米米蓮妖怪作品 -《旅行‧如此‧難以忘‧記 》(百集長篇): 第087集 ~ 欣︰浪漫過後，我哋想走喇，但係…
第087集 ~ 欣︰浪漫過後，我哋想走喇，但係…
快D返上嚟啦，我驚趕唔切啊！
咦，唔小心劇透添…
上次講到，個「草帽呼子」佢幾衰啊！
佢吸到成個「香港太空館」咁，似乎係想炸死晒我哋喎！
好在，有呢個人，佢係…
「東歪」司徒不正！
我點解識佢！？佢哋講，我咪知囉。
佢揸住把發出紫光嘅妖刀，而把妖刀嘅力量好大嫁…
竟然連成個「香港太空館」都吸收咗…
佢總算救咗我哋，我開頭仲以為佢係好人，點知…
(呼~~~ 嚓~！)
「哇~！ 丫~！」
(趴~！)
佢突然快到好似風咁，一刀就將「老人家」佢斬到飛起噴晒血咁…
「哇丫！五雷轟頂！」全場淨係得「肥高人」佢有反應，仲要係好激烈嘅反應。
「嘭」一聲巨響，將成個地下打咗個大窿出嚟…
俾著係普通人肯定死無全屍啦，但係…
偏偏個「歪人」就係一個比「肥高人」能力更高嘅高人，佢霎眼間就唔見咗人…
「雷神，絕殺，黑龍波！」
(龐龐龐龐龐龐龐龐龐~！)
「肥高人」唔知係咪癲咗，無端端射爆埋個大台嚟發洩…
至於「歪人」，就再冇出現過喇…
不過…我見到佢斬落去「老人家」度嗰陣嘅樣，係有D…
有D唔知點形容好，好似有D怨恨，但係又…
女性嘅直覺話我聽係有D嘢嘅，但係…都係算喇，唔識解釋。
至於之後發生嘅一連串傷心嘅事…
我諗輝輝佢都講得好清楚啦，我都唔想重複太多…
總知我就喊到收唔到聲啦。
………
「月娥」前輩佢帶住「老人家」一齊隨住光柱慢慢飄咗上天上…
而我就覺得佢哋嘅愛情實在太浪漫喇…
一對本應相愛嘅小情人，因為誤會，攪到天各一方…
但係到咗幾十年之後嘅今日，佢哋終於重逢，仲有情人終成眷屬…
我真係好戥佢哋高興啊！
攪到我都…
忍唔住俟咗埋輝輝心口度，我哋就係咁，睇住佢哋慢慢飛上天…
…
「咪住！」「老人家」突然停咗喺天上，嗌返落嚟。
「師父！有月娥師母陪你，我放心嫁喇，你唔使掛住我喇，你去啦！」
我突然覺得「肥高人」佢原來把口都幾得丫！咁快改到口叫「師母」。
「衰仔，講嘢又幾啱聽噃！不過，我想提你哋三樣嘢，第一，肥仔你聽住，「不正」同你淨係學咗我前半生嘅所學，「雨，電，風，雷」，我後半生自己鑽研出嚟嘅嘢，冇教過你哋，亦未必啱你練，你去我故居，搵一本寫住「星河傳說」嘅書，將佢攞出嚟，教導一D你認為最有潛質嘅後輩啦，明唔明？」
「肥仔明白！」
「第二，靈犬護身嘅嗰個小朋友，我上次已經幫你開咗「慧眼」，其實頭先你根本有能力處理咗個「菠蘿包」，至於第時你可以點運用呢隻「慧眼」，我就教你唔到喇，你自己參透啦！」
我望一望輝輝，輝輝佢搲晒頭，再摸摸個額頭…
好似諗緊「老人家」佢講嘅嘢，但係又好似有D唔明咁。
「第三，邪靈跟身嘅嗰個小朋友，你唔好再俾任何妖魔鬼怪有機會輸送到邪力俾你，唔係嘅話，你就會變成惡魔，後果不堪設想。」
「我呀！？」「袋袋」反問。
「我講嘅就係咁多，各位小朋友，再見喇！我最錫嘅徒弟仔，肥仔，再見喇！」
「再見喇！」大家。
………
「老人家」佢講完呢番說話之後，就同「月娥」前輩佢飛咗入去D雲度…
天空個裂縫亦都喺之後閂返埋咗…
「哈哈哈，你哋死喇，邊個唔聽我話，我就即刻變大惡魔，咬死佢！」難得「袋袋」佢竟然仲咁樂天。
「我唔會嫁！」家姐而家真係成個小鳥依人咁。
「成熟D啦，楊鉅祥同學。」阿狗佢講完呢句就行咗埋去安慰「肥高人」。
「你試吓變丫嗱，睇我會唔會一把三尖兩刃槍插爆你個口，再叫「居居」咬甩你個頭丫嗱。」輝輝好英啊！
「唔好玩喇，係時候離開呢度喇！」「肥高人」似乎仲未完全恢復心情。
我哋就係咁，四男二女，帶住「肥高人」一班徒弟，仲有「龍也」…
一齊返上去森林度搵出口。
………
「喂，我哋唔搵阿明呀？」
「妖，條友自己走開喳嘛，仲好講，頭先我哋打生打死，佢就唔知去Q咗邊。」
「唔好咁粗魯啦！」
「我哋可以先去出口睇睇先，之後再搵返佢。」
…
「係呢，阿狗，頭先你點樣打敗隻「迷霧天魔」嫁？你又做咩唔俾阿妮出嚟行吓啊？」
「阿妮！？哦~我諗你哋有D誤會喇，我身上隻「靈狐」唔係阿妮嚟嫁。」
「唔係！？咁隻嘢邊度嚟嫁？」
「記唔記得啊？我痛到想死，反晒白眼嗰吓呢。其實係而家喺我身上嘅呢隻「男靈狐」攪嫁，佢原來鍾意咗阿妮身上隻「小狐」好耐，但係佢又唔敢表白喎，咁我咪同佢講數囉，大家傾好咗，佢上我身，我就一直對阿妮佢好…」
「嘩，呢招會唔會有D…賤格啊？」
「各取所需啫。」
「喂，咁隻「男靈狐」好勁架？點攪掂隻「迷霧天魔」啫？」
「「九尾妖狐」，日本土地神靈，有不死之身，仲識噴火，係日本三大妖怪之一，你話勁唔勁丫？」
「嘩！」
「至於隻「迷霧天魔」唔係勁，但係煩，因為佢可以穿梭迷霧之中，所以範圍越大，佢就越勁，所以我唔俾佢增大迷霧範圍，亦唔想俾佢走到佬，咪用土牆困住佢嚟打囉，點知我火都未噴，佢就反咗肚，唔知係咪俾我嚇死咗呢？」
我其實…一直都…聞到…
「嘩，頂你個肺！我頭先鼻塞聞唔到，而家通返至聞到，俾你咁焗發，乜嘢牛鬼蛇神都死啦，好很臭啊！」
「係你條友一直係咁講嘢啫，我哋一早噤住晒個鼻啦！」
輝輝咁衰喎，唔提吓人哋。
「妖！你條友狐仙上身，唔好行近我哋啊！」
「過多一陣，佢D妖氣散D就會冇咁臭架喇，大家忍多陣啦。哇，真係好臭。」
「肥高人」似乎俾D臭味整到精神返D喇。
之後我哋繼續向出口方向行去…
………
「咦，真係同「草帽呼子」講嘅一樣，個出口俾「千年石妖」封咗添。」
「大師，咁而家我哋點啊？」
「Mmm…咁我哋先去搵你哋個朋友先。」
………
行到嚟「桂家村」門口，大師就吩咐佢D徒弟喺門口度休息吓先…
佢自己就入咗去村裡面睇…
我哋幾個當然跟埋去睇吓啦…
…
「咦，鳳初，你哋喺度做咩啊？地下呢隻係…「河童」！？」
「佢係「邪體河童」，啱啱俾我收拾咗。但係，我學生阿明佢俾隻「河童」攪到跌咗落去呢個好深嘅井裡面，而家唔知點先可以整佢返上嚟。」
「睇過。」
「佢一直都有出聲嫁，不過我唔知佢講乜。」阿明公公出埋口。
…
我第一次見到小倩，所以行埋去傾咗兩句…
「HELLO，你就係阿明女朋友嗱？我係佢朋友阿輝嘅女朋友，我叫阿欣啊，你好。」
「你好，頭先阿明佢喺下面話有個朋友帶咗佢去咗唔知邊度…」
我心諗，井底下面有個朋友！？小倩係咪傻咗呢？
…
「喂，喂，喂，你哋仲唔快D走？唯一嘅出口喺五分鐘之後閂埋喇！」
「寶寶！？阿明佢跌咗落井啊！你有冇方法救佢啊？」
輝輝佢同一個跑緊返嚟嘅小朋友講嘢，個小朋友似乎係叫「寶寶」。
「井！？呢個！？呢個係無底之井啊，成條村D人都當佢係垃圾筒，我哋掉咗垃圾落去咁多年都未見過個底嫁！」
「咁大鑊！？」
「仲有四分三十秒。」
「你哋走先，我喺度諗辦法。」陳老師咁講。
「好，我去帶D徒弟走先。」「肥高人」咁講。
…
「你哋做乜唔走啊？」
「兄弟嚟家嘛！有福同享，有難同當！」
雖然D男仔咁講，但係我真係好心急啊，快D返上嚟啦，阿明，拜託你丫！
…
「天，馬，行，空！」
係阿明啊！佢喺個井度飛返出嚟啊！
(待續)
下集預告︰
嘩，隻「千年石妖」寫架？咁核突嘅？