返D水，河水好快就流走晒。
「估唔到你班屎忽鬼都有D料噃！咁就試吓我呢招啦！」「河童」收完水就咁講。
「河，童，水，炮！」
嘩！屙尿就屙尿啦！仲攪到阿欣個樣好尷尬添。
一條水炮射向班西人，呢招真係正，力量夠勁之餘，仲有侮辱成份。
但係，班西人仲想利用護網頂住…
「好似唔夠勁，你哋冷靜唔到噃！」
「靚仔河童，轟天水炮！」
轟天二字一出，冇喇！點頂呀！？
一條勁粗…嘅水炮射到班西人一仆一碌咁，唔知D水係咪仲有D特別成份呢？成班西人仲暈晒添。
之後，「河童」收返埋佢支「炮」，行埋去執返班西人。
「你哋唔使驚喇！清潔吓就繼續玩啦，不過夜晚唔好玩咁嘈，仲有，唔好好似頭先樓下嗰兩隻酒鬼咁，飲醉酒就去騷擾人類呀，明唔明？」
我見到班鬼怪都及頭回應「河童」，仲真係好乖咁清理返，而「河童」就話班西人佢會處理。
「唔使驚喇，「河童」係好妖嚟，佢會處理架喇。我有D事，要走先，夜喇，你哋都自己返房休息啦。」「光管陳」講完就走咗去。
「係呀，Pakka佢係警察嚟架，係嚟幫我哋架。」阿欣咁講。
「Pakka係…佢係警察！？邊個知呀？」我問。
「你睇吓佢支「炮」，成個日本警察廳標誌啦。」
估唔到「細鬼」咁眼利，不過我以為佢淨係留意女性重要部位啫，原來連男性佢都啱。
「Pakka！我哋走先喇！」阿欣對住隻「河童」咁講，之後仲拉埋我哋走，佢話想見吓阿輝喎。
………
返到落去…
「救命呀！救命呀！」
「大袋」個房傳出嚟架！咩事呢？我哋即刻衝咗去佢房門口…
佢亦都啱啱到咗門口開門俾我哋。
「死人喪狗，真係就變死人喇，快D嚟睇佢最後一面啦！」佢把死人口真係冇句好嘢嘅。
我哋即刻就衝咗入去，見到「喪狗」四肢抽搐，雙眼反白，好似俾鬼上身咁…
「丫~！丫~！」
「喂！喪狗！你冇事丫嘛！？」我係咁大叫，佢依然好辛苦咁。
「丫~！丫~！」
「佢係咪俾鬼上身呀！？定係有咩病呀！？」阿欣咁樣叫，但係「喪狗」仍然好痛好辛苦。
「丫~！丫~！」
我哋都唔知點算好，「大袋」想衝出去想叫人嚟啦…
「喂！唔好死住呀！最多我帶你去叫雞丫！」呢個時候「細鬼」竟然咁講，不過…
竟然有效，佢停咗抽搐，雙眼都正常返，「大袋」都返轉頭冇去搵人…
我哋就睇住「喪狗」慢慢醒返。
「阿狗，你冇事啦嘛？」都係阿欣把溫柔聲好聽。
「冇事，啱啱傾掂數。」「喪狗」唔知係咪傻咗，講嘢語無倫次。
之後，大家都陪咗「喪狗」一陣，傾咗陣計…
大家都諗住返房訓啦，點知…
出面有條友跑咗入嚟。
「喂喂喂！你哋睇吓！」
係阿輝呀！
「欣欣，你點解都喺度嘅？」佢見到自己女友喺個男人房，梗係要問一問啦。
「你哋睇吓呢段新聞丫！俾你個「傻佬明」鏟斷腳嗰條友呀！佢自殺死咗呀！」
佢竟然夠膽死唔等阿欣答就再同我哋講嘢。
「咩你唔知咩？你冇睇新聞架？」「喪狗」咁講，不過講真，我都唔知。
「仲好攪笑添，佢有寫遺書，話係因為阿輝鏟斷佢隻腳，佢先自殺丫嘛，但係明明係「傻佬明」鏟斷佢腳。」「大袋」都知，佢咁講。
「即係點呀？」阿輝無奈咁問。
「細妹！細妹！細妹！細妹！」房外傳嚟D咁嘅聲。
「死喇！係條八…欣家姐呀！阿欣你快D走呀！」
「大袋」驚到大嗌出嚟，乜欣家姐咁得人驚架咩？
阿欣同大家講聲再見就自己一個行返出去，閂返埋門。
「係唔係阿輝班友仔又攪你呀？」聽到門外欣家姐咁講。
我心諗，使唔使睇到自己個妹咁淫賤呀？
如果係嘅話，呢度頭先咪玩緊6P，我哋肯，阿輝都唔制啦！
「大袋」俾佢打殘咗，「喪狗」又啱啱先咩完，「細鬼」就淨係鍾意熟女，
而我當然唔會啦，阿欣係我初戀對象，我點會褻瀆自己嘅「女神」丫…
不過講返阿輝嗰邊先，佢問嘅「即係點呀？」即係點呢？我都唔係好明。
(待續)
下集預告︰
…個肥佬捉住咗家姐，仲想胸襲佢呀！