米米蓮妖怪作品 -《旅行‧如此‧難以忘‧記 》(百集長篇): 第094集 ~ 明︰插隊先，等我入波啦！
第094集 ~ 明︰插隊先，等我入波啦！
(幾時追返我條時間線啊？！)
「係喇！係喇！而家咪追囉！」
………
阿公阿婆終於真正離開咗我，我好開心可以睇住佢哋笑住咁離開…
(又話追？！)
「咁我最多都係跑啫，唔係跳丫嘛，點可以一跳就跳到去球場嗰邊啫！最多咪講快D囉！」
(咁你快D啦！)
OK，講返喺地府呢邊先…
阿公阿婆俾咗封利是我哋就走咗，喺呢個時候…
當然係第一時間拆利是啦！
阿婆嘅就唔睇喇，上集都有講，冥想銀行D錢嚟嘅！不過，阿公…
頭先佢好似鬼鬼鼠鼠咁入咗張紙仔入去利是封，唔會係報紙呱…
如果係，我肯定…
唉，都係算啦，睇吓佢俾乜嘢我先…
「吓！？聖經箴言！？敬畏耶和華是知識的開端！？」
我無奈到唔識講嘢，但係…
咦，後面有堆字噃！
有一大段嘢，因為太多字，所以我唔全部講出嚟喇…
大概係話阿公佢自己學道術學咗大半世人，終於可以唔用道具就可以對付鬼怪…
佢自創咗一套神功，翻雲﹑覆雨﹑飛天﹑遁地﹑爆烈五式…
希望我可以參透其中奧秘，用佢哋嚟對付妖魔鬼怪，但係…
我頂！唔夠位就搵張大D嘅紙啦，臨尾D嘢寫到一舊雲咁，仲化化地添，點睇啊？
唉，阿公真係…
咁我即係唔使學啦！
「翻雲之絕技，聚氣如雲海，蕩漾於懷中，以自身之靈，喚自身之氣，使力勁發揮。」「光管陳」讀出嚟。
我頂！扮乜嘢啫，文筆又差噃，係喇喎，得嗰三十隻字就可以練成神功咩！？
不過，「光管陳」竟然睇得到，唔通做老師嘅真係對眼利D嘅？
估唔到佢睇中文都掂噃。
「陳Sir，你係咪都睇到晒啊？可唔可以幫我整理返啊？咁撩草，我睇唔到啊。」
「見係大波兄留俾你個衰仔嘅，就好好教吓你啦。」
「覆雨之絕技，聚氣如水流，蕩漾於雙掌，以自身之靈，喚自身之氣，使力勁發揮。」
「飛天之絕技，聚氣如流雲，蕩漾於腦海，以自身之靈，喚自身之氣，使力勁發揮。」
「遁地之絕技，聚氣如水泥，蕩漾於雙足，以自身之靈，喚自身之氣，使力勁發揮。」
「爆烈之絕技，聚氣如流火，蕩漾於雙拳，以自身之靈，喚自身之氣，使力勁發揮。」
好心啦！抄都抄得好D丫，改幾隻字就算，揸流攤，冇心機就唔好學人自創神功啦！
「係咁多，大波兄D招式真係…佢自己用都唔錯嘅，但係…佢咁樣就叫人學，我…真係不敢恭維。」
唉，連「光管陳」都咁講，都係返去人間先算把啦…
………
返到去之後，大家緊張咗一輪，因為乜事？阿輝同阿欣都講得好清楚啦。
我哋之後齊人就出發去咗「大阪市長居陸上足球競技場」，沿途我都真係傻吓傻吓咁諗吓阿公留低嘅廢話。
………
入到球場，有把聲叫我哋去更衣室，我咪跟大隊去囉…
入到更衣室，去見到返晒成班死仔，佢哋成隊「疾風無敵銀堡壘」咁，想點啊？
不過，佢哋都平安無事就好喇，連王Sir同鐵拳都喺度…
係唔見咗「黃仔」，話佢同呢件事冇關都冇人信啦。
「鬼王話要我哋同佢隊波踢一場喎。」
陪「鬼王」踢波？贏輸都死啦！
之後，阿輝走咗去窗口睇落球場度…
我都跟埋去睇吓，點知原來一堆鬼怪已經喺場上面等緊我哋落去開波…
其中一隻仲要係「酒吞童子」，但係…
佢哋得十隻人咋喎，扮晒嘢想讓賽啊？定係有隻嘢係隱形嘅呢？
「你哋好，我係負責帶你哋出去…嘻嘻…死嫁！」
一隻小妖怪入咗嚟，仲鬼死咁樣衰。
但係，我哋都冇得選擇啦，肉隨砧板上，咪唯有跟佢出場囉…
沿途，我行咗去後面問咗阿張一D事…
「校長佢點啊？」
「冇咩事，不過要留院觀察囉，可能你畢業佢都未出得院！」
「咁就好喇！」
(…)
「丫，我意思係佢冇事就好喇！」
之後，我行返前去最前面…
「一陣，你哋唔輸得嫁，輸咗，鬼王就會食咗你哋，嘻嘻嘻。」隻樣衰鬼咁講。
「咁贏咗呢？」
「一樣要死，你哋贏咗佢，佢發脾氣就會食咗你哋，嘻嘻嘻。」
佢真係乞人憎到呢…
呢件事我哋冇俾D女仔知，出到球場，我終於忍唔住手喇…
聽住「餓呢餓呢餓呢餓呢」，我就…
「九字護身法，收！」
「天馬行空！」
將佢掛咗喺天幕個頂度，串柒柒丫嗱！
「救命啊！救命啊！」
掛好咗佢，我就跟返埋大家度，大家準備出場…
「踢法照舊，穩守突擊，由Kenny策動攻勢，阿明你負責釘死人哋前鋒…」
佢都真係戇過阿狗，當我傻架？
「王Sir，唔釘得唔得啊？你睇吓隻妖怪個樣，好似想食人咁款，你叫我跟住佢？」
好在，佢都識做…
「咁算啦！大家自由發揮，唔死就好喇，出場啦！」
不過佢把死人烏鴉口，真係乞人憎，真係想掛埋佢喺天幕個頂度…
「王Sir，D鬼怪應該唔介意我哋用邊十一人出場嘅，不如，我都出埋場丫！」
好啊！好啊！
「陳Sir，唔使喇，你幫我哋保護D女仔丫！」
我頂！死人阿輝扮咩蟹啊？！
唉 ~ 我唯有無奈地出咗場，行返埋後防線…
………
(咇~~~！)
一開波，對面隻「傻鴨」就一腳射咗個波上天…
見個波俾佢射到連一點都見唔到，我咪四圍望吓囉…
唔通咁戇膠膠住自己條頸向上望咩？我望到原來除咗我哋四個主角…
其他同學都俾「酒吞童子」D妖氣壓抑到郁唔到，好似石化咗咁…
我見仲有時間咪繼續參透吓阿公嘅廢話囉！
「哇丫！波啊！天上地下唯我獨尊射球！」「傻鴨」又再射咗個波上天。
咦，我好似參透到D嘢喇喎…
「喂，個波跌返落嚟喇！」欣家姐嗌到全場都聽到。
「哇丫！波啊！天上地下唯我獨…」
………
突然，全場靜晒，因為「酒吞童子」佢一啖食咗隻「傻鴨」…
冇人，亦都冇妖怪敢出聲…
「浪費咗我足足十幾分鐘，唔食咗你真係難消我心頭之恨。叫第二個出場！」
「冇球員離場，唔可以俾第二個出場！」
「你邊位啊？喺我地頭博我嘴，你係咪唔想活啊？」
嘩，呢個球證都算沙噗喇，「鬼王」都串…
「世界最佳光頭球證，哥，連，拿！」
佢講到好似光頭就大晒咁。
大家都呆咗咁望住咗佢哋，但係…
「傻佬明，波啊！」
阿輝突然叫我，我先見到個波就喺我腳邊，我…
呆咗唔夠半秒，即刻就用我嘅必殺技傳個波俾阿輝…
「七旋斬！」
(唔好扮碧咸呀唔該！)
個波靚到丫！傳到正一正俾走咗去底線嘅阿輝…
「阿狗！接波！」
阿輝即刻就彈個波去娥眉月位…
「喪狗」亦都使出佢嘅必殺技…
「百米九秒九！」
佢真係跑得超快，而家仲變埋妖狐去射呢腳波添…
「九尾狐凌空窩利抽射！」
嘩，個波好勁啊！睇嚟要入喇！
(咇~~~！)
YEAH，入咗喇！
「入球冇效！」哥連拿講。
「冇效！？點解啊？」阿輝問。
「越位。」
「越位？！」
「你識唔識咩叫越位啊？」阿輝問。
「唔識，唔識，我唔識，我真係唔識嫁，你解我聽丫。」阿欣衝咗出嚟講。
場面一片混亂…
「小姐，唔該你返出去，而家罰球。」
對面個「龍門」其實冇出現過，話時話，點解頭先我唔直接射入去呢？
「酒吞童子」果然係小朋友，佢因為頭先俾球證串，所以仲發緊脾氣;1
好唔忿氣咁訓喺地下度扭來扭去，我係佢老母，就一刀斬死佢個死人仔。
罰球由佢哋後衛隻「豬蘿」開出…
「豬蘿」果然豬蘿，竟然開咗個波俾未返後場嘅我…
睇嘢啦！阿公嘅絕技，加上我嘅創意…
「翻雲覆雨飛天遁地爆烈射球！」
嘩，我個波勁到我自己都唔信，成個火球咁飛埋去，睇嚟入緊喇！
(嘭~！)
「小你媽媽個些丫！牆嚟嘅？」
原來，佢哋「龍門」係隻「石牆妖怪」，佢突然喺地下衝上嚟擋住咗我個波…
個波仲…
飛返咗去我哋嗰邊個龍門度啊…
「金，翅，仆，佳，鳥！」
(待續)
下集預告︰
「黃仔」！？佢唔係「北轍」咩？做乜佢…
註腳︰
(1) 疾風無敵銀堡壘 — 日本熱血系嘅運動動畫，不過成隊都係機械人嚟。
(2) 沙噗 — 即係有膽識。
(3) 七旋斬 — 九百幾套動漫用過，唔知邊套係第一套，意思係斜斜地斬埋去。
(4) 碧咸 — 本來應該唔使介紹，但係…即係贝克汉姆，David Beckham，以前D靚仔球星囉。
(5)「龍門」 — 呢度係講緊守門員。
(6) 豬蘿 — 六七十年代D麻甩佬好鐘意用嚟形容人地蠢。