米米蓮妖怪作品 -《旅行‧如此‧難以忘‧記 》(百集長篇): 第097集 ~ 輝︰「鬼王」！？「大袋」！？我已經唔識分喇。
第097集 ~ 輝︰「鬼王」！？「大袋」！？我已經唔識分喇。
當然關「居居」事啦！佢仲好重要添啊，一陣你就知！
上次我講到連「阿叔」都出埋嚟，佢就係咁同「鬼王」理論。
「牛頭馬面」就唔知幾時轉咗做急救員，仲要一身女護士裝，真係睇到我想嘔…
佢哋嚟抬走咗受傷嘅「大爆咀」，希望唔係直接去地府啦。至於我哋…
阿狗突然似乎諗到D嘢，叫咗我哋埋去，就將佢嘅「奸計」獻出嚟…
而我都唔執輸，將我嘅「詭計」都獻埋出嚟，希望可以有機會反勝啦。
我哋討論嗰陣，仲突然有一個人行咗埋嚟我哋度，係…
美奈子！？原來佢同達叔都過咗嚟幫手啊！
點解好似講到佢哋係兩個人咁嘅，佢哋咪即係得一個。
之後，我哋都將我哋嘅計仔講咗俾佢聽。
「我好興奮啊，好耐冇踢過波喇，你哋想我用美奈子定係用達叔個身去踢啊？」
達叔佢一邊講，一邊喺度不停咁轉樣，其實佢知唔知自己好恐怖嫁啫？
「有乜分別啊？」
「一個美觀D，一個實用D囉！」
「咁美觀嗰個丫！」又係「大袋」條死仔亂噏。
「梗係實用啦！」我哋其他三個人都咁講。
「好！」
達叔最後用咗美奈子個款，佢話美奈子係實用嗰個…
因為佢踢過小學學界女子足球隊喎…
我哋無奈到冇再要求佢變身，但係換來「大袋」一句…
「都話美觀好D嫁啦！」
我哋當然冇理佢嘅廢噏啦，反而…
我奇怪點解每當「達叔」變身做「美奈子」都會有D火光…
而「美奈子」變身做「達叔」嗰陣係唔會有呢。
呢個時候，講乜都冇用，贏咗場波先，我去開波…
「朱嘉輝，你好有型，好靚仔啊！」場外有人大嗌。
哇，嚇死我啊，仲攪到我傳咗個波俾「鬼王」添，我以為係「肥妹」佢嗌啊。
好在，阿狗嘅「奸計」第一步就係要傳個波俾「鬼王」啫，我亦順水推舟…
「你恃住對腳利害喳嘛，夠膽唔用腳入波丫！」
「好！」
估到佢第一步會用頭嫁喇，係估唔到佢會咁恐怖，抆個死人頭出嚟啫…
「鬼王硬頂！」
(咇 ~~~~~！)「二比零！」
第一步總算完成，好！第二步…
(咇 ~~~~~！)開波。
「朱嘉輝，你好樣衰，好乞人憎啊！」場外又有人大嗌。
肯定係欣家姐，得佢會咁講嫁啫，點知…
我另轉頭一望，原來係欣欣…
梗係佢見我俾咗個波人，覺得我廢啦，真係忍辱負重啊，唉…
不過，我都係俾咗個波「鬼王」。
「吓！？咁冇體育精神呀？不過，再唔該你噃！」
「車，你恃住個頭利害喳嘛，夠膽唔用頭入波丫！」
我以為佢會用其他部位啦，萬萬估唔到佢會用呢個「配件」…
「鬼王硬FING！」
(咇 ~~~~~！)「三比零！」
第二步完成，阿狗「奸計」第三步要出喇，一定要成功啊！
「朱嘉輝，人哋好擔心你啊，衰人！」
如果有第四步，我肯定唔會再做開波嗰個。
(咇 ~~~~~！) 再開波，我再傳俾「鬼王」…
「車，你恃住條嘢利害喳嘛，夠膽用手入波丫！」
「好！」
由佢講個「好」字開始，到佢真係用手去入波，好似過咗幾個世紀咁耐…
但係，我哋就係要等呢一刻…
(咇 ~~~~~！) 「HAND BALL！兩黃一紅！立即離開球場！」
「YEAH~！」「YEAH~！」「YEAH~！」
終於等到呢一刻，嗰種開心法，就好似…
買咗幾十年同一條嘅六合彩，終於中咗頭獎一樣。
阿狗同我哋都知道，「鬼王」唔走，我哋根本贏唔到…
見到佢唯一會驚嘅就係「哥連拿」，所以阿狗佢就諗咗呢條計仔先去逼走佢…
雖然而家輸緊三比零，但係總算仲有機會追丫…
「係我哋反勝嘅時候喇！」
(咇~~~~~！)
我一開波就傳俾阿明，自己就直走前去…
阿明﹑阿狗同「大袋」幾個假身﹑彈牆同互傳就入到禁區喇！
而我就一早準備好我嘅「詭計」…
而家，個波喺我腳度喇！
雖然對方「龍門」係牆，但係佢有生命，佢一定會受引誘…
我哋四個人都喺晒佢左邊，佢一定會稍稍偏向我哋嘅…
到時，佢右邊手就會有條罅…
「冇錯，就係咁喇！居居，靠你喇！」
「撞「居居」射球！」
(咇~~~~~！)「三比一。」
「YEAH~！」
我哋嘅「奸計」同「詭計」都總算成功喇！
「唔算啊，唔算啊，呢隻狗係第十二個人，點可以計入球啊？」
「石牆妖怪」唔忿氣，係咁問「哥連拿」…
「第一，你都識講佢係狗啦，點算第十二個人啊…」「哥連拿」回答。
「第二，所有其他在場出現嘅事物均視為死物，入球有效！」
「邊個講嫁？」「石牆妖怪」再問。
「我講嘅，我就係呢度嘅規則。咇~~~~~！快D開波。」
「換人！」場外突然傳嚟一把聲，原來係對手換人。
「換走豬蘿！換入狂風老妖！」
「咩話？狂風老妖！？」
我哋聽佢個名都已經明白，擺明就係換個「吹風機」出嚟，等我哋向唔到前…
如果係咁，我哋點射埋去都會俾佢吹走個波，究竟我哋可以點呢？
佢哋一開波「紅髮青椒」就想搶攻，不過佢真係超論盡…
一仆一碌咁，「大袋」好輕鬆就攞咗佢個波，不過…
「呼嗚 ~~~ 呼嗚 ~~~」
我哋都未攻咋，佢個「吹風機」就開著喇！
我哋根本上唔到前，而佢哋仲想過嚟搶返個波添…
「大袋！上唔到前唔緊要，唔好俾D風吹入「龍」就好喇！」
「等我哋嚟保護你！」
「靈狐上身！」阿狗。
「九字護身法！」我。
「關雲牆！」阿明。
「阿明，乜你識請關二哥上身咩？」阿狗問。
「我用我阿公嘅翻雲絕技，整咗道「雲牆」出嚟喳嘛！」
(咇~~~~~！)「阻人前進！」「哥連拿」吹雞。
「喂，阿哥…連拿兄，佢哋用風阻我哋就唔計，我哋咁，就犯規？」大袋問。
「為你哋好咋，呢度全場都係妖魔鬼怪，你變身嚟阻都好D，但係護身咒嗰D最好唔好用，會引起公憤，到時吹乜雞都冇用喇！」
估唔到呢個光頭佬咁好人，所以我都忍唔住問佢一句︰—
「你前世欠咗我哋嫁？點解咁保我哋啊？」
「你睇到我個光頭嘛？我係唐三藏，點會幫妖怪丫！」
我真係唔知佢講真定講笑，但係就多謝佢喺啦。
「紅髮青椒」再開波…
(咇 ~~~~~！)「半場完，休息！」
「玩我呀？光頭佬！」
「紅髮青椒」竟然夠膽挑戰連「鬼王」都唔敢得罪嘅球證。
「你，唔，係，覺，得，我，玩，你，唔，起，丫，嘛，青椒？」
嘩，串到丫！
半場完，我哋返咗埋去…
「輝輝，抹汗丫！」
欣欣真係好，不過我始終擔心場波，所以都冇理佢太多…
一離場，我就同阿狗﹑阿明﹑大袋﹑「光管陳」同「達叔」傾…
其實仲有王Sir，不過佢而家講乜都只會係廢話…
「一陣不如試吓吞咗個波向前衝丫！」阿明問。
「你吞呀？」「大袋」講。
「阿明應該係講緊搵「居居」幫口吞。」我幫阿明口。
「可以一試，不過仲有冇其他方法呢？」阿狗問。
「你哋唔好亂用我教你哋嘅道術，廢事引起公憤。」光管陳講。
「龍門你哋可以放心，我會守好，不過你哋要諗到入波嘅方法。」達叔講。
「硬衝啦！」大袋講。
我見到「大袋」好似有D唔妥，所以細細聲問問「光管陳」同「達叔」…
「陳Sir，達叔，大袋係咪有D唔妥啊？」
「明顯啦。佢妖氣越嚟越勁，我都有D擔心。」光管陳講。
「而家，暫時冇辦法嫁喇，就順水推舟，用佢嘅妖邪之力嚟入多球波先啦。」
「達叔」講完，「哥連拿」亦都吹雞，下半場要開波喇！
(咇~~~~~！)
係我哋要反勝嘅時候喇！
(讓野火~ 燃亮我吧~)
狂風老妖，一開波就狂吹，力量比頭先仲要大…
(我滿有信心~)
但係，大袋一開始就攞咗個波，仲硬衝添，
(沒苦惱亦無懼怕~)
我哋三個就喺佢身邊為佢護航…
(青春的火花~)
我哋就係咁，四個平排而上，雖然有D慢…
(讓我心~ 強烈跳吧~)
阿狗佢借D倚就整傷對手的球員，唔俾佢哋埋嚟…
(跳躍似火花~)
「居居」亦喺我側邊，將D衝過嚟嘅對手撞開…
(跨出每步懷自信~)
阿明就用佢嘅兇字訣，「夠膽過嚟，我就用爆烈神拳一拳打爆你哋個頭！」
(不空口講話~)
而「大袋」就冇出過一句聲，一直默默向前衝…
(呀~ 呀~ 呀~)
係對手俾我哋打開嘅叫聲…
「不開心~」紅髮青椒講。
「永不上他~」被打開嘅其他妖怪對手。
「快些快些踼波吧~」妖怪觀眾大嗌。
(呀~ 呀~ 呀~)
佢哋又被撞開…
(顯身手強敵被我~)
「都打垮~」我哋四個講。
(冷的風~ 問誰怕~)
我哋四個繼續逆風而行…
(將冬天趕回家~ 吓~)
誓要入到呢球波…
(趁青春望著前路去)
大家都望準龍門喇！
(一起~ 衝~ 衝~ 衝~ 衝吧~)
「嘭~」一聲，「大袋」個波就好似炮彈咁直射埋去…
(嘭~！)
(嘭~！)
(嘭~！)
個波只係直射「石牆怪」，我哋三個就企喺「大袋」側邊…
睇住每次都攞返個波，再每次都勁射埋去…
(嘭 ~ 嘭 ~ 嘭 ~ …)
射到「石牆怪」，「丫丫」咁聲，好痛好痛，而家…
就連全場所有人都靜晒，就好似都喺度可憐緊佢咁…
(嘭 ~ 嘭 ~ 嘭 ~ …)
「石牆怪」俾「大袋」射到爆晒血，最後…
佢終於頂唔住訓低咗，個波就入咗，但係…
「大袋」佢雙眼變得只有憤怒，瞳孔變得漆黑冇神，就好似著咗魔咁…
而家嘅佢，根本就係同「鬼王」一模一樣。
(待續)
下集預告︰
「倒，掛，金，勾！」
註腳︰
呢隻歌都係張衛健嘅《足球小將》