第100集 ~ 輝︰未救我哋,我哋又要各自自救喇!

我擔心「大袋」係真嘅,我見到佢射「石牆妖」個樣咁兇,好似殺人咁款…

真係唔係講笑嫁,佢根本就已經係一隻惡魔…

我驚嘅係,佢再唔能夠用自己意志控制自己身體…

成個軀殼都俾魔性控制住,做D自己唔想做嘅嘢…





對關心佢嘅人嚟講,真係晴天霹靂…

佢入咗追成三比二嘅嗰球波之後,轉個身就返去後場…

而我就一直跟住佢,望住佢後面…

睇住佢嘅一舉一動,但係…

更估唔到…更晴天霹靂嘅係…





佢一返到後場,就突然跌咗喺地下,仲好痛苦咁喺度大嗌…

「哇丫 ~ 丫 ~ 嗚哇 ~!」

我本來已經好擔心佢,而家仲要俾我見住佢痛苦嘅表情…

我真係…我真係忍唔住流下我嘅男兒淚…

「大袋!」





救護員好快就出咗嚟抬走咗佢…

而我哋就只能睇住佢受盡痛苦煎熬咁慢慢離開球場…

………

希望佢個衰仔冇事啦…

「無論點都好,我哋都唔可以輸呢場球賽嫁!呢個,係我哋唯一可以幫你做到嘅嘢,大袋,我哋一齊加油啦!」

之後,阿狗喺對手腳下搶咗個波,仲大腳踢前…

阿明用佢嘅「天馬行空」,總算趕得切喺底線撈返個波…

仲傳咗俾走到去「娥眉月」嘅我…





「窩利抽射!」

可惜,我嘅呢腳射門被擋出…

而阿明亦都好積極咁,迎住達叔嘅傳波,再嚟個「倒掛金勾」…

可惜,都係被擋出…

但係,感動人心嘅係,我哋D隊友都似乎聽到我嗰句「一齊加油」啊!

大家都同心協力,出番分力,佢哋築起咗一道人牆啊!

「好!推左走右!」





我過咗一個對手之後就大腳傳個波俾阿明,靠晒你喇,阿明!

「無敵射穿牆!」

阿明佢不負所託,大腳一抽,個波應聲掛網入波!

「好波!」

我哋總算追成平手。

之後落嚟,都係靠阿狗佢…

佢利用自己天生嘅速度同「妖狐」嘅力量…

一直就喺對手嘅底線發爛同扭扭控控,目的…





只係為咗守和呢九十分鐘…

因為呢場波除咗唔輸得,同時亦應該係唔贏得…

我哋只可以用拖字訣,希望時間可以帶嚟轉機啦。

………

我哋嘅拖字訣似乎進展得唔錯,眨吓眼就完埋加時嗰三十分鐘…

幸好,我哋仲未見到有任何危險…

(洪洪 ~! 隆隆 ~!)





一講曹操,曹操就到,天空突然風雲變色…

危機亦都出現,但係仲未見到轉機…

天上面仲傳嚟一把聲音…

「哈哈 ~!你哋以為拖時間有用咩?而家我唔玩波喇!我要你哋全部都要死!」

係「酒吞童子」嘅聲音,原來呢個「球場」本來就係一隻妖怪。

而家,佢似乎仲想開始吞食我哋,張開利齒,體內滲出酸液…

根本就係想消化我哋…

全場過萬隻妖魔鬼怪霎時間都亂晒大龍,場面一片混亂…

「大家快D返埋嚟先!」

大家都好似正常返晒咁,一齊跑返埋去「光管陳」度,。

欣欣擔心我,所以向我問好,我亦簡單回應咗佢,反而我見到佢家姐暈咗…

「你家姐…」

「家姐冇事,係傷心到暈咗。」

之後,欣欣仲話「大袋」俾「鬼王」捉咗…

估唔到…要嚟嘅始終要嚟…

我估得冇錯,我亦預見得到,喺好快嘅將來,我哋要同「大袋」佢大戰。

「諗咗點離開呢度先啦!」

阿狗佢咁講,我亦唔好意思只沈醉喺擔心「大袋」嗰度…

(嘭 ~!龐 ~!)

天上面又傳嚟兩聲巨響…

係兩隻巨型嘅手掌抓住咗「球場妖怪」個口…

究竟係嚟害我哋,定係嚟幫我哋嘅呢?

「妹妹!唔好意思啊,我遲咗,我嚟救你哋嫁!」

我隱約見到一個白髮老人喺天上面嘅「香港大球場」嗰邊嗌過嚟…

似係對住欣欣講嫁,唔通佢…就係「南龍」!?

「等咗你好耐喇!先生!快D嚟幫手啦!」欣欣向上大嗌返過去。

「南龍」一躍而下…

「你哋冇事丫嘛?」

「哼 ~!」「光管陳」似乎唔想同佢講嘢。

「冇事!咁我哋而家點啊,南龍前輩?」我回應。

(咔 ~ 咔 ~ 咔 ~)

天上面再傳嚟三吓聲音,係「香港大球場」擘開「球場妖怪」個口嘅聲音。

「南龍」前輩佢揚一揚手,似係叫我唔好出聲住,之後佢雙手敞開,運氣丹田…

「大家唔使驚!定D!我會攪掂嫁嫁嫁嫁嫁!」一把震動全場嘅聲音。

現場所有妖魔鬼怪都聽晒佢講,而家大家都冷靜返落嚟…

「唔好意思啊,妹妹,飛機延誤啊,本來最快都要聽日晏晝先嚟到…」「南龍」前輩向住欣欣講。

「唔緊要啦,你趕得切嚟救我哋就好喇!」

「咦,你姐姐又俾妖怪嚇暈咗啊?」

「唔係,係因為太傷心…」

「傷心!?唔係真係咁靈呀?佢之前求嘅籤文都話佢只有霧水情緣…」

「唔好講呢D住啦!世外高人,你個「香港大球場」頂唔頂得住嫁?」鐵拳問。

「香港大球場係屬於大家嫁,我只不過借佢嚟用用喳嘛。」

「你問過人哋借未嫁?」

我見到「南龍」前輩佢滴汗,冇作回應…

「仲有…香港大球場都唔夠人哋大,夠唔夠斤兩頂得住人哋個球場嫁?」

「呢個你可以大可放心,你知唔知香港大球場最犀利係咩丫?」

「新!?」

「唔係,係水泄不通!」

「人多!?人哋呢個球場唔多咩?」

「靈氣,妖氣係要積聚嘅,人氣越旺越勁,仲要流唔走就更勁,香港大球場最勁就係去唔到水,靈氣一樣,積聚咗喺球場泄唔走,所以佢好多靈氣,好勁嫁!」

我諗呢樣嘢,係香港人都會理解得到。

廢話一輪之後,突然…

全場射燈熄晒,球場淨返一片黑暗,但係奇怪嘅係…

竟然冇人發出聲音,可能因為大家都感覺到…

一陣陣無形嘅壓迫感壓緊埋嚟…

好明顯,呢種感覺,只有佢可以做到…

無錯,就係佢…

「酒吞童子!」

而家佢企喺球場裡面,望住我哋…

但係…佢好似唔同咗…佢再唔係之前嘅白痴醜樣,而係

更醜樣,而且更令人心寒恐懼…

喺黑暗之中望到佢,佢全身血紅色濕淋淋咁…

身上面成千上萬個好似喺度呼吸緊嘅氣孔,仲會發出綠光…

頭上仲多咗兩隻長角…

「球賽我就當你哋同我打和,而家係我第二樣鍾意嘅遊戲嘅開始喇,自由博擊,即係打交啊,哈哈哈…」

大家都只有抖住大氣咁聽佢講嘢。

「不過,要同我打,你哋似乎未夠資格,就嚟一嚟我嘅地方,同我D手下玩吓啦,哈哈哈哈哈哈哈 ~」

佢一笑完,就舉起發出紫紫黑黑烈炎嘅雙手,一吓向我哋劈過嚟!

「異域魔城!」

一舊紫黑色嘅火炎雲飛埋我哋度…

「黃龍金甲!」南龍。
「火鳳麟牆!」光管陳。
「火鳳城牆!」達叔。
「土靈壁壘!」阿狗。
「龜殼護身!」洋腸。
「翻雲覆雨!」阿明。
「貓咪城堡!」荷瑪。
「九字護身法!」我淨係識呢個咋。
「汪~!汪~!」居居變成白獅擋咗我哋前面…

我哋雖然都分別做咗護身法,但係都係中咗「酒吞童子」嘅「異域魔城」…

因為呢招並唔係一招傷害技能,而係一招空間轉移術…

而家,我身邊D環境變晒,亦只係剩返…

剩返「光管陳」﹑「達叔」同「居居」喺我身邊…

我哋而家身處喺一個樓底好高嘅石殿裡面,遠處嘅前方好似有座神明石像喺度…

左右兩旁都係人型石像,佢哋後面係幾條大石柱…

再望出去見到天色,而家天色昏暗…

隱約見到左邊遠處又有一個石殿,右邊遠處亦有另一個石殿…

我估,我哋最少俾「酒吞童子」分咗做三堆人…

「唔使望喇,呢度係個丫字型石殿,由四個石殿組成,三個小石殿可以通向中間嘅大石殿,而我,就係你哋呢度嘅對手。」一把唔知喺邊度聽過嘅聲音喺黑暗之中傳出嚟。

(待續)

下集預告︰

砂石風暴!

註腳︰

(1) 發爛 — 足球術語,意思有少少似渾身是勁,無人能阻咁。

(2) 扭扭控控 — 扭波同控波不斷重覆。

(3) 拖字訣 — 拖延時間。