米米蓮妖怪作品 -《旅行‧如此‧難以忘‧記 》(百集長篇): 第112集 ~ 輝︰對話？仲有機會咩？
第112集 ~ 輝︰對話？仲有機會咩？
欣欣嗰邊安全打完喇喎，睇嚟我呢邊都要快D喇…
(你喺碌石柱返落嚟先講啦)
係喎，上次為咗避開「鳳凰火炎」燒熔嘅「大銅武神」…
騎住「居居」嘅我，同「居居」一齊擒咗上碌石柱度睇戲。
「佢一變返做八婆肉身，中途就會出現。」
「英雄」竟然話「達叔」身上嘅「美奈子」係八婆，佢真係…
「邊個話我八婆？」「美奈子」發嬲發到連廣東話都突然講到。
呢一刻，我哋唯有同心協力，一齊嫁禍俾「西斜」余二十。
好在，奸計成功咗…
得半個頭嘅「美奈子」一巴打埋去「余二十」度…
「光管陳」就襯機飛埋去「達叔」同「美奈子」個頭條罅度…
「鳳你老媽個凰，展你阿爸個翅！火很你個炎，重九你個現！」
睇嚟「九曲追魂劍」對佢毒害好深，其實佢應該係想講…
「鳳凰展翅，火炎重現！」即係想召喚「鳳凰火炎」出嚟…
「哎吔！」
但係事與願違，佢(火羅)咗，笪咗喺地下，「鳳凰火炎」又唔蘇佢…
「肯定係又中國傳統D衰嘢，傳大不傳細，要師兄你召喚先得啊！」
呢句又異常地正常，唔通笪一笪個人會醒D嘅？
「我召喚！？其實我都係啱啱先記得返，我應該係當年為咗好好保管「鳳凰火炎」，所以收咗佢喺自己身體裡面，咁多年嚟都冇用過嫁。」
「你失很過憶？」
「係啊，嚟咗日本之後，有成幾年嘅記憶空白咗。」
「唔很好講咁很多住喇，用「鳳凰火炎」殺很咗隻很樣先啦！」
「好，我試吓啦，「鳳凰火炎」，出嚟啦！」
「達叔」做咗一輪手印，但係「鳳凰火炎」都係冇蘇佢…
「大銅武神」嘅銅漿已經完全流走晒，我亦落返地下…
「余二十」就仲俾「美奈子」追打緊…
「光管陳」就仲俾「九曲追魂劍」追打緊…
「達叔」就呆住諗緊點召喚「鳳凰火炎」。
「師兄，我有條橋，試吓得唔得，你收阿輝為徒，再叫阿輝召喚丫。」
「Eee…好！我第一眼就覺得佢好似我細佬，收佢為徒肯定係我人生一大快事。」
佢哋對答緊，我唔方便插口，但係…可唔可以唔似「細佬」啊？
所以我好尷尬咁問︰—
「似你細佬！？」
「我偷「鳳凰火炎」嚟日本，就係為咗救我細佬，可惜咁多年都搵唔到佢，直至見到你，我覺得總算係滿足到我半崩潰嘅心，多謝你啊，輝仔！」
呢句肉麻到有D過份，所以我冇回應。
「師兄，唔很好講咁很多廢很話住啦，避劍避到我好很攰喇，黐膠線。」
D毒已經令「光管陳」由「很」變咗做「膠」喇。
「快都快唔嚟啦，儀式一定要做嘅，有冇茶同茶杯啊？」
「光管陳」又唔知喺邊度拎D茶同茶杯俾咗「達叔」就再去避「劍」。
「弟子阿輝聽命！」
我即刻喺「居居」落地下，再衝前下跪…
「全名係？」
「朱嘉輝。」
「火鳳派傳人，我，高比達，現收，你，朱嘉輝為我入室弟子，你願唔願意？」
點解會係咁樣收徒弟嫁？問人願唔願意，我就好似將我第一次奉獻咗俾佢咁。
「我…願…願意。」
一種複雜嘅心情，令我真係喊咗出嚟，但係我總算俾咗杯茶出去。
「唔好感動住。」
佢又做一輪手印之後就點咗一吓我額頭…
「唔好篤我隻眼啊！」「英雄」講。
我感覺到額頭熱咗一吓…
「禮成！你而家試吓召喚「鳳凰火炎」丫！」
「點召啊？」
「試吓大嗌「鳳凰火炎」丫。」
「鳳凰火炎。」「俾D中氣。」
「鳳凰！火炎。」「中氣啊！」
「鳳凰火炎~~~~~！」
………
「阿初，你條橋好似唔得噃，咁點算啊？」
其實我想問點解一定要召喚啫，隊隻手入去攞咪得囉…
但係，我當然冇咁蠢啦，一來熱家嘛，二來「余二十」都俾「美奈子」追打緊…
我諗唔使用佢啦。但係…
之後發現，我嘅呢個決定，可能係我一身嘅遺憾…
(嘭！)
我另返轉頭一睇…
「美奈子」俾「余二十」一吓打咗落地下…
「死八婆！話你死八婆又點啊？係要逼我打女人嘅？」
佢仲用隻腳踩住咗「美奈子」個頭…
衰人嘅行為總係咁令人討厭嘅，真係一見到就火喇。
之後對住我哋講…
「我冇袁丰田咁蠢，將自己奉獻俾「邪神」，我只係同佢有協定…」
「即係點啫？」「光管陳」問。
其實「光管陳」係想引余二十講嘢，等「達叔」有空間救返「美奈子」…
「變！」
「達叔」將「美奈子」變成「搖搖」，用條繩一吓就收返埋自己身邊。
「哼，條八婆你咪收返囉，我唔志在，我頭先講到邊話？」
「袁丰田好膠蠢。」
「係，冇錯，佢係好蠢，佢簽嘅係死約，我簽嘅係生約，只要我攪掂你哋就可以去攞我永生不死嘅身體，哈哈哈。」
「攪很掂我哋你先講啦。」
「你！？哈哈哈，你已經俾「九曲追魂劍」侵蝕咗，你唔覺得自己慢慢變咗條屍咁嘅咩？」
「光管陳」望望自己對手，我睇埋去，佢都真係有D乾化現象…
「戇很膠，雕你個蟲小你個技，睇很住啦！」
突然「光管陳」指天篤地，做個奇怪嘅手印就…
「鳳凰七重天﹒火鳳重生！」
佢突然變成咗隻雞蛋…
…
三秒之後裂開，「光管陳」就破殼而出…
個過程係有D滑稽，但係我哋不求過程，但求結果…
而家佢就好似重生咗一樣，變返晒正常…
「攪很掂！Sorry，呢句同邪氣冇關，純粹自己想講。」
「我睇你仲有咩招數？」佢再講。
「咩話？可惡！九曲追魂劍都對你冇用？不過…」
「不過咩啊？想逃走嗱？」
「哈哈哈，我估唔到你哋要逼到我用呢招…」
佢之後又一輪手印，手印非常怪異，佢塊面仲好似扭曲晒咁…
我見到…佢塊面嘅皮膚，一舊舊剝落，裡面D血肉出晒嚟…
「哈哈哈。」
自己個樣變成咁，如果係我肯定笑唔出。
「接招啦！我要吸晒你哋入黑洞！幾，何，黑，洞！」
佢頭頂出現咗個黑色嘅窿，仲…
(嗚~~~~~~)
裡面好似有D鬼哭聲咁，一直將所有嘢吸入去…
碎石﹑屍骨…就連「九曲追魂劍」同「余二十」自己都俾「黑洞」吸咗入去…
「達叔」同「光管陳」就強行用自己力量頂住…
「居居」好辛苦咁，總算抓得緊大石柱，但係…
我就頂唔住，手腳只係輕輕一放軟…
成個人就飛起咗，俾「黑洞」吸入去…
呢一刻，我就只可以雙眼合埋…
同呢個世界講聲再見…
阿爸，阿媽，再見…
阿明，阿狗，大袋，再見…
欣欣，再見…
「大家，再見喇！」
「再咩見啊？！我係唔會俾我學生喺我面前死嘅！鳳，移，換，影！」
我…
「師兄！阿輝係百年難得一遇嘅「神體」！你一定要好好栽培佢啊！再見喇！」
「陳Sir，陳Sir！阿Sir~~~~~！」
(蕉~ 龐~！)
「黑洞」消失咗，但係「光管陳」亦都唔見咗…
呢一刻，我淨係諗返頭先…
點解我唔早D試吓用「鳳凰火炎」啊？
呆咗嘅我，眼淚已經…
(待續)
下集預告︰
九陽草薙…
註解︰
(1) (火羅) — 出醜。
(2) 笪咗喺地下 — 「笪」即係趴或者跌。
(3) 唔蘇佢 — 唔理佢。
(4) 「細佬」 — 男性下陰。