米米蓮妖怪作品 -《旅行‧如此‧難以忘‧記 》(百集長篇): 第076集 ~ 輝︰「紙妖」要聽你講，「雞妖」就呢度有隻！
第076集 ~ 輝︰「紙妖」要聽你講，「雞妖」就呢度有隻！
「喂！阿張出咗事呀！俾個癲佬脅持咗呀！」
阻人「打車輪」，猶如殺人父母呀！邊條友嗌呀？
原來係阿明喎。
「做乜事呀？」我幾經辛苦先可以冷靜返落嚟，我差D就想摙死佢。
上次其實我係講到「大袋」啱啱打走咗班男學生，不過我而家心情好低落，根本唔想再重覆…
大致上都同欣欣講嘅都差唔多囉。
不過，當欣欣同佢個惡死家姐喺廁所嗰陣，我一早就同「大袋」夾好晒…
諗住咋咋啼靜靜雞咁拉走欣欣，「大袋」有「大袋」佢哋曖昧，我有我同欣欣纏綿家嘛。
我仲準備埋「小動物攻勢」，即係用「居居」嚟氹吓欣欣咁，之後就會…
進行我嘅大計，錫佢家嘛。
點知…唉…真係冇晒心機啦，只係可以點咗一點欣欣個嘴咋。
「係咪阻咗你哋拍拖呀？唔好意思呀。」
佢真係…仲好意思問嘅。
「不過…阿張俾個癲佬脅持住呀！快D過去幫手啦！」
………
欣欣一直冇出聲，我就拖住佢隻手，一齊衝咗去睇吓發生咩事。
行到一條內街，我哋班同學同老師都喺晒度，側邊仲有唔少圍觀嘅人…
我同欣欣﹑阿明行去最前，見到有個癲佬捉住咗阿張，仲揸住把刀脅持住佢…
而「鐵拳」就同呢個癲佬傾緊，不過講緊日文，我唔知佢哋噏乜。
「同上次一樣，係因為件邪器，即係個男人冇揸刀嗰隻手揸住嗰隻銅雞！」
「光管陳」原來都喺度，係佢講俾我哋知。
「咁而家可以點呀？」
「等張Sir佢試吓談判先，順便等警察嚟，不過呢度個派出所都幾遠吓，我驚趕唔切。」
佢個樣都好緊張，好似準備出手咁，但係我哋同個癲佬有一定距離，唔係話一步就可以衝到埋去。
阿明個樣都好緊張，欣欣仲驚到好似想喊咁。
就連…個淫蟲校長都顯得非常擔心咁。
「!@$%^！!@^@$$@#^！」個癲佬突然發咗癲咁唔知噏乜。
「光管陳」差D就衝上前郁手，但係「鐵拳」阻住咗，佢仲叫我哋退後。
我哋就係咁，慢慢退後。
我見距離咁遠，根本冇可能趕得切衝前去，我唯有手執住身上唯一嘅一件硬物，校章，準備掟埋去…
即使只係阻一阻佢落刀都好丫嘛，所以我瞄準定佢隻手…同佢個頭，究竟我掟佢邊度好呢？
「!@^$#%@^！!@^!$!@^！」條癲佬好似越嚟越唔正常咁…
佢笑得越嚟越…我都唔識點形容佢先啱，有種…好怪異嘅感覺…
佢好似…奸！？惡！？定係純粹開心笑呢！？好詭異呀…
佢…佢個樣…好似變緊咁…
仲好似…越嚟越似隻雞，俾著係口講，好似係恥笑緊人咁，但係當親身感受一個人喺自己面前變成咁…
根本唔係超人片嗰隻，嗰種可怕，真係令人不寒而慄，我隨手就噤住欣欣對眼，唔想嚇親佢。
「欣欣，唔好望喇！個癲佬係隻妖怪嚟。」
但係欣欣竟然推開我隻手。
「輝呀，俾著係早幾日，我就會驚。其實…喺過嚟之前，因為你…我已經接受過訓練架喇，我唔驚架。」
欣欣竟然咁講，我當堂呆咗一陣。
「哇丫！!@#@%！」D旁觀嘅市民突然大嗌，仲走都走唔切咁。
我即刻望返去個癲佬度，原來佢已經完完全全變成一隻妖怪，一隻雞唔似雞，人唔似人，面口都腫晒咁嘅怪物。
我記得唔知邊個講過，一般嚟講，妖怪越醜樣，能力就會越勁架喎。
「哼！個癲佬變成妖怪仲好！我更加易攪掂佢！」
「光管陳」既然咁講，我即刻放心返D。但係…
「哇！」隻妖怪突然手起刀落…
我即刻掟個校章埋去。點知…
「鐵拳」佢衝得快D，佢阻咗我掟嗰吓，仲趴低咗，阻埋「光管陳」衝前去添…
好在…唔應該講係好在，因為…校長…校長佢衝咗前去頂咗呢刀…
「嚓~！」把刀完全劈咗入去校長背脊，全場嘅人都嚇呆咗，欣欣仲喊埋出嚟。
「光管陳」發火，踩咗「鐵拳」背脊一腳，一吓就跳飛咗埋去，用手指當劍…
「直刺式！」手指向前插入「雞妖」右手手臂…
「拖劍式！」手指向下拉扯，令「雞妖」失去平衡…
「推刃式！」手臂當劍刃，將「雞妖」推開…
「旋風式！」一個轉身劈落「雞妖」個頭度，將佢打埋一邊…
「玉麟金劍！擎天式！」上次把金劍再次喺地下彈出嚟…
「插~！」
嘩！呢吓真係，睇幾多次都覺得好痛呀！
………
「雞妖」之後慢慢變返做人，就咁訓咗喺地下度，側邊隻銅雞一陣間後就變成灰塵，俾風吹散晒。
呢度而家得返我哋班人，其他市民一早就俾隻妖怪嚇走晒…
過咗冇耐，警察到咗場，處理返個癲佬，「鐵拳」同阿張就跟咗佢哋返去協助調查。
校長傷得咁重，王Sir同「黃仔」就陪咗佢去醫院。
「估唔到校長真係咁錫張仔(即係阿張)，當正佢係自己仔一樣，而家仲幫佢擋刀。」「光管陳」咁講。
「我哋仲以為佢係孌童癖添。」
「原來你哋唔知架？校長佢講過，張仔個樣好似佢幾十年前死咗嘅仔仔，所以佢一直都好錫張仔。」
估唔到…原來條死淫蟲…係咁…我諗我哋都唔應該再咁叫佢喇，佢真係好好呀。
………
正當我哋想走之際…
「呢個校章係邊個架！？」「光管陳」佢突然執起我之前掟出去嘅校章咁講。
我舉手表示係我嘅。
之後佢伸手俾我睇吓個校章…
個校章爛咗…仲有張黑色符喺裡面…係另一道召鬼符呀！
我當場呆咗…
「哇丫~！」遠處仲突然有人大嗌。
我定過神嚟，望一望大家，發現原來「大袋」同欣家姐都唔喺我哋身邊…
(待續)
下集預告︰
咩話！？又俾佢咬咗啖？